Ba kin ki bu amigus na internet?

Difinison ku dadu pa un amigu i “un algin ku sta ligadu ku utru pa amor o apresu.” Pur isemplu, Jonatas ku Davi kumsa un amisadi forti dimas, dipus ku Davi mata Golias. (1 Sam 18:1) Kada un delis mostra kualidadis ku pui kil utru misti sedu si amigu. Asin, un amisadi forti ta basia na kunsimentu izatu. Normalmenti, pa kunsi utru algin, i pirsis tempu ku sforsu. Ma, na redis sosial, jintis pudi sedu “amigus” basta so e toka na boton. Suma jintis na internet ta konsigi fasi planu di ke ke na fala, i e ta tene algun kontrolu di ke ki utrus na pensa delis, asin i fasil pa e sukundi kin na bardadi ke sedu. Ma, i bon pa bu pensa diritu, kal tipu di jintis ku bu na seta pa e sedu bu amigu. Ka bu medi nega pididus di amisadi di jintis ku na bardadi bu ka kunsi, ku medu di kuma bu na pui elis pa e sinti mal. Pabia des pirigus ku pudi ojadu, i ten kilis ku disidi ka usa redis sosial. Ma, si bu disidi usa redis sosial, ke ku bu dibi di lembra del?

JUBI VIDEO USA REDI SOSIAL KU JIRESA, I DIPUS RUSPUNDI ES PURGUNTAS:

• 

  Ke ku bu dibi di pensa nel, antis di pui kumentarius ku fotos?

• 

  Ke ku manda bu dibi di kuji diritu bu amigus na internet?

• 

  Ke ku manda bu dibi di pui limiti na tempu ku bu na gasta na redi sosial? — Ef 5:15, 16.