Dimira kualidadis sin igual di Deus

PALABRA di Deus mostranu manga di kualidadis bonitu di Deus, ku ta judanu kunsil. Pur isemplu, si Palabra falanu di kuatru kualidadis prinsipal di Deus — puder, justisa, jiresa, ku amor. No jubi kada un delis.

Puder sin limiti

Jeova fala Abraon es: “Ami i Deus ku ten tudu puder.” (Kumsada 17:1) Puder di Deus ka ten igual, ka ten limiti, i ka ten fin. Ku si puder, Deus kumpu mundu ntidu.

Deus nunka ka ta usa si puder di mau manera. Sempri i ta usal di manera kontroladu i ku ta tene sintidu. Ora ki na usa si puder, i ta fasil di manera perfeitu, ku ta sta di akordu ku si justisa, jiresa, i si amor.

Jeova ta usa si puder sin kobra nada pa juda si servus fiel. Si Palabra fala: “Uju di SIÑOR ta pasa pa tudu parti di mundu, pa fortifika kilis ku tene korson pirfitu pa el.” (2 Kronikas 16:9) Sera ki bu ka na pertusi des Deus puderosu ku ta kuida di nos?

Deus di justisa

“SIÑOR ama kusa ku sta sertu.” (Salmu 37:28) Sempri i ta fasi ke ki sta sertu, i ta aẑi di akordu ku si leis justu.

Deus odia kusas ku ka sta sertu. I “ka ta fasi skuju nin i ka ta seta suku di bas.” (Ripitison di Lei 10:17) Deus i kontra kilis ku ta maltrata utrus. I ta aẑi pa difindi kilis ki fraku, ku ‘viuva i ku orfan.’ (Saida 22:22) Deus ka ta fasi diferensa di rasa. Si Palabra fala: “Deus ka ta fasi skuju di jinti, ma i ta seta tudu, di kalker rasa, ku rispital, ku ta fasi kil ki justu.” — Atus 10:34, 35.

Justisa di Jeova i perfeitu. I ka duru di mas, nin i ka moli tambi di mas. I ta kastiga fasiduris di mal ku ka seta ripindi, ma i ta tene miserikordia pa kilis ku ripindi. Si Palabra fala: “SIÑOR ta mostra miserikordia ku bondadi; i ta tarda pa paña raiba, i ten garandi amor. I ka ta raprindi tudu ora, nin i ka ta guarda si raiba pa sempri. I ka ta tratanu konformi no pekadus mersi, nin i ka na paganu konformi no maldadi.” (Salmu 103:8-10) Tambi, Deus ta lembra di tarbaju di si servus fiel, i dipus i ta paga elis. Sera ki es Deus di justisa ka mersi bu konfiansa?

Deus di Jiresa

Jeova i fonti di jiresa. Si Palabra fala sin: “O fundura di rikesa di jiresa di Deus, ku si kunsimentu!” (Romanus 11:33) Si jiresa ka ten kumpañer i ka ten fin.

Jiresa di Deus ta ojadu klaru na kusas ki kumpu. Un skirbidur di livru di Salmus kanta asin: “O SIÑOR, bu fasi manga di koldadi kusas! Bu fasil tudu ku jiresa.” — Salmu 104:24.

Jiresa di Deus ta ojadu tambi na si Palabra. Rei Davi fala sin: “Nsinamentus di SIÑOR i di fiansa, i ta da jiresa pa kilis ku ka ten.” (Salmu 19:7) Pensa so nes — bu pudi aprindi ciu di jiresa di Deus ku ka ten limiti! Bu ka misti aprindi?

“Deus i Amor”

Kualidadi prinsipal di Deus i amor. Palabra di Deus falanu ki “Deus i amor.” (1 Jon 4:8) Tudu kusas ki ta fasi i ku amor.

Deus mostranu si amor di manga di maneras. I danu bon kusas. Si Palabra fala: “I ta fasi bon kusas, i da bos cuba na seu, ku frutu na si tempu; i da manga di kumida sempri, i inci bo korson di alegria.” (Atus 14:17) Na bardadi, “tudu bon pursenti ku tudu kusa diritu ku no patidu, i bin di riba; i disi di Pape, dunu di lus di seu.” (Tiagu 1:17) Palabra di Deus i un prenda di balur garandi. Nel, Deus ta kontanu bardadi aserka del, tambi i ta sinanu si leis di amor ku si orientasons. Jesus fala sin na un orason: “Bu palabra i bardadi.” — Jon 17:17.

Deus ta judanu tambi na no purblemas. Si Palabra fala: “Pui bu fadiga riba di SIÑOR; el i na nguentau; nunka i ka na disa pa justu bulbulidu.” (Salmu 55:22) I ta purdanu no pekadus. Si Palabra fala sin: “SIÑOR, abo i bon, bu sta pruntu pa purda. Bu riku na bondadi pa tudu kilis ku comau.” (Salmu 86:5) Te mesmu Deus patinu vida ku ka ta kaba. Si Palabra fala asin: “I na limpa tudu larma na se uju. Mortu ka na ten mas, nin tristesa, nin cur, nin dur.” (Apokalipsi 21:4) Kuma ku bu na reaẑi pa amor ku Deus mostra? Sera ki bu na amal tambi?

Pertusi di Deus

Deus misti pa bu kunsil diritu. Si Palabra falanu asin: “Bo ciga pertu di Deus; i ta ciga pa bos.” (Tiagu 4:8) Deus coma fiel profeta Abraon “ña amigu.” (Isaias 41:8) Jeova misti tambi pa bu sedu si amigu.

Mas ki bu na aprindi aserka di Deus, mas bu na sinti pertu del i mas bu na sta kontenti. Si Palabra fala: “Sortiadu ki omi” ku ta “kontenti ku lei di SIÑOR, i ta pensa nel di dia ku di noti.” (Salmu 1:1, 2) Asin, kontinua na studa Palabra di Deus. Pensa fundu na si kualidadis ku si obras. Mostra bu amor pa el na aplika kusas ki bu aprindi. “No amor pa Deus ta mostra na manera ku no ta obdisi si mandamentus. Si mandamentus gora, nin e ka kansadu.” (1 Jon 5:3) Fasi orason suma ki un skirbidur di Salmus fasi: “Nsinan bu kamiñus, SIÑOR; fasin pa N kunsi elis. Gian na bu bardadi.” (Salmu 25:4, 5) Si bu fasi asin, bu na bin oja kuma Deus “ka sta lunju di kada un di nos.” — Atus 17:27.