Bu ciga ja di dingi o fika ku medu?

Jubi pa mininu na foto. I sta suma i dingi, i ka bardadi? Bu ciga di dingi des manera? — Anos tudu no ciga ja di dingi. Biblia fala di amigus di Jeova ku ciga ja di dingi tambi i e fikaba ku medu. Un delis i Elias. Gosi no na aprindi aserka del.

Elias moraba na Israel manga di tempu atras, antis di Jesus padidu. Rei di Israel comadu Akabi, ka ta adoraba Deus di bardadi, Jeova. Akabi ku si minjer comadu Jezabel, ta adoraba deus falsu comadu Baal. E ku manda manga di jintis na Israel kumsa adora tambi Baal. Raiña Jezabel seduba mau dimas, i mistiba mata tudu kilis ku ta adoraba Jeova, juntu ku Elias! Bu sibi ke ku Elias fasi? —

Elias kuri! I bai lunju pa disertu i bai sugundi na koba di montaña. Bu sibi ke ku manda i fasi kila? — I staba ku medu. Ma Elias ka pirsisaba di medi. Pabia di ke? Pabia i sibiba kuma Jeova pudi judal. Jeova mostraba ja Elias si puder. Un bias, Jeova ruspundi orason di Elias i manda fugu di seu. Pabia di kila Jeova pudi juda Elias nes situason!

Oca Elias staba inda na koba di montaña, Jeova papia ku el i puntal: ‘Ke ku bu na fasi li?’ Elias ruspundi: ‘Ami so inda ku kontinua na adorau, i N sta ku medu pabia e na buska manera di matan.’ Elias pensaba kuma tudu utrus jintis ku ta adoraba Jeova matadu. Ma Jeova fala Elias: ‘Nau, kila i ka bardadi.’ I ten utrus 7.000 jintis ku sta inda na adoran. Tene koraẑen. N tene manga di tarbaju pa bo! Bu pensa kuma Elias kontenti di obi es? —

Ke ku bu pudi aprindi di ke ku akontisi ku Elias? — Nunka bu ka dibi di sinti kuma bu dingi o fika ku medu. Bu tene amigus ku gosta di Jeova i ku gosta di bo. Tambi, Jeova tene manga di puder, i sempri i na judau! Jeova na sta sempri ku bo pa judau, sera ki es ka ta fasiu kontenti? —