Ke ki na bin akontisi ku riliẑions?

1. Sera ki tudu riliẑions bon?

I ten manga di jintis sinseru na tudu riliẑions. I bon noba sibi kuma, Deus nota de jintis i ta preokupa kelis. Ma i tristi sibi kuma, manga di kusas mau fasidu na nomi di riliẑion. (2 Koríntius 4:3, 4; 11:13-15) Sugundu nobas, alguns riliẑions ta nvolvi te mesmu na terorismu, matansas, gera, maltratu ku abusu seksual di mininus. Es ta pui jintis sinseru fika tristi! — Lei Mateus 24:3-5, 11, 12.

Nkuantu riliẑion di bardadi ta ngaba Deus, riliẑions falsu ka ta kontental. E ta sina ideias ki ka sta na Biblia, suma nsinus falsu aserka di Deus ku mortu. Ma Jeova misti pa jintis kunsi bardadi aserka del. — Lei Ezekiel 18:4; 1 Timótiu 2:3-5.

2. Ke ki na bin akontisi ku riliẑions?

No pudi fika kontenti di kuma, Deus ka ta nganadu pa riliẑions ku ta afirma amal ma ku na bardadi ama mundu di Satanas. (Tiagu 4:4) Palabra di Deus kompara tudu riliẑions falsu suma “Garandi Babilonia.” Babilonia i antigu sidadi nunde ki riliẑions falsu kumsa dipus di diluviu di dias di Noe. I ka na tarda, Deus na bin tisi un distruison rapidu kontra riliẑions ku ta disvia i kansa jintis. — Lei Apokalipsi 17:1, 2, 5, 16, 17; 18:8.

Ma, Jeova ka diskisi di jintis sinseru ku spalia na metadi di riliẑions falsu na mundu ntidu. I sta na tira ki jintis di riliẑions falsu atraves di nsinu di bardadi. — Lei Mikeias 4:2, 5.

3. Ke ki jintis sinseru dibi di fasi?

Jeova ta preokupa ku jintis ku misti kunsi bardadi i ku misti fasi ke ki bon. I avisa elis pa e sai di riliẑion falsu. Jintis ku ama Deus sta dispostu pa fasi mudansas pa pudi kontental. — Lei Apokalipsi 18:4.

Na purmeru sekulu, oca jintis sinseru obi bon noba atraves di apostulus, e reaji ku alegria. E aprindi atraves di Jeova nobu manera di vivi, manera mas filis di vivi ku objetivu i ku speransa. E sedu un bon isemplu pa nos aos, pabia e seta bon noba pa manera ke pui Jeova na purmeru lugar na se vida. — Lei 1 Tesalonisensis 1:8, 9; 2:13.

Jeova ta risibi ben na si familia kilis ku disa riliẑion falsu. Si bu seta konviti amorosu di Jeova, bu na tene amizadi kel, un nobu familia amorosu di kumpañeris di adorason i vida ku ka ta kaba. — Lei Markus 10:29, 30; 2 Koríntius 6:17, 18.

4. Kuma ku Deus na tisi alegria pa tudu tera?

Julgamentu di riliẑions falsu ki na bin i bon noba. I na bin kaba ku kansera na mundu ntidu. Nunka mas riliẑions falsu ka na disvia i dividi jintis. Tudu jintis ku na vivi, na bin sta unidu na adorason di uniku Deus di bardadi. — Lei Apokalipsi 18:20, 21; 21:3, 4.