‘Kontinua yanda na bardadi’

1. Kal benefisiu ku no ta tene, ora ku no konta utrus kuma ku no kunsi “bardadi”?

“KUMA ku bu kunsi bardadi?” Sin duvida, bu ruspundi ja es purgunta manga di bias. Es i un di purmeru purguntas ku no ta fasi no ermon o irma, ora ku no misti kunsil minjor. No ta gosta di obi kuma ku no ermons ku irmas kunsi Jeova i amal, i no ta kontenti di konta elis pabia ku no gosta di sedu Tustumuña di Jeova. (Rom 1:11) Es kombersas ta lembrantanu balur ku bardadi tene na no vida. Tambi no ta sta inda mas disidu pa ‘kontinua yanda na bardadi’, es signifika, kontinua vivi di un manera ku na pirmitinu tene benson ku fabur di Jeova. — 3 Jon 4.

2. Ke ku no na fala del ne studu?

² Ne studu, no na fala di alguns kusas ku pui no gosta ciu di bardadi. Dipus no na bin fala, di kuma ku no pudi kontinua mostra di kuma, no gosta ciu des prenda ku tene balur garandi. Sin duvida, es studu na judanu da inda mas balur pa ke ku Jeova fasi pa tisinu pa bardadi. (Jon 6:44) Tambi i na fortalisi no diseẑu di konta utrus bardadi ku sta na Biblia.

PABIA KU NO GOSTA CIU DI “BARDADI”

3. Ke ku pui no mas gosta di bardadi?

³ I ten manga di motivus ku pui no gosta di bardadi. Mas importanti i pabia no ama Jeova, ki Dunu di bardadi. Si Palabra Biblia, judanu kunsil, i ka so suma algin ku tene tudu puder ku kumpu seu ku tera, ma tambi suma no Pape ku sta na seu ku amanu i ku ta toma konta di nos. (1 Ped 5:7) No sibi kuma no tene un Deus ku “ten miserikordia, ku ta sinti pena, ku ta tarda pa paña raiba, ku ta mostra garandi amor, ku ta sedu bardadi.” (Sai 34:6) Jeova ama justisa. (Isa 61:8) I ta sinti mal ora ki oja no na sufri, tambi i sta pruntu i tene vontadi garandi pa kaba ku tudu sufrimentu na tempu ki marka. (Jer 29:11) No sta tambi na pera ki dia garandi! Es i un di kusas ku pui no ama Jeova ciu dimas!

4-5. Pabia ku apostolu Paulu kompara no speransa ku feru di fundia?

⁴ Kal utru kusa ku pui no gosta ciu di bardadi? I ten manga di benefisiu ora ku no kunsi bardadi. No jubi un isemplu. No speransa pa futuru fasi parti di bardadi ku sta na Biblia. Pa mostra balur ke speransa tene, apostolu Paulu fala sin: “No ten e speransa suma feru di fundia ku ta sugura no alma firmi.” (Eb 6:19) Suma ku un feru di fundia ta tuji un barku sai nunde ki sta, no speransa ku sta na Biblia pudi judanu manti kalmu ora ku no tene purblemas.

⁵ Nes kontestu, Paulu staba na fala di speransa ku kristons unjidu tene di bai vivi na seu. Es speransa tene balur garandi pa relis. Ma, es palabras ta aplika tambi pa kristons ku tene speransa di vivi pa sempri na paraísu li na Tera. (Jon 3:16) Na bardadi, aprindi aserka di speransa di vivi pa sempri fasi pa no vida tene sintidu.

6-7. Kuma ku aprindi bardadi aserka di futuru juda Yvonne?

⁶ Jubi spiriensia di un irma comadu Yvonne. I ka kirsi na bardadi, i ocal pikininu i teneba medu di muri. I lembra di un frasi ki lei ki ka pudi diskisi: “Un dia, amaña ka na ten mas.” I fala sin: “Es palabras ta tujinba durmi di noti, N ta fikaba N na pensa so na futuru. N ta falaba ña kabesa: ‘Na bardadi no ka dibi di vivi so pa puku tempu. Ke ku manda N sta na vivi?’ N ka mistiba muri!”

