BIBLIOTEKA NA INTERNET di Watchtower
BIBLIOTEKA NA INTERNET
di Watchtower
Kriol di Gine-Bisau
N̈, n̈, Ŝ, ŝ, Ẑ, ẑ
  • N̈
  • n̈
  • BIBLIA
  • PUBLIKASONS
  • RUNIONS
  • w23 Abril pp. 2-7
  • Ke ku no pudi aprindi di milagris di Jesus?

I ka ten ni un video dispunivel nes parti ku bu kalka.

Diskulpa, i ten un eru oca ku bu na tenta yabri video.

  • Ke ku no pudi aprindi di milagris di Jesus?
  • Sintinela ta Fala di Renu di Jeova (Sintinela di Studu) — 2023
  • Subtitulus
  • Materia di mesmu asuntu
  • LISONS KU NO PUDI APRINDI DI JEOVA KU JESUS
  • UN LISON DI UMILDADI
  • KAL LISON KU NO PUDI APRINDI ASERKA DI SINTI PENA
  • UN PROGRAMA DI STUDU KU NA PUI PA NO FE SEDU MAS FORTI
  • Ke ku Jesus fasi ocal na Tera?
    Bu Pudi Tene un Vida Filis pa Sempri! — Benefisia di Studu di Biblia
Sintinela ta Fala di Renu di Jeova (Sintinela di Studu) — 2023
w23 Abril pp. 2-7

STUDU 15

Ke ku no pudi aprindi di milagris di Jesus?

“I yanda tudu parti, i na fasi ben, i na kura”. — AT 10:38.

KANTIKU 13 Cristo, o Nosso Exemplo

KE KU NO NA BIN FALA DELa

1. Splika ke ku kontisi oca Jesus fasi si purmeru milagri?

IMAẐINA kuma ki seduba serka di Otubru di anu 29 EK oca Jesus kumsa si ministeriu. Jesus ku si mame Maria, ku alguns di si disipulus kumbidadu pa un festa di kasamenti na Kaná, un tabanka na norti di Nazaré nunde ku Jesus moraba. Maria i amiga di familia, parsi kuma i staba na juda na kuida di kumbidadus. Ma duranti festa di kasamenti, i tenba un purblema ku pudi pui pa familia ku kilis ku kumsa kasa fika ku borgoña, pabia biñu kaba.b Talves i tenba manga di kumbidadus ke ka speraba. Maria bai rapidu pa si fiju i falal: “E ka tene ja biñu.” (Jon 2:1-3) Ke ku Jesus fasi? I fasi un kusa dimiradu, di bidanta yagu na “bon biñu”. — Jon 2:9, 10.

2-3. (a) Kal tipu di milagri ku Jesus fasi? (b) Kuma ku no pudi benefisia di studa milagri di Jesus?

2 Jesus fasi manga di milagris duranti si ministeriu.c I fasi milagris pa juda manga di jintis. Pur isemplu, so na dus di si milagris, i alimenta 5.000 omis i mas tardi i alimenta 4.000 omis, i pudi sedu un total di 27.000 jintis si kontadu minjeris ku mininus ku staba la. (Mat 14:15-21; 15:32-38) Na tudu ki dus mumentu, Jesus kuraba tambi manga di jintis ku sta duenti. (Mat 14:14; 15:30, 31) Imaẑina kuma ku manga di jintis fikaba dimiradu, manera ke kuradu i alimentadu pa Jesus!

3 Aos, no pudi aprindi manga di kusas aserka di milagris di Jesus. Nes studu, no na fala di alguns lisons ku no pudi aprindi di milagris di Jesus ku na pui pa no fe sedu mas forti. Dipus no na bin jubi kuma ku no pudi kopia umildadi ku manera ku Jesus ta sinti pena ora ki na fasi milagris.

