Bo sedu fiel pa n̈utru

Jeova misti pa no sedu fiel. (Salmu 18:25) Es i importanti na bu kasamenti, pabia sin fidelidadi konfiansa ka ten. I pirsis konfiansa pa amor kirsi.

Aos i ten manga di kusas ku pudi nfluensia algin pa i ka sedu fiel na kasamenti. Ma pa proteẑi bu kasamenti bu dibi di sta disididu pa fasi dus kusa.

1 DA BU KASAMENTI PRIORIDADI

ES KI BIBLIA FALA: “Sibi kuji kusa mas bon”. (Filipensis 1:10) Bu kasamenti i un di kusas mas importanti na bu vida. I meresi dadu prioridadi.

Jeova misti pa bu konsentra so na bu parseru i pa bo “vivi juntu”. (Eklesiastis 9:⁠9) I mostra klaru kuma nunka bu ka dibi di dispresa bu parseru, ma bo dibi di buska manera di kontenta n̈utru. (1 Koríntius 10:24) Fasi bu parseru sinti kuma bu pirsisa del i bu ta apresial.

KE KU BU PUDI FASI:

• Ranja sempri tempu pa sta juntu ku bu parseru, i dal tudu atenson.

• Ka bu pensa so na bu “kabesa,” ma pensa tambi na bu “parseru”.

2 GUARDA BU KORSON

ES KI BIBLIA FALA: “Tudu algin ku jubi minjer ku mau pensamentu, i kai ja ku el na si korson.” (Mateus 5:28) Si algin kontinua na pensa na ten ku utru, i ka sta ja na sedu fiel pa si parseru.

Jeova fala kuma bu pirsisa di “guarda bu korson”. (Ditus 4:23; Jeremias 17:⁠9) Pa fasi kila, bu pirsisa di kuida ku bu ujus. (Mateus 5:​29, 30) Sigi isemplu di Jo, ku fasiba kontratu ku si uju pa i ka jubi pa utru minjer ku mau diseẑu. (Jo 31:⁠1) Sta sempri disididu pa ka jubi pornografia. I tambi sta disididu pa ivita kualker relasionamentu amorosu ku algin ki ka sedu bu parseru.

KE KU BU PUDI FASI:

• Mostra utrus klaru di kuma bu tene komprimisu ku bu parseru.

• Preokupa ku sintimentu di bu parseru, i kaba ku kualker amizadi ki na fasi bu parseru sinti mal.