⁷ Mas tardi, ocal adolesenti, Yvonne kontra ku Tustumuñas di Jeova. I fala sin: “N kumsa na fia di kuma, N pudi tene speransa di vivi pa sempri na paraísu na Tera.” Kuma ku aprindi bardadi juda no irma? I fala: “Gosi N ka ta fika di noti sin durmi, so na pensa na futuru o na mortu.” Suma ku bu nota, Yvonne gosta ciu di bardadi di Biblia, i ta tene kontentamentu garandi di konta utrus si speransa pa futuru. — 1 Tim 4:16.

8-9. (a) Na un di komparasons di Jesus, kuma ku un omi da balur garandi pa rikesa ki oja? (b) Kal balur ku bardadi tene pa bo?

⁸ Bardadi di Biblia tene tambi bon noba aserka di Renu di Deus. Jesus kompara bardadi aserka di Renu ku un rikesa sukundidu. Na Mateus 13:44, Jesus fala sin: “Renu di seu i suma un rikesa sukundidu na lugar di algin. Un omi bin diskubril, i torna sukundil mas. I bai ku kontentamentu, i bindi tudu kil ki tene, i bai kumpra ki lugar.” Si bu nota, omi ka staba na buska rikesa. Ma, oca i ojal i fasi sakrifisiu garandi pa pudi tenel. I bindi tudu ke ki i tene. Pabia ki fasi kila? Pabia i sibi kuma rikesa ki oja, tene balur garandi. I tene mas balur di ki kualker kusa ki dibi di disa.

⁹ Sera ki i asin ku bu ta oja bardadi? Sin duvida, i asin ku bu ta ojal! No sibi kuma, nada nes mundu ka pudi komparadu ku kontentamentu ku no tene di sirbi Jeova gosi, ku speransa di bin vivi pa sempri bas di Renu di Deus. Privileẑiu di tene amisadi intimu ku Jeova mas kualker sakrifisiu ku no dibi di fasi. No kontentamentu mas garandi i ‘pa i kontenti ku nos na tudu.’ — Kol 1:10.

10-11. Ke ku leba Michael fasi mudansa garandi na si vida?

¹⁰ Manga delis entri nos, fasi sakrifisiu garandi pa pudi tene fabur di Jeova. I ten kilis ku disa profisons garandi na mundu. Utrus para buska rikesa. I ten inda utrus ku muda se vida di un manera kompletu, oca e aprindi aserka di Jeova. I es ku Michael fasi. I ka kirsi na bardadi. Ocalba joven i trena karate. I fala sin: “I seduba importanti dimas pa N manti bon forma di kurpu. Utrora, N ta pensa kuma ningin ka pudi ku mi.” Ma, oca ku Michael kumsa studa Biblia i aprindi ke ku Jeova pensa aserka di violensia. (Sal 11:5) Michael fala sin aserka di kasal Tustumuña di Jeova ku studa Biblia kel: “Nunka e falan pa N para karate; e kontinua so studa Biblia ku mi.”

¹¹ Nkuantu Michael staba na aprindi mas aserka di Jeova, mas si amor pa rel aumenta. Kusa ku mas tokal i manera ku Jeova ta sinti pena di si servus. Ku tempu, Michael nota di kuma i pirsisa di toma un disison ku na muda si vida. I fala sin: “N sibi kuma para karate na sedu un kusa mas difisil ku N ciga di fasi. Ma, N sibi tambi di kuma N na kontenta Jeova, i N sta konvensidu di kuma sirbi Jeova mas kualker sakrifisiu.” Michael sibiba kuma, bardadi ki oja tene balur garandi, e ku manda i staba dispostu pa fasi mudansas garandi na si vida. — Tiagu 1:25.

12-13. Kuma ku bardadi di Biblia juda Mayli?

¹² Pa mostra balur ku bardadi tene, Biblia komparal ku un lampada ku na numia na sukuru. (Sal 119:105; Ef 5:8) Mayli, di Azerbaijon, da balur garandi pa ajuda ki risibi di Palabra di Deus. Si papes i ka di mesmu riliẑion. Si pape i musulmanu i si mame i judeu. I fala sin: “Nunka N teneba duvida di kuma Deus ten, ma mesmu asin, N teneba manga di purguntas. N ta puntaba ña kabesa: ‘Ke ku manda Deus kumpu pekaduris, i ke ku manda un algin ta sufri tudu si vida, dipus i ta bai kastigadu mas na infernu pa sempri?’ Suma jintis ta fala kuma tudu kusa ku ta kontisi i distinu di Deus, N ta punta ña kabesa: ‘Sera ki Deus ta kontrola pekaduris, dipus i ta kontenti di oja elis na sufri?’”

