Kampaña spesial pa kumsa studus di Biblia na Setembru

Na mis di Setembru no na fasi sforsu garandi pa kumsa studu di Biblia ku tudu jintis ku broŝura Bu Pudi Tene un Vida Filis pa Sempri!. Publikaduris pudi disidi sedu pioneru ausiliar i fasi 30 ora. Kuma ku no na fasi es kampaña spesial?

• Na purmeru kontaktu: Usa parti di tras di broŝura pa juda si dunu mostra interes, i tenta mostra kuma ku un studu di Biblia ta fasidu. Lembra di kilis ku mostraba interes, entri elis kilis ku bu ta revisita. Mesmu se negaba studa, e pudi sta nteresadu na broŝura i na no nobu manera di studa ku jintis. Broŝuras ka dibi di disadu na kau di jintis ku bu ka oja, nin i ka dibi di mandadu juntu ku kartas pa kilis ku ka mostraba interes. Kumison di Sirvisu di Kongregason pudi fasi aranẑu pa i ten mas runion pa pregason duranti ki mis.

• Utrus opurtunidadis: Si bo kongregason ta usa mostruariu, bo pui broŝura Bu Pudi Tene un Vida Filis pa Sempri! na mostruariu. Konta kilis ku mostra interes di kuma si e toma broŝura, e pudi tambi tene studu di Biblia sin paga nada. Na mumentu ku bo na kombersa, mostral di un manera brevi kuma ku studu ta fasidu, o bo pudi fasil mas tardi. Superintendenti di sirvisu pudi fasi aranẑu pa publikaduris kualifikadu bai pa tiritoriu komersial i kumsa studus di Biblia. Bu pudi tambi kumsa studu di Biblia ku bu kolegas di tarbaju, o ku jintis ku bu kontra ku el ora ku bu na da tustumuñu informal.

Jesus mandanu pa ‘fasi disipulus’ i “nsina elis”. (Mat 28:19, 20) Pa es kampaña spesial judanu kumpri es objetivu, ku broŝura Bu Pudi Tene un Vida Filis pa Sempri!