No anima n̈utru na runions di kongregason

1. Pabia ku no ta kumenta na runions?

PABIA ku no ta mati runions di kongregason? Purmeru, i pa ngaba Jeova. (Sal 26:12; 111:1) Tambi no ta mati runions pa pudi anima n̈utru nes tempu difisil. (1 Tes 5:11) Ora ku no yalsa mon i kumenta na runions, no ta sta na fasi tudu es dus kusa.

2. Kal oportunidadis ku no tene pa da kumentariu na no runions?

² Kada semana, no ta tene oportunidadis di da kumentariu na no runions. Pur isemplu, na fins di semana, no pudi partisipa na studu di Sintinela. Na no runions di semana, no pudi kumenta na parti diskubri joias spiritual, studu bibliku di kongregason ku utrus partis nunde ku asistensia ta fasidu purguntas.

3. Ke ku pudi pui pa i difisil pa no da kumentariu, i kuma ku Ebreus 10:24, 25 pudi judanu?

³ Anos tudu no misti ngaba Jeova i anima no ermons na fe. Ma, i ten kusas ku pudi pui pa i difisil pa no da kumentariu: No pudi medi da kumentariu, o talves no gosta ciu di kumenta, ma utrora no ka ta comadu ora ku no yalsa mon. Ke ku pudi judanu lida ku es situasons? No pudi oja resposta na karta ku Paulu skirbi pa Ebreus. Oca i fala di importansia di junta, i fala di kuma no dibi di konsentra na “anima n̈utru”. (Lei Ebreus 10:24, 25.) Ora ku no nota di kuma utrus na asistensia pudi animadu, te mesmu ku simplis kumentariu ku na mostra no fe, no ta sta mas avontadi pa da kumentariu. Si no ka comadu manga di bias, no pudi sta kontenti di sibi di kuma utrus na kongregason na tene oportunidadi di kumenta. — 1 Ped 3:8.

4. Kal tris pontus ku no na bin fala del nes studu?

⁴ Nes studu, purmeru no na fala di kuma ku no pudi anima n̈utru na un kongregason pikininu, nunde ku numeru di kilis ku ta da kumentarius ka ciu. Dipus, no na fala di kuma ku no pudi anima n̈utru na un kongregason garandi, nunde ku manga di jintis ta yalsa mon pa da kumentariu. Pa fin, no na fala di kuma ku no pudi anima utrus ku ke ku no ta fala na no kumentarius.

ANIMA N̈UTRU NA UN KONGREGASON PIKININU

5. Kuma ku no pudi anima n̈utru si i ten puku jintis na runion?

⁵ Na kongregason pikininu o grupu, i ka ta ten manga di jintis ku kin ku na diriẑi pudi kuji pa da kumentariu. Utrora, talves i na pirsisa di pera un bokadu antis di un algin yalsa mon pa da kumentariu. Runion pudi parsi un kusa ŝatu, i kila ka ta anima. Ke ku bu pudi fasi? Sta sempri pruntu pa yalsa mon. Si bu fasi es, kila pudi pui pa utrus partisipa manga di bias.

6-7. Kuma ku no pudi rapati kualker medu ku no tene di da kumentariu?

⁶ Ke ku bu pudi fasi, si bu tene medu di kumenta? I asin ku manga di jintis ta sinti. Ma, pa pudi mas anima bu ermons ku irmas, pabia ku bu ka na pensa na manera di rapati medu di da kumentariu? Kuma ku bu pudi fasil?

⁷ Talves i na sedu di ajuda si bu jubi mas alguns suẑestons ku faladuba ja del na diferentis Sintinela ku pasa.b Pur isemplu, purpara diritu. (Dit 21:5) Mas bu kunsi materia diritu, mas bu na sta avontadi pa yalsa mon pa da kumentariu. Tambi, da kumentarius kurtu. (Dit 15:23; 17:27) Resposta kurtu na rapati bu medu. Un kumentariu kurtu, ku talves tene un o dus frasi, pudi sedu mas fasil pa bu ermons ku irmas ntindi, di ki un kumentariu kumpridu ku tene manga di ideias. Ora ku bu da un kumentariu kurtu na bu propi palabras, bu na mostra di kuma bu purpara diritu i bu ntindi materia diritu.