LISONS KU NO PUDI APRINDI DI JEOVA KU JESUS

4. Kuma ku no ta benefisia di lisons ku milagris di Jesus ta nsinanu?

4 Lisons ku milagris di Jesus ta nsinanu, ta pui pa no fe sedu mas forti i ka so nel, ma tambi na si Pape. Pabia i Jeova ku ta pui pa es milagris fasidu. Atus 10:38 fala sin: “Bo sibi aserka di Jesus di Nazaré, kuma ku Deus unjil ku Spiritu Santu ku puder. I yanda tudu parti, i na fasi ben, i na kura tudu ku sta bas di puder di diabu, pabia Deus staba ku el.” Lembra kuma, Jesus kopia diritu pensamentu ku sentimentu di si Pape na tudu ke ki fala i fasi, nkluindu milagris ki fasi. (Jon 14:9) Jubi tris lison ku no pudi aprindi di milagris di Jesus.

5. Ke ku leba Jesus na fasi milagris? (Mateus 20:30-34)

5 Purmeru, Jesus ku si Pape amanu ciu. Oca i staba na Tera, Jesus mostra si amor garandi pa jintis, pa manera ki fasi milagris pa juda kilis ku staba na sufri. Un bias, dus omi segu pidi Jesus pa i juda elis. (Lei Mateus 20:30-34.) Nota di kuma Jesus “sinti garandi pena”, dipus i kura elis. Es pena garandi, ku sedu un manera di Jesus mostra amor pa jintis, lebal na da di kume pa jintis ku tene fomi i pa kura un leprosu. (Mat 15:32; Mar 1:41) No pudi tene sertesa di kuma Jeova, Deus ku “ten garandi pena” ku si Fiju amanu ciu, tambi e ta sinti pena ora ku no na sufri. (Luk 1:78; 1 Ped 5:7) E tene diseẑu garandi di kaba ku tudu purblemas ku ta kansa pekaduris.

6. Kal puder ku Deus da Jesus?

6 Sugundu, Deus da Jesus puder pa kaba ku tudu purblemas di pekaduris. Atraves di si milagris, Jesus mostra di kuma i tene puder pa kaba ku tudu purblemas ku nunka no ka pudi kaba ku el anos propi. Pur isemplu, i tene puder di libertanu di ke ku pui pekaduris tene purblema, ku sedu pekadu ku no yarda ku tisi duensa ku mortu. (Mat 9:1-6; Rom 5:12, 18, 19) Si milagris mostra di kuma i pudi kura “tudu” tipu di duensas i te mesmu lantanda kilis ku muri. (Mat 4:23; Jon 11:43, 44) Tambi i tene puder di kontrola bentus forti, i liberta jintis di spiritus mau. (Mar 4:37-39; Luk 8:2) No ta sinti ben di sibi di kuma Jeova pui es puder na mon di si Fiju!

7-8. (a) Kal konfiansa ku milagris di Jesus ta danu? (b) Kal milagri ku bu na spera bin oja na nobu mundu ku na bin?

7 Terseru, no pudi tene tudu konfiansa di kuma bensons ku na bin bas di Renu di Deus na kumpri. Milagris ku Jesus fasi oca i staba na Tera suma omi, ta nsinanu ke ki na bin fasi na tudu mundu, pabia el i Rei di Renu di Deus ku sta na seu. No jubi ke ku na bin kontisi nin i ka na tarda bas di renansa di Kristu. No na bin tene saudi perfeitu, pabia Jesus na bin kaba ku tudu duensas ku difisiensias ku ta kansa pekaduris. (Isa 33:24; 35:5, 6; Apok 21:3, 4) Fomi ka na ten mas, nin no ka na sufri pabia di disastris natural. (Isa 25:6; Mar 4:41) No na tene kontentamentu garandi di risibi kilis ku no ama ku na lantandadu di “koba.” (Jon 5:28, 29) Kal milagri ku bu mas na spera bin oja na nobu mundu ku na bin?

8 Ora ki na fasi milagris, Jesus ta mostra umildadi garandi, tambi i ta sinti pena di jintis, esis i maneras di sedu ku no misti kopia. No na jubi dus isemplu, i no na kumsa ku festa di kasamenti na Kaná.

