“Bu na bin sta ku mi na Paraísu”

1. Ke ku Jesus fala ki kriminosu ku pregadu pertu del puku antis di muri? (Lukas 23:39-43)

JESUS ku dus kriminosu ku pregadu pertu del, staba na sufri oca ke sta kuas pa muri. (Luk 23:32, 33) Es dus kriminosu staba na papia mal ku Jesus, es ta mostra di kuma e ka seduba si disipulus. (Mat 27:44; Mar 15:32) Ma un son delis muda si manera di pensa. I falal: “Jesus, lembra di mi ora ku bu yentra na bu renu.” Jesus ruspundil: “Na bardadi N na falau aos, bu na bin sta ku mi na Paraísu.” (Luk 23:43, TNM) (Lei Lukas 23:39-42.) I pudi sedu di kuma ki kriminosu obi mensaẑen aserka di “renu di seu” ku Jesus prega duranti si ministeriu, ma i ka sedu si disipulu. Tambi Jesus nunka fala di kuma, es omi na sta na Renu di seu. (Mat 4:17) Jesus staba na fala di Paraísu ku na bin ten na Tera. Pabia ku no pudi fala kila?

2. Ke ku ta mostra di kuma es kriminosu ku ripindi seduba un judeu?

² Es kriminosu ku ripindi pudi sedu un judeu. I fala si kumpañer: “Abo inda bu ka medi Deus? Bu na sufri mesmu kastigu suma e omi li.” (Anos ku pui letra karegadu ku italiku, Luk 23:40) Judeus ta adora so un Deus, ma jintis di utru nasons ta fia na manga di deusis. (Sai 20:2, 3; 1 Kor 8:5, 6) Si ki kriminosu seduba di utru nason, purgunta ki na fasiba i es: “Abo inda bu ka medi deusis?” Tambi Jesus mandadu, i ka pa jintis di utru nasons, ma pa “jinti di nason di Israel ku pirdi suma karnel.” (Mat 15:24) Deus kontaba israelitas kuma i na bin lantanda kilis ku muri. Talves es kriminosu ku ripindi kunsi es purmesa, i si palabras ta mostra kila. I fala di kuma Jeova na lantanda Jesus pa rena na Renu di Deus. Tambi es omi talves tene speransa di kuma Deus na lantandal.

3. Oca ku Jesus fala di Paraísu, ke talves ku kriminosu ku ripindi pensa nel? Bu pudi splika. (Kumsada 2:15)

³ Suma judeu, kriminosu ku ripindi pudiba kunsi storia di Adon ku Eva, i ku Paraísu ku Jeova puiba elis nel. Pa kila, es kriminosu talves fia di kuma Paraísu ku Jesus fala del, na bin sedu un jardin bonitu li na Tera. — Lei Kumsada 2:15.

4. Palabras ku Jesus fala es kriminosu dibi di lebanu pensa na ke?

⁴ Palabras ku Jesus fala es kriminosu, dibi di lebanu pensa na kuma ku vida na bin sedu na Paraísu. Na bardadi, pas ku tenba na renansa di Salomon ta nsinanu algun kusa aserka di Paraísu. Biblia fala di kuma Jesus i mas garandi di ki Salomon. No pudi spera di kuma, Jesus na tarbaja juntu ku kilis ku na rena ku el pa torna Tera na un paraísu bonitu. (Mat 12:42) Sin duvida, kilis di “utru karnel” dibi di sta interesadu pa sibi ke ke dibi di fasi pa vivi pa sempri na Paraísu. — Jon 10:16.

KUMA KU VIDA NA BIN SEDU NA PARAÍSU?

