Paulu ‘fala Deus obrigadu i fika animadu’

Oca ku kongregason na Roma obi kuma Paulu na bin, un delegason di irmons viaẑa serka di 64 kilometru pa bai dal kontrada. Kuma ku se spiritu di sakrifisiu afeta Paulu? “Oca ku Paulu oja elis, i fala Deus obrigadu, i fika animadu.” (At 28:15) Apesar di kuma Paulu kunsidu suma algin ku ta fortalisi kongregasons ki ta visita, es bias oca ki sedu prisioneru, i el ku risibi nkoraẑamentu. — 2 Kor 13:10.

Aos superintendentis di sirkuitu ta viaẑa di kongregason pa kongregason pa fortalisi irmons ku irmas. Suma tudu utrus servus di Deus, utru ora e ta sinti kansadu, preokupadu i disanimadu. Prosimu bias ku superintendenti di sirkuitu ku si minjer na visita bu kongregason, ke ku bu pudi fasi pa juda elis fika animadu, pa bo pudi “fortifika n̈utru”? — Rom 1:11, 12.

• 

  Apoia runion di saidas pa pregason. Superintendenti di sirkuitu ta fika animadu ora ku publikaduris fasi sakrifisius pa benefisia kompletamenti di atividadis di semana spesial. (1 Tes 1:2, 3; 2:20) Pensa na toma sirvisu di pioneru auŝiliar na mis di si visita. Sera ki bu pudi sai pregason ku el o ku si minjer o pa un delis kumpañau diriẑi un studu bibliku? E ta kontenti tarbaja ku diferentis publikaduris, nkluindu kilis ki nobu o ku tene puku spiriensia na pregason.

• 

  Sedu ospitaleru. Sera ki bu pudi risibi elis na bu kau o oferesi elis kumida? Kila ta mostra superintendenti di sirkuitu ku si minjer di kuma bu ama elis. E ka na spera kusas spesial. — Luk 10:38-42.

• 

  Obi i aplika si orientasons ku konsijus. Superintendenti di sirkuitu ta judanu ku amor oja kuma ku no pudi minjoria no sirvisu pa Jeova. Utru ora, i pudi ten nesesidadi di da un konsiju forti. (1 Kor 5:1-5) I ta kontenti ora ku no obdisi i no suẑeta. — Eb 13:17.

• 

  Mostra apresu. Konta superintendenti di sirkuitu ku si minjer kuma ku se sforsu ta benefisiau. Bu pudi falal pesualmenti o atraves di un nota o un karta. — Kol 3:15.