UN LISON DI UMILDADI

9. Pabia ku Jesus fasi milagri na festa di kasamenti na Kaná? (Jon 2:6-10)

9 Lei Jon 2:6-10. Oca biñu kaba na un festa di kasamenti, sera ki Jesus obrigaduba fasi algun kusa? Nau. I ka tenba nin un profesia ku fala di kuma Mesias na fasi biñu atraves di milagri. Ma, imaẑina kuma ku bu na sinti, si bibidas kaba na bu festa di kasamenti? Parsi kuma Jesus sinti pena di familia, prinsipalmenti di noivu ku noiva, i mistiba libra elis di borgoña. Pa kila, suma ki faladu na kumsada, i fasi un milagri. I bidanta serka di 390 litru di yagu na un bon biñu. Talves i da es kuantidadi garandi, asin parti ku sobra pudi bin usadu mas tardi, o i pudi te mesmu bindidu pa juda nobu kasal ku diñeru. Es nobu kasal dibi di sinti ben!

Jesus firma tras na festa di kasamenti i kilis ku kumsa kasa ku se kumbidadus sta na baja, kume i bibi bon biñu.

Kopia Jesus i ka bu ngaba bu kabesa pa kusas ku bu fasi. (Jubi paragrafu 10 ku 11)e

10. Kal kusas importanti ku faladu del na Jon kapitulu 2? (Jubi tambi diseñu)

10 Jubi kusas importanti ku faladu del na Jon kapitulu 2. Sera ki bu nota di kuma Jesus ka inci yagu na putis di pedra? En ves di coma atenson pa si kabesa, Jesus fala kriadus pa e inci putis. (Versikulu 6, 7) Dipus ki bidanta yagu na biñu, Jesus ka leba biñu pa ŝef di mesa. En ves di kila, i fala kriadus pa e lebal el. (Versikulu 8) Na bardadi, Jesus ka pega un kopu di biñu i na yanda ku el dianti di kumbidadus i na ngaba si kabesa, i na fala sin: ‘Bo sinti gustu di biñu ku N kumsa fasi!’

11. Ke ku no pudi aprindi di milagri di Jesus?

11 Ke ku no pudi aprindi di milagri di Jesus oca i bidanta yagu na biñu? No aprindi un lison di umildadi. Jesus ka ngaba si kabesa pa milagri ki fasi; na bardadi, nunka i ngaba si kabesa pa kusas ki fasi. Pa kontrariu, ku umildadi sempri i ta mostra di kuma, tudu ke ki fasi bin di si Pape. (Jon 5:19, 30; 8:28) Si no kopia Jesus i kontinua sedu umildi, no ka na ngaba no kabesa pa kusas ku no fasi. I ka mporta ke ku no pudi fasi na sirvisu di Jeova, ka no ngaba no kabesa, ma no ngaba no Deus garandi ku no tene privileẑiu di sirbi. (Jer 9:23, 24) No ngaba Jeova pa tudu ke ku no fasi. Sera ki i ten bon kusa ku no pudi fasi sin ajuda di Jeova? — 1 Kor 1:26-31.

12. Di kal utru manera ku no pudi kopia umildadi di Jesus? Bu pudi da un isemplu.

12 No jubi utru manera ku no pudi kopia umildadi di Jesus. Imaẑina es situason: Un ansion pasa manga di tempu na juda un servu ministerial joven pa purpara si purmeru diskursu publiku. Pabia di ajuda ku ansion da, es ermon joven fasi un bon diskursu, i kongregason fika kontenti. Dipus di runion, un algin bin pa ki ansion i falal: Es ermon fasi un bon diskursu, i kel? Sera ki ansion pirsisa di fala: ‘I bardadi, ma N pasa manga di tempu na judal’? O i dibi di fala ku umildadi: ‘I bardadi. I fasi un bon diskursu’? Ora ku no sedu umildi, no ka na ngaba no kabesa pa tudu bon kusas ku no fasi pa utrus. No kontenti di sibi kuma Jeova ta oja, tambi i ta da balur pa ke ku no ta fasi. (Komparal ku Mateus 6:2-4; Eb 13:16) Ku sertesa, no ta kontenta Jeova ora ku no kopia umildadi di Jesus. — 1 Ped 5:6.