¹³ Mayli kontinua buska respostas di si purguntas. Ku tempu, i seta studa Biblia, dipus i bin sedu Tustumuña di Jeova. I fala sin: “Kusas klaru ku Biblia ta fala i ku ta konvensi, judan pa N sedu un algin mas filis. Splikasons di konfiansa ku sta na Biblia judan pa N tene susegu.” Suma Mayli, anos tudu no ta ngaba Jeova, ‘kil ku comanu na sukuru pa si lus bonitu.’ — 1 Ped 2:9.

14. Kuma ku no pudi torna no amor pa bardadi mas forti? (Jubi tambi kuadru “Utrus komparasons.”)

¹⁴ Es i so alguns isemplus ku ta mostra balur di bardadi. Sin duvida, bu pudi pensa na manga di utrus isemplus. Pabia ku bu ka na fasi es suma asuntu di studu pesual, pa diskubri utrus motivus ku manda no dibi di gosta di bardadi? Fasi es na judanu aumenta no amor pa bardadi. Mas no gosta di bardadi, mas no na buska manera di mostra kuma no gosta del.

KUMA KU NO TA MOSTRA DI KUMA NO GOSTA CIU DI BARDADI

15. Di kal manera ku no pudi mostra di kuma no gosta ciu di bardadi?

¹⁵ No pudi mostra kuma no gosta ciu di bardadi, ora ku no ta studa sempri Biblia ku publikasons basiadu na Biblia. Na bardadi, mesmu si no sta na sirbi Jeova pa manga tempu, sempri no tene manga di kusas pa aprindi. Purmeru numeru des rivista fala sin: “I ten manga di mintida nes mundu, kila ta pui pa i difisil rapada bardadi. Si bu misti ojal, bu dibi di sta sempri atentu. . . . Si bu misti tenel bu dibi di fasi sforsu. Ka bu fika kontenti so ku un bardadi ku bu oja. . . . Sforsa sempri na buska mas bardadis ku sta na Biblia.” Studa ta iziẑi sforsu garandi, ma i sforsu ku bali pena.

16. Kal metudu di studu ku bu pensa i mas minjor? (Ditus 2:4-6)

¹⁶ I ka tudu jintis ku gosta di lei i studa. Ma Jeova kumbidanu pa no ‘kontinua buska’ ntindi bardadi diritu. (Lei Ditus 2:4-6.) Ora ku no fasi kila, no ta benefisia sempri. Aserka di si leitura di Biblia, Corey fala kuma, kada bias ki na lei, i ta konsentra na un versikulu. I fala sin: “N ta lei tudu notas, N ta jubi tudu referensas marẑinal, tambi N ta fasi utrus piskisa. . . . Es metudu judan aprindi manga di kusas!” Si no usa es metudu o utru, tambi no ranja tempu i no sforsa pa studa, no ta mostra di kuma no da balur pa bardadi. — Sal 1:1-3.

17. Ke ku signifika vivi bardadi? (Tiagu 1:25)

¹⁷ No sibi kuma i ka basta so studa bardadi. Pa tene manga di benefisiu, no dibi di vivi bardadi, es misti fala, no dibi di aplika ke ku no aprindi na no vida. I so asin ku bardadi na danu filisidadi di bardadi. (Lei Tiagu 1:25.) Kuma ku no pudi tene sertesa di kuma no sta na vivi bardadi? Un ermon fala kuma i pirsis pa no jubi si kontra no sta na aplika ke ku no aprindi, i jubi tambi na kal aria ku no pirsisa di minjoria. Apostolu Paulu fala sin: “Konformi lugar ku no yangasa na vida spiritual, no bai pa dianti.” — Fil 3:16.

18. Ke ku manda no dibi di fasi no minjor pa ‘kontinua yanda na bardadi’?

¹⁸ Pensa so na benefisius ku no ta tene, si no fasi no minjor pa ‘kontinua yanda na bardadi’! No ka ta minjoria so kualidadi di no vida, ma tambi no ta kontenta Jeova ku no ermons na fe. (Dit 27:11; 3 Jon 4) Es i motivus mas garandi ku pui no gosta ciu di bardadi i vivi bardadi!