Tene Alegria na Pregason di Bon Noba

Bu ciga ja di oja kuma i difisil prega? Maioria di nos na ruspundiba sin pa es purgunta. Pabia? Talves no ta oja sempri apatia o opusison na no tiritoriu o no medi papia ku jintis ku no ka kunsi. Na bardadi es kusas pudi rapati no alegria. Ma, no ta adora Deus filis ku misti pa no sirbil ku alegria. (Sal 100:2; 1 Tim 1:11) Kal ki tris bon motivus di tene alegria na pregason?

Purmeru, no ta diklara mensaẑen di speransa. Apesar di kuma speransa sta na rapati na sosiedadi di aos, no pudi inci korson di jintis ku “bon notisias”. (Isa 52:7) Ma bon noba di Renu di Deus pudi tambi incinu di alegria. Antis di sai pregason, medita na bensons ku Renu di Deus na bin tisi na Tera.

Sugundu, bon noba ku no ta prega ta benefisia jintis di manera fisiku ku spiritual. E ta aprindi abandona pratikas ku ka bali i tene opurtunidadi di bin tene vida ku ka ta kaba. (Isa 48:17, 18; Rom 1:16) No pudi imaẑina suma si no sta na un tarbaju di buska jintis pa salva elis. Mesmu si alguns ka misti salva, no na kontinua buska kilis ku misti. — Mat 10:11-14.

Terseru, i mas importanti di tudu, no pregason ta onra Jeova. El i valorisa ciu no tarbaju di pregason. (Isa 43:10; Eb 6:10) Tambi, ku bondadi i danu si spiritu santu pa fasi es tarbaju. Asin, pidi Jeova pa i dau alegria, frutu di si spiritu santu. (Gal 5:22) Ku si ajuda no pudi vensi no preokupasons i prega ku koraẑen. (At 4:31) Asin, i ka mporta reason di jintis na no tiritoriu, no na tene alegria na no tarbaju di pregason. — Eze 3:3.

JUBI VIDEO RECUPERE A ALEGRIA POR MEIO DO ESTUDO E DA MEDITAÇÃO, I DIPUS RUSPUNDI ES PURGUNTAS:

• Ke ku manda no dibi di da prioridadi pa no abitus di studu, mesmu si no ta fasi manga di oras na pregason kada mis?

• Di kal manera ku no dibi di kopia izemplu di Maria?

• Kal ora ku bu ta tira tempu pa medita na Palabra di Deus?

• Ke ku ta dau alegria ora ku bu na prega bon noba?