Davi ka teneba medu

Ke ku bu ta fasi ora ku bu sta ku medu? — Talves bu ta bai pa bu mame ku bu pape pa pidi ajuda. Ma i ten algin tambi ku pudi judau. I tene puder mas di ki kualker algin. Bu sibi i kin? — I Jeova. Gosi no na papia di un joven comadu Davi ku Biblia fala del. I sibiba kuma Jeova na judal sempri, asin i ka teneba medu.

Papes di Davi sinalba ama Jeova disna di ocal pikininu. Es juda Davi pa ka tene medu mesmu ki un kusa ku pudi pantandal akontisi. I sibiba kuma Jeova i si amigu i na judal. Un dia kontra Davi na bisia karnelis, un lion garandi bin murdi un karnel pa leba! Bu sibi ke ku Davi fasi? I bai tras di lion i pegal na barba i sutal tok i matal. Tambi kontra ki un ursu bin pa paña karnel Davi matal tambi! Kin ku bu pensa i juda Davi? — I Jeova.

I tenba tambi utru mumentu ku Davi mostra koraẑen. Israelitas staba na gera ku un jintis comadu Filisteus. Un tropa di Filisteus seduba un omi kumpridu dimas, un jiganti! Si nomi i Golias. Es omi jiganti staba na fasi torosa pa tropas israelitas i pa Jeova. Golias disafia tropas di Israel pa bin gera ku el. Ma tudu israelitas teneba medu dimas di gera ku el. Oca ku Davi obi kila, i fala Golias: ‘N na geria ku bo! Jeova na judan, i N na ngañau!’ Bu pensa kuma Davi seduba korajoẑu? — Sin, i seduba korajoẑu. Bu misti sibi ke ku akontisi dipus?

Davi toma si lamparan ku sinku pedras, i bai geria ku ki omi jiganti. Oca Golias oja kuma ku Davi seduba joven i fasil torosa. Ma Davi falal: ‘Bu na bin pa mi ku spada, ma ami na bai pa bo na nomi di Jeova!’ Davi pui pedra na si lamparan i kuri pa kontra ku Golias, i fercal pedra. Pedra suta Golias na testa pertu di naris! Golias kai na con i muri! Filisteus panta e kuri. Kuma ki un joven suma Davi pudiba ngaña un jiganti gera? — Jeova judal, i Jeova teneba mas forsa di ki kil jiganti!

Ke ki bu pudi aprindi di storia di Davi? — Jeova tene forsa mas di ki kualker algin. I el i bu amigu. Asin ora ki bin ten un kusa ku pudi fasiu sinti medu, lembra kuma Jeova pudi judau sedu korajoẑu!