LISON 51
Kuma ku bu pudi kontenta Jeova na bu manera di papia ku utrus?
Oca ku Jeova kumpunu, i danu un prenda bonitu, ku sedu kapasidadi di papia. Sera ki manera ku no ta usa es prenda i importanti pa Deus? Sin, i importanti! (Lei Tiagu 1:26.) Pa kila, kuma ku no pudi usa no kapasidadi di papia di un manera ku na kontenta Jeova?
1. Kuma ku no dibi di usa es prenda ku Jeova danu?
Biblia falanu: “Bo da n̈utru koraẑen, bo juda n̈utru”. (1 Tesalonisensis 5:11) Sera ki bu pudi pensa na alguns jinti ku pirsisa di nkoraẑamentu? Ke ku bu pudi fasi pa pui elis sinti ben? Konta elis di kuma e sedu importanti pa bo. Talves bu pudi konta elis kal kusa ku bu mas gosta nelis. Sera ki bu pudi pensa na un testu ku pudi nkoraẑa algin ku bu kunsi? I ten manga di testus ku bu pudi kuji. Lembra tambi kuma, manera ku bu na fala un kusa pudi nkoraẑa algin ciu. Pa kila, tenta sempri papia ku bondadi i ku kalma. — Ditus 15:1.
2. Kal tipu di palabras ku no dibi di ivita?
Biblia fala: “Nin un palabra fiu ka dibi di sai na bo boka”. (Lei Efésius 4:29.) Es signifika, no ka dibi di koba mal o fala un kusa mal dimas ku na firi sintimentu di un algin. Tambi no dibi di ivita sinta na nomi di algin i disfama algin. — Lei Ditus 16:28.
3. Ke ku pudi judanu papia di un manera ku na nkoraẑa utrus?
Manga di bias, kusas ku no ta papia ta mostra ke ku sta na no korson o ke ku no ta pensa nel. (Lukas 6:45) Pa kila, no pirsisa di trena no kabesa pa konsentra na bon kusas, kusas justu, puru, ku pudi amadu i ku meresi ngaba. (Filipensis 4:8) Pa pudi konsentra nes kusas no pirsisa di kuji bon divirtimentu i kuji no amigus ku jiresa. (Ditus 13:20) Ke tambi ku pudi judanu i toma tempu pa pensa antis di no papia. Jubi kuma ku utrus na sinti ku palabras ku bu na papia. Biblia fala: “I ten utrus ku tene palabra suma ponta di spada, ma palabras di jiru ta da saudi.” — Ditus 12:18.
APRINDI MAS
Aprindi kuma ku bu pudi papia di un manera ku na kontenta Jeova i nkoraẑa utrus.
4. Kontrola ke ku bu na papia
Utrora, anos tudu no ta fala un kusa ku mas tardi no ta bin ripindi. (Tiagu 3:2) Lei Gálatas 5:22, 23, dipus bo kombersa aserka des purguntas:
Kal un des maneras di sedu ku bu pudi pidi na orason ku na judau kontrola bu manera di papia? Kuma ku es maneras di sedu pudi judau?
Lei 1 Koríntius 15:33, dipus bo kombersa aserka des purgunta:
Kuma ku amigus ku divirtimentu ku bu ta kuji pudi afeta bu manera di papia?
Kal kusas ku pudi afeta bu manera di papia?
Lei Eklesiastis 3:1, 7, dipus bo kombersa aserka des purgunta:
Kal mumentu ki bon kala, o pera un bon mumentu pa fala algun kusa?
5. Papia bon kusas aserka di utrus
Kuma ku no pudi ivita papia un kusa ku na de algin o un kusa ku ka bon? Mostra VIDEO, dipus bo kombersa aserka des purguntas:
Na video, pabia ku es ermon misti muda manera ki ta papia ku utrus?
Ke ki i fasi pa pudi muda?
Lei Eklesiastis 7:16, dipus bo kombersa aserka des purgunta:
Ke ku no dibi di lembra del ora ku no tentadu pa fala mau kusa na nomi di algin?
Lei Eklesiastis 7:21, 22, dipus bo kombersa aserka des purgunta:
Kuma ku es versikulu pudi judau ka raiba logu-logu ora ku algin papia mau kusa kontra bo?
6. Mostra bondadi ora ku bu na papia ku bu familia
Jeova misti pa no papia ku no familia ku bondadi i ku amor. Mostra VIDEO, dipus bo kombersa aserka des purgunta:
Ke ku pudi judau papia ku bu familia ku bondadi?
Lei Efésius 4:31, 32, dipus bo kombersa aserka des purgunta:
Kal tipu di kombersas ku ta fortalisi familia?
Jeova konta kuma ki ta sinti aserka di si Fiju Jesus. Lei Mateus 17:5, dipus bo kombersa aserka des purgunta:
Kuma ku bu pudi kopia Jeova na manera ku bu ta papia ku bu familia?
Buska opurtunidadi di ngaba utrus.
ALGUNS JINTIS TA FALA: “N na papia ke ku sta na ña korson. N ka mporta si utrus ka gosta di ke ku N fala.”
Bu konkorda ku es? Pabia ku bu konkorda, o pabia ku bu ka konkorda?
RUSUMU
Ke ku no na fala pudi juda algin o fasil sinti mal. No pirsisa di pensa diritu na ke ku no na fala, kal ora ku no na falal i kuma ku no na falal.
Rekapitulason
Di kal maneras ku bu pudi usa palabras pa juda utrus?
Kal tipu di palabras ku bu misti ivita?
Ke ku pudi judanu papia sempri ku bondadi i papia palabras ku na nkoraẑa?
TENE MAS INFORMASON
Aprindi ke ku pudi judau ivita usa mau palabras.
Jubi kuma ku bu pudi ivita kai na armadilia di sinta na nomi di utrus.
Jubi kuma ku Jeova juda un omi ku staba na sforsa pa para usa mau palabras.
“N staba na pensa ciu na nunde ku ña manera di vivi na leban nel” (Sintinela di 1 di agustu di 2013)