8. Kuma ku Jeova ta oja sforsu garandi ku no ta fasi?

⁸ Ke gora si bu tenta alguns des suẑestons, ma bu kontinua tene medu garandi di da kumentariu mas di un o dus bias? Tene sertesa di kuma Jeova na da balur pa bu sforsu garandi di fasi ke ku bu pudi. (Luk 21:1-4) Jeova ka ta pidinu fasi mas di ke ku no pudi fasi. (Fil 4:5) Jubi ke ku bu pudi fasi, fiksa un objetivu di fasil, i fasi orason pa tene un korson kalmu. Na kumsada, objetivu pudi sedu di da un kumentariu kurtu.

ANIMA N̈UTRU NA UN KONGREGASON GARANDI

9. Pabia ki pudi sedu difisil pa da kumentarius na kongregasons garandi?

⁹ Si bu kongregason tene manga di publikaduris, bu pudi tene utru situason difisil. Talves manga di ermons ku irmas ta yalsa mon pa kumenta, i bu ka ta comadu sempri. Pur isemplu, Danielle gosta sempri di da kumentariu na runions.c I ta ojal suma un kusa ku fasi parti di si adorason, i un manera di anima utrus i torna si fe mas forti na ke ku Biblia ta nsina. Ma, oca ki munda pa un kongregason mas garandi, e ka ta comal tudu ora i utrora e ka ta comal duranti tudu runion. I fala sin: “N fikaba mal, N sinti suma si N pirdi un privileẑiu. Ora ki kontisi manga di bias, bu ta kumsa ku punta si e fasil pabia e misti.”

10. Kuma ku no pudi aumenta oportunidadi di da kumentariu?

¹⁰ Sera ki bu ciga ja di sinti suma Danielle? Si bu ciga di sinti sin, talves bu na misti para da kumentariu i sinta so pa ba ta obi runion. Ma, ka bu para yalsa mon pa da kumentariu. Ke ku bu pudi fasi? Talves ke ku pudi judau i purpara diferentis kumentariu pa kada runion. Si bu ka comadu pa da kumentariu na kumsada di studu, bu tene inda oportunidadi di da kumentariu nkuantu runion ka kaba inda. Ora ku bu na purpara studu di Sintinela, pensa na kuma ku kada paragrafu sta ligadu ku tema di studu. Si bu fasi kila, talves bu na tene bon kumentariu ku bu pudi da duranti studu. Tambi, bu pudi purpara pa kumenta na paragrafus ku tene nsinus di Biblia mas difisil di splika. (1 Kor 2:10) Pabia? Pabia i pudi ten puku jintis ku na yalsa mon na ki parti. Ma ke gora si kontra bu aplika es suẑestons, ma bu nota di kuma dipus di manga di runions bu kontinua ka tene inda oportunidadi di da kumentariu? Bu pudi papia ku kin ku na diriẑi antis di runion i kontal kal purgunta ku bu misti ruspundi.

11. Ke ku Filipensis 2:4 falanu pa no fasi?

¹¹ Lei Filipensis 2:4. Bas di orientason di spiritu santu, apostolu Paulu fala kristons pa e jubi pa interesi di utrus. Kuma ku bu pudi aplika es konsiju duranti runions? I ora ku bu lembra di kuma utrus tambi misti kumenta suma bo.

12. Kal ki un bon manera di anima utrus na runions? (Jubi tambi foto.)

¹² Pensa so nes. Ora ku bu na papia ku bu amigus, sera ki bu na toma konta di kombersa i da elis puku oportunidadi di papia? Ku sertesa bu ka na fasi kila! Bu na misti pa e papia tambi. Di mesmu manera, no misti pa manga di jintis kumenta na runions. Na bardadi, un di minjor manera di anima no ermons ku irmas, i da elis oportunidadi di papia di se fe. (1 Kor 10:24) No jubi kuma ku no pudi fasi kila.

13. Kuma ku no pudi disa pa manga di jintis da kumentariu?

¹³ Un di kusas ku no pudi fasi, i da kumentarius kurtu, kila na pirmiti pa manga delis partisipa. Ansions ku utrus publikaduris ku tene spiriensia pudi da isemplu nes asuntu. Nin si bu da kumentariu kurtu, ivita papia di manga di pontus. Si bu papia di tudu kusa ku sta na paragrafu, i na sobra puku kusas pa utrus kumenta. Pur isemplu, es paragrafu da dus suẑestons, ku sedu, da kumentarius kurtu i ivita papia di manga di pontus. Si abo i purmeru algin ku comadu pa kumenta nes paragrafu, pabia ku bu ka na papia so di un des pontus?