5. Kuma ku bu pensa vida na bin sedu na Paraísu?

⁵ Kuma ku bu pensa vida na bin sedu na Paraísu? Talves bu na imaẑina ku un kau bonitu suma jardin di Eden. (Kum 2:7-9) I pudi sedu kuma bu na lembra di profesia ku Mikeias skirbi aserka di povu di Deus: “Kada un na sinta bas di si pe di uva, o bas di si figera”. (Mik 4:3, 4) Talves bu lembra tambi di versikulu di Biblia ku fala i na bin ten manga di kusas di kume. (Sal 72:16; Isa 65:21, 22) Talves bu na imaẑina bu kabesa na un jardin bonitu, bu sinta na un mesa ku tene manga di kusas di kume sabi. I pudi sedu kuma bu na imaẑina paña ar puru di plantas ku floris ku na cera sabi. Talves bu sta tambi na imaẑina bu familias ku amigus, nkluindu kilis ku lantadadu sta na ri, i e sta kontenti di sta juntu. Es tudu i ka un simplis suñu. Sin duvida, kusas suma esis na bin kontisi na Tera. No na bin tene tambi bon tarbaju na Paraísu.

6. Ke ku no na bin fasi na Paraísu? (Jubi diseñu.)

⁶ Jeova kumpunu pa no tene kontentamentu na tarbaju. (Ekl 2:24) No na bin tene manga di kusas di fasi duranti Renansa di Mil Anu di Kristu. Kilis ku salva di garandi tribulason, ku milyons di kilis ku resusitadu na pirsisa di ropa, kumida ku kau di mora. Pa pudi da elis es kusas, no na pirsisa di fasi manga di tarbaju ku ta da kontentamentu! Suma ku Adon ku Eva faladuba pa e labra con, anos tambi no na kontenti di tarbaja pa torna Tera na un Paraísu. Imaẑina tambi kuma ku no na kontenti di nsina milyons di jintis ku lantandadu, ku sibi puku kusa aserka di Jeova ku si intenson, i juda jintis fiel ku vivi manga di tempu antis di Jesus, pa aprindi ke ku kontisi disna ke muri.

7. Kal sertesa ku no pudi tene, i pabia di ke?

⁷ No pudi tene sertesa di kuma, ora ku no na vivi na Paraísu no na tene pas, no na tene tudu ku no pirsisa del i no na sedu ben organizadu. Pabia di ke? Pabia Jeova danuba ja un isemplu di kuma ku vida na sedu bas di renansa di si Fiju. No pudi oja es duranti renansa di rei Salomon.

RENANSA DI SALOMON I AMOSTRA DI KUMA KU PARAÍSU NA SEDU

8. Kuma ku palabras ku sta na Salmu 37:10, 11, 29 kumpri na pasadu? (Jubi “Purguntas di kilis ku ta lei no publikasons” nes Sintinela.)

⁸ Rei Davi nspiradu pa skirbi aserka di kuma ku vida na sedu, ora ku futuru rei jiru i fiel na rena. (Lei Salmu 37:10, 11, 29) Manga di bias, no ta lei Salmu 37:11 pa utru jintis ora ku no na papia di Paraísu ku na bin. No tene bon motivu di fasil, pabia Jesus fala di ki testu na si nsinamentu na monti, pa mostra di kuma es testu na bin kumpri na futuru. (Mat 5:5) Ma, palabras di Davi mostra tambi, kuma ku vida na sedu na tempu di rei Salomon. Oca Salomon staba na rena na Israel, povu di Deus teneba manga di pas, e teneba tudu ke pirsisa del na tera “riku ku ta pruduzi ciu.” Deus fala: “Si bo yanda na ña regras, . . . N na da pas na tera; bo na dita; ningin ka na pantanda bos.” (Sir 20:24; 26:3, 6) Es purmesas kumpri oca Salomon sedu rei na Israel. (1 Kron 22:9; 29:26-28) Jeova purmiti di kuma, jintis mau “na disparsi”. (Sal 37:10) Asin, ke ku faladu na Salmu 37:10, 11, 29 kumpriba na pasadu, tambi i na bin kumpri na futuru.

9. Ke ku raiña di Saba fala aserka di renansa di rei Salomon?

⁹ Raiña di Saba obi di kuma nason di Israel tene pas, i e tene tudu ke ke pirsisa del oca Salomon sedu rei. Es raiña sai di tera lunju i bai pa Jerusalen pa pudi oja ku si uju es situason. (1 Re 10:1) Dipus ki oja renu di Salomon, i fala: “E ka kontan nin metadi . . . Sortiadu i bu omis! Sortiadu i bu ŝefis ku sta sempri bu dianti, e na obi bu palabras di jiresa.” (1 Re 10:6-8) Ma, kondison bas di renansa di Salomon seduba so un isemplu di ke ku Jeova na bin fasi pa pekaduris bas di renansa di si Fiju Jesus.

