LISON 29

Ke ku ta akontisi ora ku no muri?

Edison mprimidu

Sera ki bu ciga ja di tene familia o amigu ku muri? Na ki mumentu ku bu sta ku dur, talves bu pudi punta: ‘Ke ku ta akontisi ora ku no muri? Sera ki no tene speransa di kuma un dia no na bin oja no familias ku amigus ku muri?’ Es lison ku kil ku na bin, na mostra resposta di Biblia ku ta konsolanu.

1. Ke ku ta akontisi ora ku no muri?

Jesus kompara mortu ku un sonu fundu. Un algin ku sta na un sonu fundu ka ta sibi ke ku na pasa. Na kal sintidu ku mortu i suma un sonu fundu? Ora ku algin muri, i ka ta sinti dur nin i ka ta sufri. Biblia fala: “Kilis ku muri ja e ka sibi nada”. — Lei Eklesiastis 9:5.

2. Kuma ku kunsi bardadi aserka di mortu ta judanu?

Manga di jinti ta medi mortu — i te mesmu e ta medi kilis ku muri! Ma ke ku Biblia fala aserka di mortu pudi konsolau. Jesus fala: “Bardadi ta liberta bos.” (Jon 8:32) I ten riliẑions ku ta sina di kuma ora ku un algin muri, i tene un alma ku ta kontinua vivi dipus di mortu, ma i ka es ku Biblia ta sina. Pa kila, ningin ka ta sufri dipus di muri. Tambi, suma mortus ka sibi nada e ka pudi fasinu mal. Pa kila, no ka pirsisa di adora elis, pa fasi kusas ku na pui elis pa e ka paña raiba kontra nos, i no ka pirsisa di ora pa elis.

I ten jintis ku ta fala di kuma e pudi papia ku kilis ku muri. Ma es ka pudi sedu. Suma ku no aprindi, kilis ku muri ja “e ka sibi nada.” Kilis ku ta pensa di kuma e na papia ku se familias ku amigus ku muri, na bardadi e sta na papia ku dimonius ku ta finji sedu kilis ku muri. Asin, sibi bardadi aserka di mortu ta proteẑinu kontra dimonius. Jeova avisanu kontra tenta papia ku mortus pabia i sibi di kuma tene kontaktu ku dimonius na fasinu mal. — Lei Ripitison di Lei 18:10-12.

APRINDI MAS

Aprindi mas aserka di ke ku Biblia sina aserka di mortu, i fortalisi bu fe na Deus di amor ku ka ta kastiga kilis ku muri.

Un omi ku si dus fiju pikininu sinta na un banku na funeral di si minjer, mame di si fijus. Amigus ku familias sta pertu e na konsola elis i apoia elis.

3. Aprindi ke ku ta akontisi na bardadi ku kilis ku muri

Na mundu ntidu, jintis ta fia na kusas diferenti aserka di ke ku ta akontisi ora ku no muri. I klaru di kuma, i ka tudu es kusas ke ta fia nel ki bardadi.

Na zona ku bu mora, kal kusas ku jintis ta fia nel aserka di ke ku ta akontisi ku kilis ku muri?

Pa oja ke ku Biblia ta sina, mostra VIDEO.

VIDEO: Ke ku ta akontisi ku nos ora ku no muri? — So un parti (1:19)

Imaẑens: Imaẑen di video ‘Ke ku ta akontisi ora ku no muri? — So un parti.’ 1. Un kadaver ditandadu na kama di ospital. 2. Un omi sta na durmi entri dus jinti oca i na bai bias na kumboiu.

Lei Eklesiastis 3:20, dipus bo kombersa aserka des purguntas:

Di akordu ku es versikulu, ke ku ta akontisi ora ku un algin muri?
Sera ki i ten un parti di algin ku ta kontinua bibu dipus di muri?

Biblia falanu aserka di mortu di Lazaru, un amigu intimu di Jesus. Nkuantu bu na lei Jon 11:11-14, nota na kal stadu ku Jesus fala Lazaru sta nel. Dipus bo kombersa aserka des purguntas:

Ke ku Jesus kompara mortu kel?
Ke ku es komparason ta sinanu aserka di ke ku ta akontisi ku kilis ku muri?
Kuma ku bu ta sinti aserka di ke ku Biblia fala aserka di mortu?

4. Sibi bardadi aserka di mortu ta judanu

Sibi bardadi aserka di mortu ta libertanu di medu di mortu. Lei Eklesiastis 9:10, dipus bo kombersa aserka des purgunta:

Sera ki kilis ku muri pudi fasinu mal?

Ora ku no fia na bardadi ku sta na Biblia, no ka na fia na mintida di kuma kilis ku muri dibi di fasidu algun kusa pa e ka raiba kontra nos o adoradu. Lei Sirmonias 20:6 ku Apokalipsi 4:11, dipus bo kombersa aserka des purgunta:

Kuma ku bu pensa Jeova ta sinti aserka di un algin ku ta adora mortu o buska ajuda di un algin ku muri?

Imaẑens: Kustumus ku sta ligadu ku adora mortus. 1. Un omi pui kumida dianti di un koba i finka juju i na ora. 2. Tris omis di etnia diferenti sta na baja ku se ropa tradisional. 3. Un grupu di jintis pui maskra di kabesa di skletu e karga un kabesa di skletu garandi na dia di mortu. — Bardadi aserka di mortu ta libertanu di kustumus ku ka ta kontenta Jeova.

5. Sibi bardadi aserka di mortu ta konsolanu

Manga di jinti sinadu di kuma, ora ke muri, e na kastigadu pabia di kusas mau ke fasi. Ma i ta konsolanu sibi di kuma ningin ka ta sufri dipus ki muri, te mesmu algin ku fasi kusas ki mau dimas. Lei Romanus 6:7, dipus bo kombersa aserka des purgunta:

Suma ku no lei na Biblia, kil ku muri i sta livri di pekadu, bu pensa kuma ora ku un algin muri i na bai sufri pabia di pekadu ki fasiba?

Mas no kunsi Jeova minjor, mas no na nota di kuma, nunka i ka na kastiga kilis ku muri. Lei Ripitison di Lei 32:4 ku 1 Jon 4:8, dipus bo kombersa aserka des purguntas:

Sera ki es Deus ku tene bon maneras di sedu ku faladu del nes versikulus na seta kastiga kilis ku muri?
Sera ki bu pensa di kuma sibi bardadi aserka di mortu ta konsolanu? Pabia ku bu pensa asin?

ALGUNS JINTIS TA FALA: “N medi pa ka kilis ku muri bin fasin mal.”