PARTI 9
Familia — bo adora Jeova juntu
“Bo adora kil ku fasi seu ku tera”.— Apokalipsi 14:7
Suma ku bu aprindi nes livru, Biblia tene manga di konsijus ku pudi judau ku bu familia. Jeova misti pa bo sedu filis. I purmiti kuma si bo pui si adorason na purmeru lugar, “tudu e utru kusas, bo ta bin dadu el.” (Mateus 6:33) Na bardadi i misti pa bu sedu si amigu. Aproveita tudu opurtunidadi pa bu tene amizadi ku Deus. Es i amizadi mas garandi ki un algin pudi tene. — Mateus 22:37, 38.
1 FORTALESI BU RELASON KU JEOVA
ES KI BIBLIA FALA: “Nta sedu bo pape; bo ta sedu ña fijus macu ku femia. Asin ku Siñor ku ten tudu puder fala.” (2 Koríntius 6:18) Deus misti pa bu sedu si amigu intimu. Orason i un manera di sedu si amigu. Jeova kumbidau pa bu “ora sempri.” (1 Tesalonisensis 5:17) I misti obi ke ku bu tene na bu korson. (Filipensis 4:6) Si bu ta ora ku bu familia, e na oja kuma, Deus i un algin real pa bo.
Alen di papia ku Deus, bu pirsisa tambi di sukutal. Bu pudi sukutal atraves di studa si Palabra ku livrus basiadu na Biblia. (Salmu 1:1, 2) Pensa na ke ku bu aprindi. (Salmu 77:11, 12) Pa sukuta Deus i pirsis tambi mati sempri runions. — Salmu 122:1-4.
Utru manera importanti di fortalesi bu relason ku Jeova, i papia ku utrus aserka del. Pa mas ku bu na fasil, bu na sinti mas pertu del. — Mateus 28:19, 20.
KE KU BU PUDI FASI:
Ranja tempu kada dia pa lei Biblia i pa ora.
Suma familia, pui atividadis spiritual na purmeru lugar, en ves di divirtimentu ku pasa tempu.
2 BO APRESIA STUDU DI BIBLIA NA FAMILIA
ES KI BIBLIA FALA: “Bo ciga pertu di Deus; i ta ciga pa bos.” (Tiagu 4:8) Bo pirsisa di fasi programa di studu di Biblia na familia i sigil sempri. (Kumsada 18:19) Ma i pirsis fasi mas. Deus dibi di fasi parti di bo vida di kada dia. Fortalesi relason ku bu familia tene ku Deus atraves di papia aserka del “ora ku bu sta sintadu na bu kasa, o bu na yanda na kamiñu, ora ku bu na dita o bu na lanta na kama.” (Ripitison di Lei 6:6, 7) Tene objetivu di sedu suma Josué, ku fala sin: “Ma ami ku ña familia, no na sirbi SIÑOR.” — Josué 24:15.
KE KU BU PUDI FASI:
Fasi un programa di studu ku na leba en konta nesesidadi di kada membru di familia.