KAL LISON KU NO PUDI APRINDI ASERKA DI SINTI PENA

13. Ke ku Jesus oja pertu di sidadi di Nain, i ke ki fasi? (Lukas 7:11-15)

13 Lei Lukas 7:11-15. Imaẑina es situason ku kontisi na 31 EK. Jesus staba na bai pa Nain, un sidadi di Galileia ku ka lunju Sunen, nunde ku profeta Eliseu lantanda fiju di un minjer serka di 900 anu atras. (2 Re 4:32-37) Oca Jesus pertu porton, i oja jintis na sai di prasa pa bai pa nteru. I seduba un situason tristi dimas, pabia viuva pirdi si uniku fiju. Ma mame ku teneba cur ka staba el so, manga di jinti di prasa staba ku el. Jesus para ki jintis, i fasi un kusa dimiradu pa ki mame ku teneba cur, i lantanda si fiju! Na tris resureison ku Jesus fasi, ku faladu del na Ivanjelius, es i purmeru delis.

Foto ku diseñu: 1. Na dia di nteru, Jesus sta na konsola un mame ku tene cur. 2. Un irma sta na konsola utru irma ku sta na cora duranti un kantiku na runion di kongregason.

Kopia Jesus ora ku bu toma diantera na mostra di kuma bu sinti pena pa kilis ku tene cur. (Jubi paragrafu 14 te 16)

14. Kal kusas importanti ku faladu del na Lukas kapitulu 7? (Jubi tambi foto ku diseñu)

14 Jubi kusas importanti ku faladu del na Lukas kapitulu 7. Sera ki bu nota kuma Jesus “oja” mame ku tene cur i dipus “i sinti garandi pena del”? (Versikulu 13) Talves Jesus ojal i na cora oca i na yanda pertu di kurpu di si fiju, i sinti pena del. Jesus ka sinti so pena pa ki mame; ma i mostra kuma i sinti pena del. Sin duvida, i papia ku el di un manera ku na animal, i falal: “Ka bu cora.” Dipus i fasi un kusa pa judal. I lantanda si fiju i “ntregal pa si mame.” — Versikulu 14, 15.

15. Ke ku no pudi aprindi di milagri di Jesus?

15 Ke ku no pudi aprindi di milagri di Jesus di lantanta fiju di viuva? No aprindi di kuma no pirsisa di sinti pena pa kilis ku tene cur. Na bardadi, no ka pudi lantanda kilis ku muri suma ku Jesus fasi. Ma, suma Jesus, no pudi sinti pena pa kilis ku tene cur, ora ku no na jubi elis diritu. No pudi toma diantera na mostra kuma no sinti pena, ora ku no na papia i fasi kusas ku pudi juda elis i anima elis.d (Dit 17:17; 2 Kor 1:3, 4; 1 Ped 3:8) Mesmu palabras simplis, i fasi kusas pikininu pudi nkoraẑa elis ciu.

16. Suma ki mostradu na foto, ke ku bu pudi aprindi di spiriensia di un mame ku si fiju kumsa muri?

16 Jubi es spiriensia. Alguns anus atras, oca ke na kanta na un runion, un irma nota di kuma un mame ku sta pertu del staba na cora. Kantiku na falaba di speransa di resureison, i ka tarda ku fiju femia des minjer muri. Oca ku irma nota kila, i bai firma logu pertu del, i pui mon riba del, i e kabanta kanta juntu. Dipus es mame fala sin: “N sinti amor garandi di ermons ku irmas.” I kontentiba manera ki bai mati runion. I fala sin: “I li na Salon di Renu ku no ta risibi ajuda.” No pudi tene sertesa di kuma Jeova ta nota, tambi i ta da balur mesmu pa kusas pikininu ku no fasi pa mostra kuma, no sinti pena di kilis ku tene cur, “ku tene spiritu kalkadu.” — Sal 34:18.