10. Di kal maneras ku Jesus mas garandi di ki Salomon?

¹⁰ Jesus mas garandi di ki Salomon na tudu. Salomon seduba un omi imperfeitu i ku fasi erus gravi ku tisi manga di purblemas pa povu di Deus. Pa utru ladu, Jesus i rei perfeitu ku ka fasi nin un eru. (Luk 1:32; Eb 4:14, 15) Jesus kontinua sedu fiel pa Deus, mesmu dianti di testis difisil di Satanas. Kristu mostra di kuma, nunka i ka na peka o fasi kualker kusa ku na pui pa kilis ki na manda riba del sufri. El i minjor Rei ku no pudi tene.

11. Ba kin ku na juda Jesus?

¹¹ Jesus na tene 144.000 ku na rena ku el, pa kuida di pekaduris i pa kumpri intenson di Jeova pa Tera. (Apok 14:1-3) E nguenta manga di testis ku purblemas oca e na viviba na Tera, pa kila, e na ntindi ke ku kilis ku na vivi na Tera sta na pasa. Kal kusa izatu ku es reis na bin fasi?

KE KU UNJIDUS NA BIN FASI?

12. Kal tarbaju ku Jeova da pa 144.000?

¹² Jesus ku kilis ku na rena kel tene tarbaju di fasi, mas di ki Salomon. Rei Salomon dibi di kuidaba di milyons di jintis so na un tera. Ma, kilis ku na rena na Renu di Deus na juda pa kuida di bilyons di jintis na mundu ntidu. Na bardadi, Jeova da 144.000 privileẑiu garandi dimas!

13. Kal responsabilidadi garandi ku kilis ku na rena ku Jesus na tene?

¹³ Suma Jesus, 144.000 na sedu reis ku saserdotis. (Apok 5:10) Bas di Lei di Moisés, saserdotis i purmeru jintis ku teneba responsabilidadi di proteẑi saudi fisiku ku saudi spiritual di povu. Lei seduba “un sombra di kusas bon ku na bin”. Pa kila, i normal fia di kuma kilis ku na rena ku Jesus na kuida ben di povu di Deus na sintidu fisiku i spiritual. (Eb 10:1) No ka sibi inda kuma kes reis ku saserdotis na bin kumunika ku kilis ku sta bas di Renu li na Tera. I ka mporta kuma ku Jeova organiza kusas, no pudi tene konfiansa di kuma na Paraísu ku na bin, kilis ku na vivi na Tera na bin risibi orientason ke pirsisa del. — Apok 21:3, 4.

KE KU “UTRU KARNEL” DIBI DI FASI PA PUDI VIVI NA PARAÍSU?

14. Kal relason ku ten entri “utru karnel” ku “karnelsiñus”?

¹⁴ Jesus coma kilis ki na rena kel di “karnelsiñus”. (Luk 12:32) I fala tambi di sugundu grupu ki coma di “utru karnel”. Es dus grupus forma un uniku rebañu. (Jon 10:16) Tudu kilis ku fasi parti des grupus sta na tarbaja juntu aos. E na kontinua tarbaja juntu ora ku Tera sedu un paraísu. Na ki tempu, kilis ku fasi parti di “karnelsiñus” na bin sta na seu, i kilis ku fasi parti di “utru karnel” na tene speransa di vivi pa sempri na Tera. Ma i ten kusas ku “utru karnel” pirsisa di fasi gosi pa pudi vivi na Paraísu.

15. (a) Kuma ku “utru karnel” ta tarbaja juntu ku ermons di Kristu? (b) Kuma ku bu pudi kopia isemplu di ermon ku sta na farmasia? (Jubi foto.)

