Povu di Jeova ama justisa

1. Kal situason difisil ku José nfrenta i kuma ki reaẑi?

JOSÉ fiju di Jakó nfrenta un situason difisil. Minjer di si patron comadu Potifar falal: “Bin dita ku mi”. José nega. Algin pudi punta: ‘Pabia ku José nega dita ku el?’ Potifar ka staba la. Alen di kila, José seduba skravu na kasa; es minjer pudiba torna si vida difisil si nega si pididu. Ma mesmu asin, José kontinua nega oca i na nsisti kada dia pa i dita ku el. Pabia di ke? I fala: “Kuma ku N na fasi e mal garandi, N peka kontra Deus?” — Kum 39:7-12.

2. Kuma ku José sibiba kuma dita ku minjer di utru i un pekadu kontra Deus?

² Kuma ku José sibiba di kuma dita ku minjer di utru i “mal garandi” pa si Deus? So serka di 200 anu mas tardi ku Israelitas risibi Lei di Moisés ku fala: “Ka bu dita ku algin ku bu ka kasa ku el”. (Sai 20:14) Mesmu asin, José kunsiba Jeova diritu, te na puntu di sibi kuma ku Jeova ta sinti aserka di dita ku algin ku bu ka kasa ku el. Pur isemplu, José sibiba diritu di kuma Jeova fasi pa kasamenti sedu entri un omi ku un minjer. I pudi sedu kuma i obi kuma ku Jeova proteẑi si tuturdona Sara dus bias, pa i pudi manti fiel pa si omi. Deus fasi mesmu kusa pa proteẑi Rebeka, minjer di Isaki. (Kum 2:24; 12:14-20; 20:2-7; 26:6-11) Oca José pensa nes kusas, i ntindi logu ke ki bon i ke ki mau na uju di Deus. Suma José ama Jeova, i staba disididu pa fasi ke ki sibi di kuma Jeova misti pa i fasi.

3. Ke ku no na fala del ne studu?

³ Sera ki bu ama justisa? Sin duvida bu amal. Ma, anos tudu i imperfeitu, i si no ka toma kuidadu, manera ku mundu ta oja justisa pudi afetanu sin no da konta. (Isa 5:20; Rom 12:2) Pa kila, no na oja ke ki justisa, i kuma ku no vida na minjoria ora ku no amal. Dipus no na bin fala di tris kusas ku no pudi fasi, ku na judanu fortalisi no amor pa normas di Jeova.

KE KI JUSTISA?

4. Kal ideia eradu ku manga di jintis tene aserka di justisa?

⁴ Jintis ta pensa kuma algin justu i algin orgulyosu, ku ta kritika utrus o ku ta pensa kuma i minjor di ki utrus. Ma Deus ka gosta nin un boka des manera di sedu. Oca Jesus staba na Tera, i kritika risu ŝefis riliẑiosu di si tempu pa manera ke ta kria se propi normas di justisa. (Ekl 7:16; Luk 16:15) Un algin ku ta fasi ke ku Jeova fala i sertu, nunka i ka ta pensa kuma i minjor di ki utrus jinti.

5. Di akordu ku Biblia, ke ki justisa? Da isemplus.

⁵ Justisa i un kualidadi bonitu. Na utrus palabras, i signifika fasi ke ki sertu na ujus di Jeova Deus. Na Biblia, palabra justisa ta transmiti ideia di vivi di akordu ku normas garandi di Jeova. Pur isemplu, Jeova fala kuma komersiantis dibi di tene “mididas justu.” (Lei 25:15) Asin, un kriston ku misti sedu justu na ujus di Deus, dibi di sedu onestu na tudu si nogos ki na fasi. Un algin ku ama fasi ke ki sertu ta odia oja un algin na tratadu mal. Pa ‘pudi kontenta Jeova na tudu’, un algin ku na bardadi sedu justu ta pensa na kuma ku Jeova na oja disisons ki na toma. — Kol. 1:10.

6. Ke ku manda no pudi tene konfiansa na normas di Jeova aserka di ke ki sertu ku ke ki eradu? (Isaias 55:8, 9)

⁶ Biblia fala di Jeova suma Dunu di justisa. Pabia di kila, i comadu di “Morada justu.” (Jer 50:7) Suma Kriadur, Jeova i uniku ku tene diritu di disidi ke ki sertu ku ke ki eradu. Suma anos i mperfeitu, no ka pudi sibi ke ki sertu ku ke ki eradu. Ma Jeova i perfeitu, i sibi diritu ke ki sertu ku ke ki eradu. (Dit 14:12; lei Isaias 55:8, 9.) Ma, suma Deus kumpunu suma el, no tene kapasidadi di fasi ke ki fala i sertu. (Kum 1:27) No gosta di fasi ke ku Deus fala i sertu. Amor ku no tene pa no Pape ta motivanu fasi no minjor pa kopial. — Ef 5:1.