UN PROGRAMA DI STUDU KU NA PUI PA NO FE SEDU MAS FORTI

17. Ke ku no aprindi nes studu?

17 No pudi nkoraẑadu ciu ora ku no studa ke ku Biblia fala aserka di milagris di Jesus. E ta nsinanu di kuma Jeova ku Jesus amanu ciu, tambi Jesus tene puder di kaba ku tudu purblemas di pekaduris, i no pudi tene tudu konfiansa di kuma, bensons di Renu ku purmitidu sta pertu. Ora ku no na studa milagris di Jesus, no pudi pensa fundu na kuma ku no pudi kopia si maneras di sedu. Pabia ku no ka na fasi un programa di studu pesual o Adorason na Familia ku na fala di utrus milagri di Jesus? Jubi lisons ku bu pudi aprindi, i dipus konta utrus ke ku bu aprindi. Pensa na bon kombersas ku bu pudi tene! — Rom 1:11, 12.

18. Ke ku no na bin fala del na studu ku na bin?

18 Na fin di si ministeriu, Jesus fasi terseru i ultimu resureison ku faladu del na Biblia. Ma es i diferenti, pabia i lantanda si amigu ki gosta ciu del, i fasil na situason ku nunka ciga di fasidu. Kal lison ku no pudi aprindi des milagri ku sta na Ivanjelius? I kuma ku no pudi pui pa no fe sedu mas forti na speransa di resureison? Es purguntas na ruspundidu na studu ku na bin.

KUMA KU BU NA RUSPUNDIBA?

  • Kal lisons ku no aprindi di milagris di Jesus ku pudi pui pa no fe sedu mas forti?

  • Ke ku no aprindi di milagri di Jesus ku faladu del na Jon 2:6-10 aserka di umildadi?

  • Ke ku no aprindi di milagri di Jesus ku faladu del na Lukas 7:11-15 aserka di sinti pena?

KANTIKU 20 Jeová Deu-nos o Seu Melhor

a I kalma bentu forti, i kura duentis i lantanda kilis ku muri. No ta fika dimiradu ora ku no lei aserka di milagris ku Jesus fasi! Es milagris sta na Biblia, i ka so pa no divirti ku el, ma pa nsinanu. Nkuantu no na fala delis, no na aprindi lisons ku na pui pa no fe sedu mas forti na Jeova ku Jesus, i diskubri kal maneras di sedu ku no dibi di tene.

b Un piskisadur di Biblia fala sin: “Na teras ku Biblia skirbidu, jintis ta pensa di kuma i se responsabilidadi di risibi jintis, i algin ku risibi utrus ta fasi tudu pa kilis ku kumbidadu tene mas di ke ke pirsisa del. Algin ku ta risibi jintis diritu, prinsipalmenti na festa di kasamenti, dibi di da si kumbidadus manga di kumida ku biñu.”

c Ivanjelius fala di mas di 30 milagri ku Jesus fasi. Jesus fasi utrus milagris, ma Biblia ka fala delis di manera separadu. Un bias, “tudu jinti di prasa” bai pa el i “kura manga di jinti di manga di koldadi duensa”. — Mar 1:32-34.

d Pa tene ideias di ke ku bu pudi fala o fasi pa konsola kilis ku tene cur, jubi artigu Console os enlutados, assim como Jesus fez na Sintinela di 1 di Novembru di 2010.

e SPLIKASON DI DISEÑU: Jesus firma la tras, noivus ku se kumbidadus sta na bibi bon biñu.

    Publikasons na Kriol di Gine-Bisau (2000-2025)
    Sai
    Entra
    • Kriol di Gine-Bisau
    • Manda pa utru algin
    • Preferensias
    • Copyright © 2025 Watch Tower Bible and Tract Society of Pennsylvania
    • Termus di Usu
    • Pulitika di Privasidadi
    • Normas di Privasidadi
    • JW.ORG
    • Entra
    Manda pa utru algin