14. Ke ku pudi judanu disidi kantu bias ku no na yalsa mon? (Jubi tambi foto.)

¹⁴ Jiresa pudi judau disidi kantu bias ku bu na yalsa mon pa kumenta. Si no yalsa mon manga di bias, no pudi pui pa kin ku na diriẑi sinti presionadu pa comanu sempri, mesmu si utrus ka tene oportunidadi di kumenta. Kila pudi disanima utrus pa e ka yalsa mon. — Ekl 3:7.

15. (a) Kuma ku no dibi di reaẑi si no ka comadu pa da kumentariu? (b) Kuma ku kilis ku ta diriẑi runion pudi pensa na kada kin ku sta na runion? (Jubi kuadru “Si bu sta na diriẑi runion.”)

¹⁵ Ora ku manga di publikaduris yalsa mon duranti un studu, talves no ka na konsigi ruspundi manga di bias suma ku no misti. Utrora kin ku na diriẑi studu pudi ka konsigi comanu. Es pudi disanima, ma no ka dibi di fika mal si no ka comadu. — Ekl 7:9.

16. Kuma ku no pudi anima kilis ku kumenta?

¹⁶ Si bu ka konsigi kumenta manga di bias suma ku bu misti, pabia ku bu ka na sukuta diritu ora ku utrus na kumenta i dipus di runion ngaba elis pa se kumentariu? Ora ku bu ngaba bu ermons ku irmas, e pudi sinti animadu suma ke na sintiba si bu da kumentariu. (Dit 10:21) Ngaba utrus i utru manera di anima n̈utru.

UTRU MANERA DI ANIMA N̈UTRU

17. (a) Kuma ku papes pudi juda se fijus purpara kumentarius ku na da ku se idadi? (b) Di akordu ku video, kal kuatru kusa ki pirsis fasi pa purpara pa kumentariu? (Jubi tambi nota.)

¹⁷ Kal utru kusa ku no pudi fasi pa anima n̈utru na no runions? Si abo i pape o mame, juda bu fijus purpara kumentarius ku na da ku se idadi. (Mat 21:16) Utrora asuntus seriu, suma purblemas na kasamenti o asuntus di moral pudi faladu del duranti studu, ma i pudi ten un o dus paragrafu ku un mininu pudi kumenta. Tambi juda bu fijus ntindi pabia ki ka tudu ora ke na comadu ora ke yalsa mon. Splika es, pudi juda elis pa e ka fika mal ora ku utrus comadu, ma e ka comadu. — 1 Tim 6:18.d

18. Kuma ku no pudi ivita coma atenson pa no kabesa ora ku no na kumenta? (Ditus 27:2)

¹⁸ Anos tudu no pudi purpara bon kumentarius ku na ngaba Jeova i anima no kumpañeris na fe. (Dit 25:11) Di un tempu pa utru, no pudi papia un bokadu di no spiriensia, ma no dibi di ivita papia ciu di no kabesa. (Lei Ditus 27:2; 2 Kor 10:18) En ves di kila, no ta sforsa pa konsentra na Jeova, na si Palabra i na tudu si povu. (Apok 4:11) Ma, si purgunta di un paragrafu falanu pa no konta no spiriensia, i bon pa no fasil. Un isemplu des, sta na ultimu paragrafu des studu.

19. (a) Kal ku na sedu rusultadu ora ku no pensa na tudu kilis ku bin mati runion? (Romanus 1:11, 12) (b) Ke ku bu mas gosta del, aserka di kumenta na runions?

¹⁹ I ka ten regras di kuma ku no na kumenta, ma anos tudu no pudi sforsa pa anima n̈utru. Es pudi signifika kumenta mas di ki un bias. O i pudi signifika kontenti ku oportunidadi ku no tene di kumenta, i kontenti di kuma utrus tambi tene oportunidadi di kumenta. Si no konsentra na interesi di utrus na runions di kongregason, anos tudu no na pudi “fortifika n̈utru”. — Lei Romanus 1:11, 12.