7. Ke ku manda no pirsisa di normas di konfiansa? Bu pudi da isemplu.

⁷ No ta benefisia ora ku no na sigi normas di Jeova aserka di ke ki sertu ku ke ki eradu. Sera ki bu sibi i pabia di ke? Imaẑina ke ku na kontisi si kontra kada banku tene si propi normas di konta kal ki balur di diñeru, o si kontra kada impresa di konstruson ta sigi se propi normas di mididas. Es na sedu konfuson garandi. Si medikus ku nfurmerus ka ta sigi sertus regras ora ke na trata jintis, kila pudi mata alguns duentis. Sin duvida, ora ku jintis na sigi normas ku pudu na manera di fasi kusas, kila ta sedu di proteson. Di mesmu manera, normas di Deus aserka di ke ki sertu ku ke ki eradu ta proteẑinu.

8. Kal bensons ku kilis ku ama fasi ke ki sertu na tene?

⁸ Jeova ta bensua kilis ku ta sforsa pa vivi sugundu si normas. I purmiti kuma: “Justus na yarda ki tera, e na mora nel pa sempri.” (Sal 37:29) Imaẑina union, pas ku filisidadi ku na ten, ora ku tudu jintis na vivi di akordu ku normas di Jeova? Jeova misti pa no tene es tipu di vida. Sin duvida, anos tudu no tene bon motivus di ama justisa! Kuma ku no pudi fortalisi no amor pa justisa? No na jubi tris kusas ku no pudi fasi.

FORTALISI BU AMOR PA NORMAS DI JEOVA

9. Ke ku na judanu ama justisa?

⁹ Purmeru kusa: Ama Algin ku pui normas. Pa pudi ama justisa, no dibi di aumenta no amor pa Jeova, Algin ku pui normas di ke ki sertu ku ke ki eradu. Mas no ama Jeova, mas no na misti vivi di akordu ku si normas justu. Pur isemplu, si Adon ku Eva amaba Jeova, e na obdisilba. — Kum 3:1-6, 16-19.

10. Ke ku Abraon fasi pa pudi ntindi diritu pensamentu di Jeova?

¹⁰ Ku sertesa no ka misti fasi mesmu eru ku Adon ku Eva fasi. No pudi ivita se eru si no kontinua aprindi aserka di Jeova, da balur pa si manera di sedu i sforsa na ntindi si manera di pensa. Si no fasi kila, no amor pa Jeova na aumenta. Jubi isemplu di Abraon. I gosta ciu di Jeova. Mesmu oca i seduba difisil pa i ntindi disison di Jeova, Abraon ka rebela. En ves di kila, i tenta kunsi Jeova minjor. Pur isemplu, oca i obi kuma Jeova disidi kaba ku Sodoma i ku Gomora, na kumsada Abraon staba ku medu si kontra, “Juis di tudu mundu” na mata jintis justus juntu ku jintis mau. Kila ka fasiba sintidu pa Abraon, pa kila i fasi Jeova manga di purguntas. Jeova ruspundil ku pasensa. Pa fin, Abraon kaba pa ntindi di kuma Jeova ta jubi korson di kada pekadur i nunka i ka na kastiga inosentis juntu ku kulpadus. — Kum 18:20-32.

11. Kuma ku Abraon mostra di kuma i ama Jeova i konfia nel?

¹¹ Kombersa ku Abraon teneba ku Jeova aserka di sidadi di Sodoma ku Gomora tokalba ciu. Sin duvida, i pasa ama i rispita si Pape mas di ki antis. Ma anus mas tardi, konfiansa ku Abraon tene na Jeova testadu ciu. Jeova pidil pa i mata si fiju Isaki ki gosta ciu del. Ma suma Abraon kunsi ja si Deus diritu, es bias i ka fasil purguntas. Abraon fasi so ke ku Jeova pidil pa i fasi. Mesmu asin, imaẑina dur ki tene na korson oca ki na purpara pa fasi ke ku Jeova pidil! Abraon dibi di pensaba ciu na kusas ki aprindi di Jeova. I sibiba kuma Jeova nunka ka na ciga di fasi un kusa injustu o sin amor. Suma ku Paulu fala, Abraon ntindi di kuma Jeova pudi lantanda Isaki, si fiju ki gosta ciu del. (Eb 11:17-19) Alen des, Jeova purmiti di kuma, Isaki na sedu pape di un nason, ma na ki mumentu Isaki ka teneba inda fiju. Abraon amaba Jeova, pa kila i teneba konfiansa di kuma, si Pape na fasi sempri ke ki sertu. Mesmu pa manera ki seduba difisil, fe pul pa i obdisi. — Kum 22:1-12.

