LISON 49
Kuma ku bu familia pudi sedu filis? — Parti 1
Kilis ku kumsa kasa ta spera di kuma, kontentamentu ka na fika so na se dia di kasamenti, ma i na fika pa sempri. Kila pudi sedu. Kristons ku kasa pa manga di tempu, ku ta sforsa ciu pa aplika konsijus ku sta na Biblia, sibi kuma i pusivel.
1. Kal konsiju ku Biblia da pa omis?
Jeova kuji omi pa i sedu kabesa di familia. (Lei Efésius 5:23.) Jeova na spera pa i toma disisons ku na benefisia familia. Biblia fala pa omis kontinua ‘ama se minjer.’ (Efésius 5:25) Ke ku es signifika? Un omi ku ama si minjer ta tratal ku bondadi na kasa i na metadi di jintis. I ta proteẑil di mal, i ta fasi si minjor pa kuida di si nesesidadi na sintidu fisiku i emosional. (1 Timótiu 5:8) Mas importanti i ta toma diantera pa kuida di si nesesidadi spiritual. (Mateus 4:4) Pur izemplu, i pudi ora i lei Biblia ku si minjer. Ora ku un omi ta kuida di si minjer ku amor, i ta manti si amizadi ku Jeova. — Lei 1 Pedru 3:7.
2. Kal konsiju ku Biblia da pa minjeris?
Palabra di Deus fala minjer “dibi di rispita si omi.” (Efésius 5:33) Kuma ki pudi fasi kila? I pudi pensa na bon maneras di sedu di si omi ku sforsu ki ta fasi pa kuida del i ku se fijus. I pudi tambi mostra rispitu ora ki na apoia disisons ki ta toma, papia kel ku bondadi i papia ben del mesmu si ka ta adora Jeova.
3. Kuma ku un omi ku un minjer pudi torna se kasamenti forti?
Biblia fala aserka di kilis ku kasa: “Elis dus e ta sedu un kurpu son.” (Mateus 19:5) Es signifika, e dibi di luta juntu kontra kualker kusa ku pudi rapati se amor pa n̈utru. E ta fasi kila ora ke na pasa sempri tempu ku n̈utru, tambi di manera sinseru i ku amor e ta konta ke ke na pensa i sinti pa n̈utru. E ka ta disa pa nada o ningin, alen di Jeova, sedu mas importanti di ki se parseru. E ta toma manga di kuidadu pa ka tene amizadi intimu dimas ku kualker algin.
APRINDI MAS
Jubi kal prinsipius di Biblia ku pudi torna bu kasamenti forti.
4. Omis — bo ama i bo kuida ben di bo minjeris
Biblia fala: “Omi dibi di ama si minjer suma si kurpu propi.” (Efésius 5:28, 29) Ke ku kila signifika? Mostra VIDEO, dipus bo kombersa aserka des purgunta:
Di kal maneras ku un omi pudi mostra di kuma i ama i ta kuida di si minjer?
Lei Kolosensis 3:12, dipus bo kombersa aserka des purguntas:
Kuma ku un omi pudi mostra es maneras di sedu na si kasamenti?
5. Minjeres — bo ama i bo rispita bo omis
Biblia nkoraẑa un minjer pa rispita si omi mesmu si ta sirbi Jeova o nau. Lei 1 Pedru 3:1, 2, dipus bo kombersa aserka des purguntas:
Si bu tene un omi ku ka ta sirbi Jeova, sin duvida bu na misti pa i sirbi Jeova. Kal ki minjor manera di judal, bu pensa kuma bu dibi di pregal tudu ora, o i mas minjor tratal ku bondadi i ku rispitu? Pabia?
Omis ku minjeris pudi toma bon disisons juntu. Ma un ora, un minjer pudi ka konkorda ku si omi. I pudi konta ke ki pensa ku kalma i ku rispitu, ma i dibi di lembra di kuma Jeova ku da omi responsabilidadi di disidi ke ki minjor pa familia. I dibi di fasi si minjor pa apoia si disison. Si fasi kila, i na juda pa i ten bon ambienti i kontentamentu na kasa. Lei 1 Pedru 3:3-5, dipus bo kombersa aserka des purgunta:
Kuma ku Jeova ta sinti ora ku un minjer mostra rispitu pa si omi?
6. Bu pudi vensi purblemas na bu kasamenti
Nin un kasamenti i ka perfeitu. Pa kila, kasadus dibi di tarbaja juntu pa vensi difikuldadis. Mostra VIDEO, dipus bo kombersa aserka des perguntas:
Na video, ke ku ta mostra kuma es omi ku si minjer, ka ta pertusi ciu di n̈utru?
Ke ke fasi pa pudi fortalisi se kasamenti?
Lei 1 Koríntius 10:24 ku Kolosensis 3:13. Dipus di lei kada testu, bo kombersa aserka des purgunta:
Kuma ku aplika es konsiju pudi fortalisi kasamenti?
Biblia fala no dibi di trata n̈utru ku rispitu. Mostra rispitu nklui trata algin ku bondadi i di un bon manera. Lei Romanus 12:10, dipus bo kombersa aserka des purguntas:
Sera ki omis o minjeris dibi di pera pa se parseru rispita elis purmeru? Pabia ku bu pensa i dibi di sedu sedu asin, o pabia ku bu pensa i ka dibi di sedu asin?
ALGUNS JINTIS TA FALA: “Ami ku ña parseru no ka ta pertusi di n̈utru gosi suma purmeru.”
Kuma ku bu pudi splika di kuma Biblia pudi juda elis?
RUSUMU
Omi ku minjer pudi sedu filis ora ke ama n̈utru, e rispita n̈utru, i e aplika prinsipius di Biblia.
Rekapitulason
Kuma ku omi pudi juda pa kasamenti sedu filis?
Kuma ku minjer pudi juda pa kasamenti sedu filis?
Si kontra bu kasa, kal prinsipiu di Biblia ku pudi fortalisi bu kasamenti?
TENE MAS INFORMASON
Aprindi kusas pratiku ku pudi judau tene un vida di familia filis.
Jubi un video musikal ku na mostra bensons ku bu na tene di aplika konsijus di Deus na bu kasamenti.
Jubi ke ku signifika seta fika bas di omi suma ŝef di familia.
“Minjeris, pabia ku bo dibi di fika bas di bo omis?” (Sintinela di 15 di maiu di 2010)
Kuma ku un kasal vensi purblemas seriu, te mesmu manera ke kaba se kasamenti?