Kuma ku bu pudi pertusi di Deus?

1. Deus ta sukuta tudu orasons?

Deus kumbida tudu koldadi di jintis pa e pertusi del atraves di orason. (Salmu 65:2) Ma, i ka ta sukuta o seta tudu orasons. Pur isemplu, Deus ka ta obi orasons di un omi ku ta maltrata si minjer. (1 Pedru 3:7) Tambi, oca Israelitas kontinua na fasi mal, Deus nega obi se orasons. Ma, Deus pudi obi te mesmu orasons di kilis ku fasi pekadu gravi si e ripindi. Na bardadi, orason i un privilejiu. — Lei Isaias 1:15; 55:7.

Jubi video Deus ta sukuta tudu orasons?

2. Kuma ku no dibi di ora?

Orason fasi parti di no adorason, pa kila no dibi di ora so pa kin ku kumpunu, Jeova. (Mateus 4:10; 6:9) Tambi, suma no sedu pekaduris, no dibi di ora na nomi di Jesus pabia i muri pa no pekadus. (Jon 14:6) Jeova ka misti pa no ripiti orasons nkornadu o skribidu na un livru. I misti pa no ora di no korson. — Lei Mateus 6:7; Filipensis 4:6, 7.

No Kriadur pudi obi te mesmu orasons silensiosu. (1 Samuel 1:12, 13) I kumbidanu ora na tudu mumentu, suma ora ku no lanta parmaña, antis di durmi, ora di kume i ora ki no tene purblema. — Lei Salmu 55:22; Mateus 15:36.

3. Ke ku manda kristons di bardadi ta riuni?

I ka fasil pertusi di Deus, pabia no sta na vivi na metadi di jintis ku ka tene fe na Deus i ku ta goza di si prumesa aserka di pas na tera. (2 Timótiu 3:1, 4; 2 Pedru 3:3, 13) Pa kila, no pirsisa di asosiason nkorajanti di no kumpañeris kriston, i elis e pirsisa tambi di no asosiason. — Lei Ebreus 10:24, 25.

Asosia ku povu ku ama Deus na judanu pertusi di Deus. Runions di Tustumuñas di Jeova na danu bon oportunidadi di benefisia di fe di utrus. — Lei Romanus 1:11, 12.

4. Kuma ku bu pudi pertusi di Deus?

Bu pudi pertusi di Deus atraves di medita na ke ki bu aprindi di si Palabra. Pensa na ke ki bu pudi aprindi di si tarbajus, si konsijus ku si prumesas. Orason ku meditason ta judanu ntindi garandesa di amor di Deus ku si jiresa. — Lei Josué 1:8; Salmu 1:1-3.

Bu pudi pertusi di Deus so si bu konfia nel, si bu tene fe nel. Ma fe i suma un planta ki pirsisa di kuidadu. Bu dibi di sempri kuida di bu fe atraves di medita na rason di bu krensas. — Lei Mateus 4:4; Ebreus 11:1, 6.

5. Kuma ku pertusi di Deus pudi benefisiau?

Jeova ta kuida di kilis ku amal. I pudi proteji elis di kualker kusa ki pudi pui na pirigu se fe ku speransa di vida ku ka ta kaba. (Salmu 91:1, 2, 7-10) I ta avisanu kontra kamiñus ki pudi ameasa no saudi ku filisidadi. Jeova ta sinanu minjor manera di vivi. — Lei Salmu 73:27, 28; Tiagu 4:4, 8.