NO VIDA KRISTON
Purpara desdi gosi pa un emerẑensia mediku
Pabia ku bu dibi di purpara? Emerẑensia mediku i baŝa na ospital pudi kontisi di repenti. Ma, fasi tudu ku bu pudi pa risibi ajuda ku sta dispunivel, asin bu na risibi minjor tratamentu mediku ku ten, si bu bin sta na emerẑensia. Si bu fasi asin, bu na mostra rispitu pa vida i pa lei di Jeova aserka di sangi. — At 15:28, 29.
Ke ku bu pudi fasi pa purpara?
Bas di orason prenŝi ku kuidadu karton Diretiva Antecipada de Vontade e Procuração Relativas a Cuidados de Saúde (DPA).a Publikaduris ku batisa pudi pidi DPA na mon di ermon ku ta kuida di publikasons. E pudi tambi pidi Cartão de Identificação (ic) pa se fijus pikininu.
Si bu preña, pidi ansions Informação para Grávidas (S-401). Es dukumentu na judau toma bon disison aserka di purblemas di saudi ku pudi parsi ora ku bu preña i na ora di padi.
Si bu pirsisa di tratamentu mediku ku nvolvi asuntu di sangi o baŝa na ospital, fasi pa bu ansions sibi antis i informa ospital di kuma bu misti risibi visita di un Tustumuña di Jeova.
Kuma ku ansions pudi juda? E pudi judau prenŝi bu karton DPA. Ma, ansions ka na toma disions aserka di saudi pa bo, o da se propi opinion na asuntus ku kada kin dibi di disidi. (Rom 14:12; Gal 6:5) Ora ku bu konta ansions di bu kongregason di kuma bu tene purblema di saudi ku pudi nvolvi sangi, e na kontakta logu Kumison di Ligason ku Ospital (KLO) pa judau.
Kuma ku Kumison di Ligason ku Ospital pudi judau? Ermons ku ta tarbaja na Kumison di Ligason ku Ospital trenadu pa juda kilis ku sta na arias di saudi ku arias ligadu ku lei, pa e ntindi no pusison riliẑiosu aserka di sangi. E pudi kombersa ku mediku ku na kuida di bu saudi, aserka di diferentis tratamentu mediku pa ivita transfuson di sangi. Si pusivel e pudi judau oja un mediku ku na rispita bu pusison aserka di sangi.
JUBI VIDEO KUMA KU BU PUDI TOMA DISISON DI TRATAMENTU DI SAUDI KU NA NVOLVI SANGI, I DIPUS RUSPUNDI ES PURGUNTA:
Ke ku bu aprindi nes video ku pudi judau purpara pa un emerẑensia mediku ku nvolvi sangi?
a Lison 39 di livru Bu Pudi Tene un Vida Filis pa Sempri! pudi judau toma disison aserka di tratamentu ku ta nvolvi usa sangi.