12. Kuma ku no pudi kopia Abraon? (Salmu 73:28)

¹² Kuma ku no pudi kopia Abraon? Suma el, i pirsis pa no kontinua aprindi aserka di Jeova. Si no fasil, no na pertusi mas del i no amor pa rel na aumenta inda mas. (Lei Salmu 73:28.) No konsiensia na trenadu, asin i na nfluensiadu pa pensamentu di Jeova. (Eb 5:14) Asin, ora ku un algin tentanu pa no fasi un kusa ki mau, no na nega. No ka na ciga nunka di pensa fasi kualker kusa ku na pui no Pape fika mal, o ku na dana no amisadi ku el. Kal utru kusa ku no pudi fasi pa mostra di kuma no ama justisa?

13. Kuma ku no pudi buska justisa? (Ditus 15:9)

¹³ Sugundu kusa: Sforsa na aumenta amor pa justisa kada dia. Si no misti pa no muskulu torna forti, no dibi di sforsa ciu pa fasi izersisiu kada dia. Di mesmu manera, no pirsisa tambi di fasi sforsu garandi pa ama ke ki Jeova fala i sertu. Es i un kusa ku no pudi fasi kada dia. Jeova i razuavel, nunka i ka ta pera pa no fasi mas di ke ku no pudi fasi. (Sal 103:14) I danu garantia di kuma “i ta ama kil ku na yanda diritu.” (Lei Ditus 15:9.) Si no sta na buska yangasa un objetivu na sirvisu di Jeova, no ta kontinua fasi sforsu pa yangasal. I mesmu ku ta kontisi ora ku no na buska justisa. Ku pasensa, Jeova na judanu fasi progresu pa no minjoria puku-puku. — Sal 84:5, 7.

14. Ke ki “armadura di pitu,” i pabia ku no pirsisa del?

¹⁴ Ku amor Jeova lembrantanu di kuma, fasi ke ki sertu i ka difisil. (1 Jon 5:3) En ves di kila, i ta proteẑinu, kusa ku no prisisa del kada dia. Lembra di armadura spiritual ku Paulu fala del. (Ef 6:14-18) Kal parti ku ta proteẑi korson di soldadu? I “armadura di pitu,” ku ta representa disisons di Jeova aserka di ke ki sertu. Suma ku un armadura di pitu ta proteẑi korson di un algin, asin tambi ku disisons di Jeova aserka di ke ki sertu pudi proteẑi no korson simboliku, suma no diseẑus, emosons ku pensamentus. E ku manda i importanti pa bu armadura spiritual tene armadura di pitu! — Dit 4:23.

15. Kuma ku bu pudi bisti armadura di pitu?

¹⁵ Kuma ku bu pudi bisti armadura di pitu? Bu pudi fasil ora ku bu na pensa aserka di ke ku Deus misti pa bu fasi, ora ku bu na toma disisons kada dia. Ora ku bu na disidi aserka di ke ku bu na papia del, kal musika ku bu na obi, kal kusas ku bu na jubi, o kal livrus ku bu na lei, purmeru punta bu kabesa: ‘Ke ku N sta na pui na ña korson? Sera ki Jeova gosta des kusas? O sera ki i ta nsentiva imoralidadi, violensia, diseẑu di misti mas, pensa so na no kabesa — kusas ku Jeova fala i ka bali?’ (Fil 4:8) Si bu disidi fasi kusas ki sertu na ujus di Jeova, bu na proteẑi bu korson di mau nfluensia.

16-17. Kuma ku Isaias 48:18 garantinu di kuma no pudi vivi sugundu normas di Jeova pa sempri?

