LISON 25
Kal tipu di vida ku Deus misti pa no tene?
Biblia fala di kuma, pekaduris tene vida ‘kurtu incidu di kasabi.’ (Jo 14:1) Sera ki es tipu di vida ku Deus misti pa no tene? Si ka es, kal tipu di vida ki misti pa no tene? Sera ki no na bin tene vida ki misti pa nos? Jubi respostas nkoraẑanti ku Biblia da.
1. Kal tipu di vida ku Jeova misti pa no tene?
Jeova misti pa no tene minjor vida. Oca ki kumpu Adon ku Eva, i puiba elis na un paraísu bonitu, comadu jardin di Eden. Dipus “Deus bensua elis i fala elis: ‘Bo padi ciu, bo inci mundu, bo manda riba del.’” (Kumsada 1:28) Jeova mistiba pa e padi fijus, pa e fasi pa tudu Tera sedu un paraísu, i toma konta di limarias. I mistiba pa tudu jintis tene saudi perfeitu i vivi pa sempri.
No ka tene es tipu di vida aos,a ma Deus misti inda pa no tene es tipu di vida. (Isaias 46:10, 11) I misti inda pa kilis ku ta obdisil vivi pa sempri na un kondison perfeitu. — Lei Apokalipsi 21:3, 4.
2. Kuma ku no vida pudi tene objetivu desdi gosi?
Jeova kumpunu ku kapasidadi di ‘obi palabra di Deus i fasi suma ki fala,’ asin no pudi kunsil i adoral. (Lei Lukas 11:28.) I misti pa no tene un amizadi intimu ku el, pa no ‘yanda na tudu si kamiñus, no amal,’ i sirbil ‘ku tudu no korson’. (Ripitison di Lei 10:12; Tiagu 2:23) Si no fasi kila, no pudi tene filisidadi di bardadi mesmu si no tene purblemas. Ora ku no adora Jeova, no vida ta tene sintidu pabia no ta vivi di un manera kel i misti.
APRINDI MAS
Aprindi aserka di amor garandi ku Jeova mostra oca ki na kumpu Tera pa nos i ke ku si palabra sinanu aserka di objetivu di vida.
3. Jeova misti pa no tene un vida filis
Mostra VIDEO, dipus bo kombersa aserka des purgunta:
Ke ku manda Deus kumpu no Tera bonitu?
Lei Eklesiastis 3:11, dipus bo kombersa aserka des purgunta:
Ke ku es versikulu ta sinau aserka di Jeova?
4. Vida ku Jeova misti pa no tene ka muda
Lei Salmu 37:11, 29 ku Isaias 55:11, dipus bo kombersa aserka des purgunta:
Kuma ku no sibi di kuma vida ku Jeova misti pa nos ka muda?
Un kasa ku dana pudi kumpudu mas. Di mesmu manera, Deus na bin kumpu Tera ku pekaduris dana i dal pa kilis ku amal.
5. Ora ku no adora Jeova no vida ta tene sintidu
Sibi pabia di ke ku manda no sta na vivi, pudi danu filisidadi. Mostra VIDEO, dipus bo kombersa aserka des purgunta:
Kuma ku Terumi benefisia di sibi kal ki objetivu di vida?
Lei Eklesiastis 12:13, dipus bo kombersa aserka des purgunta:
Suma Jeova fasi manga di kusa pa nos, ke ku no dibi di fasi?
ALGIN PUDI PUNTA: “Kal ki objetivu di vida?”
Kuma ku bu na ruspundil?
RUSUMU
Jeova misti pa no vivi pa sempri na un kondison perfeitu li na Tera. Ora ku no adoral ku tudu no korson, no vida ta tene sintidu desdi gosi.
Rekapitulason
Kal vida ku Jeova mistiba pa Adon ku Eva tene?
Kuma ku no sibi di kuma vida ku Deus mistiba pa no tene ka muda?
Ke ku bu pudi fasi pa bu vida tene sintidu?
TENE MAS INFORMASON
Jubi ke ku ta mostra di kuma jardin di Eden izisti.
“Jardin di Eden — i un Storia o i Bardadi?” (Sintinela di janeru di 2011)
Aprindi ke ku manda no pudi tene sertesa di kuma Tera na kontinua pa sempri.
Jubi kuma ku un omi ku pensaba kuma i tene tudu diskubri ke ku staba na faltal na si vida.
a Na prosimu lison, bu na bin aprindi ke ku manda no ka tene es tipu di vida aos.