¹⁵ Kriminosu ku ripindi, muri antis di tene oportunidadi di mostra di kuma i da balur pa ke ku Kristu fasi pa rel. Diferenti di kriminosu, anos di “utru karnel” no tene manga di oportunidadi di mostra kuma ku no ta sinti, aserka di ke ku Jesus fasi pa nos. Pur isemplu, no ta mostra no amor pa rel na manera ku no ta trata si ermons unjidu pa spiritu. Jesus fala di kuma i na julga karnelis pa manera ke ta trata si ermons. (Mat 25:31-40) No pudi apoia ermons di Kristu ora ku no pega tesu na juda elis na tarbaju di pregason i di fasi disipulus. (Mat 28:18-20) E ku manda, no misti usa publikasons basiadu na Biblia ke danu, suma livru Bu Pudi Tene un Vida Filis pa Sempri! Si bu ka sta inda na diriẑi studu di Biblia ku un algin, pabia ku bu ka na fiksa un objetivu di kumsa studu di Biblia ku manga di jintis ku bu na pudi studa ku elis?

16. Ke ku no pudi fasi gosi pa purpara pa vivi na Paraísu?

¹⁶ No ka pirsisa di pera te tempu ku no na vivi na Paraísu pa kumsa sedu tipu di algin ku Jeova misti pa vivi la. Disna di gosi, no dibi di sforsa pa sedu onestu na no kombersas ku asons i leba un vida ekilibradu. No pudi sedu fiel pa Jeova, pa no parseru ku no ermons na fe. Si no ta obdisi Jeova gosi nes mundu mau, i na sedu mas fasil obdisil na Paraísu. No pudi tambi disenvolvi abilidadis ku maneras di sedu pa mostra di kuma no sta na purpara pa vivi la. Jubi artigu “Bu sta pruntu pa ‘yarda mundu’?” ku sta nes Sintinela.

17. Sera ki no dibi di disanima pa pekadus ku no fasiba? Bu pudi splika.

¹⁷ Tambi no ka dibi di kontinua kulpa no kabesa pabia di pekadus gravi ku no fasiba. Nunka no ka misti oja sakrifisiu di resgati suma diskulpa pa ‘ntema, i kontinua na peka.’ (Eb 10:26-31) Ma, si na bardadi no ripindi di no pekadu gravi, i no pidi ajuda di Jeova ku di ansions, i no muda no komportamentu, no pudi tene sertesa di kuma, Jeova purdanu di manera kompletu. (Isa 55:7; At 3:19) Lembra ke ku Jesus fala pa fariseus: “N ka bin coma jinti justu, ma N bin coma kilis ku ta fasi pekadu.” (Mat 9:13) Sakrifisiu di resgati tene puder di kubri tudu no pekadus.

BU PUDI VIVI PA SEMPRI NA PARAÍSU

18. Kal kusa ku bu na mistiba papia del ku kriminosu ku muriba pertu di Jesus?

¹⁸ Bu pudi imaẑina, bu sta na Paraísu, bu sta na papia ku kriminosu ku papiaba ku Jesus? Sin duvida, abos dus bo na konta kuma ku bo sinti tokadu pa sakrifisiu di Jesus. Talves bu na falal pa i kontau mas aserka di ke ku kontisi na ultimu oras di vida di Jesus na Tera, i kuma ki sintiba oca Jesus seta si pididu. Pa utru ladu, i pudi puntau kuma ku vida seduba na fin di tempu di mundu di Satanas. I na sedu bon dimas studa Palabra di Deus ku jintis suma es omi! — Ef 4:22-24.

19. Pabia ku no ka na nfastia vivi na Paraísu? (Jubi diseñu ku sta na kapa.)

¹⁹ Nunka no ka nfastia vivi na Paraísu. Sempri no na kontra ku jintis interesanti, tambi no na tene un bon tarbaju di fasi. Minjor inda, kada dia no na konsigi kunsi minjor no Pape ku sta na seu i aproveita di ke ki fasi. No na tene sempri kusas di aprindi aserka del, tambi no na tene manga di kusas di aprindi aserka di kusas ki kumpu. Mas no na vivi, mas no amor pa Deus na torna forti. No na gardisi ciu Jeova ku Jesus pa manera ke danu purmesa di pudi vivi pa sempri na Paraísu!