¹⁶ Sera ki bu ciga di punta si kontra bu pudi kontinua vivi sugundu normas di Jeova kada dia, i kada anu? Jubi un isemplu ku Jeova da ku sta na Isaias 48:18. (Lei.) Jeova purmiti di kuma, no justisa “na sedu suma ondas di mar.” Imaẑina kuma bu firma na praia di un mar garandi, bu na jubi ondas ku na bin tras di n̈utru sin para. Sera ki bu na preokupa di kuma, nes kau kalmu, es ondas na dati so e para? Nau! Bu sibi di kuma es ondas ta bati na praia pa manga di anus, i sin duvida, e na kontinua bin.

¹⁷ Bu justisa pudi sedu suma ondas di mar! Kuma kes pudi sedu? Ora ku bu tene disison pa toma, purmeru jubi ke ku Jeova misti pa bu fasi. Dipus, fasil. Nin si kontra disison sedu difisil dimas pa toma, bu Pape ku amau ciu sta la pa dau forsa i judau kontinua fasi ke ki sertu kada dia. — Isa 40:29-31.

18. Ke ku manda no dibi di ivita julga utrus di akordu ku no normas?

¹⁸ Terseru kusa: Disa julgamentu na mon di Jeova. Nkuantu no sta na sforsa ciu pa fasi tudu ke ku Jeova misti pa no fasi, no ka dibi di kompara ke ku no ta fasi ku utrus, i pensa di kuma no sedu minjor di ki elis. No ka tene diritu di disidi si kontra utrus sta na fasi ke ku Jeova misti pa e fasi. No dibi di lembra di kuma Jeova i “Juis di tudu mundu”. (Kum 18:25) Jeova ka danu diritu di julga. Na bardadi, Jesus da es ordi: ‘Bo para julga pa ka bo julgadu.’ — Mat 7:1.b

19. Kuma ku José mostra di kuma i konfia na julgamentu di Jeova?

¹⁹ No jubi mas isemplu di José, un omi justu. Mesmu oca i tratadu mal, i ivita julga utrus. Si propi ermons lanta kontra el, e bindil suma skravu, i e konvensi se pape di kuma José muri. Anus mas tardi, José sta mas juntu ku si familia. Gosi suma guvernanti ku tene puder, José pudiba julga si ermons di un manera duru i vinga elis. Ermons di José mediba kuma i na fasi kila, mesmu pa manera ke ripindiba ciu pa ke ke fasi. Ma José da elis es garantia: “Ka bo medi. N ta ami N sta na lugar di Deus?” (Kum 37:18-20, 27, 28, 31-35; 50:15-21) Ku umildadi, José disa julgamentu na mon di Jeova.

20-21. Kuma ku no pudi ivita pensa di kuma no sedu minjor di ki utrus?

²⁰ Suma José, no ta disa julgamentu na mon di Jeova. Pur isemplu, no ka na tenta sibi ke ku leba no ermons ku irmas fasi un kusa. No ka pudi lei korsons; so Jeova ku pudi jubi “motivus”. (Dit 16:2) I ama tudu tipu di jintis, di diferenti formason ku kultura. Jeova nkoraẑanu pa no ‘yabri no korson diritu.’ (2 Kor 6:13) No ta sforsa pa ama tudu no ermons ku irmas, no ka ta julga elis.

²¹ Es tambi signifika di kuma no ka dibi di julga kilis ku ka fasi parti di kongregason. (1 Tim 2:3, 4) Sera ki bu ciga di julga un di bu familia ku ka ta sirbi Jeova, i fala sin: “Es algin nunka ka na ciga di bin pa bardadi”? Nau, bu ka na fala kila. Fala es i arogansia, bu sta na mostra di kuma bu sedu minjor di ki el. Jeova kontinua da jintis “na tudu lugar” oportunidadi pa e ripindi. (Atus 17:30) Lembra sempri di kuma, Jeova ta oja kilis ku ta pensa di kuma e sedu mas justu di ki utrus suma injustus.

22. Pabia ku bu disidi ama justisa?

²² No amor pa ke ku Jeova fala i sertu na fasinu pa no sedu filis, i judanu sedu un bon isemplu pa utrus, asin amor ke tene pa nos na aumenta, i e na ama inda mas no Deus. Pa ka no para nunka tene “fomi cu sede di justiça.” (Mat 5:6, NOBO TESTAMENTO NA CRIOL) Tene sertesa di kuma Jeova ta oja bu sforsus, tambi i ta kontenti ora ku bu sta na sforsa pa fasi ke ki sertu. Nkuantu mundu sta na fundia kada bias mas na injustisa, ka bu disanima! Lembra sempri di kuma “Jeova ama justus.” — Sal 146:8.