STUDU 37
Konfia na Jeova suma Sanson
“SIÑOR Deus, N pidiu pa bu lembra di mi, bu dan forsa.” — ŜEF 16:28.
KANTIKU 30 Meu Deus, Meu Amigo e Pai
KE KU NO NA BIN FALA DELa
1-2. Pabia ku no dibi di studa storia di Sanson?
KE KU bu ta pensa nel ora ku bu obi nomi di Sanson? Talves bu na pensa na un omi ku tene manga di forsa. I bardadi. Ma Sanson toma mau disison ku pul sufri ciu. Ma mesmu asin, Jeova konsentra na tudu ke ku Sanson fasi pa sirbil. Tambi Deus pui isemplu fiel di Sanson na Biblia pa no benefisiu.
2 Jeova usa Sanson pa i fasi kusas garandi pa juda si povu ki kuji, ku sedu Israel. Manga di anus dipus ku Sanson muri, Jeova nspira apostolu Paulu pa i pui nomi di Sanson na lista di jintis di fe. (Eb 11:32-34) Isemplu di Sanson pudi nkoraẑanu. I konfia na Jeova, te mesmu na situasons difisil. Nes studu no na fala di ke ku no pudi aprindi di isemplu Sanson i kuma ki pudi nkoraẑanu.
SANSON KONFIA NA JEOVA
3. Kal tarbaju ku Sanson dadu pa fasi?
3 Kontra Sanson padidu, filisteus staba na manda riba di nason di Israel i e na kastigaba elis. (Ŝef 13:1) Israelitas staba na sufri ciu, pabia filisteus seduba mau dimas. Jeova kuji Sanson pa “kumsa libra Israel na mon di filisteus.” (Ŝef 13:5) Es seduba un tarbaju difisil. Pa fasi es tarbaju difisil, Sanson dibi di konfiaba na Jeova.
Sanson konfia na Jeova i staba dispostu pa fasi mudansa. I usa ke ki teneba pa fasi vontadi di Jeova. (Jubi paragrafu 4-5)
4. Kuma ku Jeova juda Sanson pa i libra si kabesa di filisteus? (Ŝefis 15:14-16)
4 No jubi isemplu di kuma ku Sanson konfia na Jeova i na si ajuda. Un bias, tropas filisteus bai pa paña Sanson na un kau comadu Leí, ku talves sta na Judá. Omis di Judá mediba. Pa kila, e disidi ntrega Sanson pa inimigus. Propi povu di Sanson maral risu ku dus korda nobu i e lebal pa filisteus. (Ŝef 15:9-13) Ma, “Spiritu di Deus bin riba del ku forsa” i Sanson sapa ki kordas i salva si kabesa. Dipus i “oja un os di keŝada di buru ku ka muitu tarda ki muri,” i tomal, i usal pa mata mil omis filisteus! — Lei Ŝefis 15:14-16.
5. Kuma ku Sanson mostra di kuma i tene konfiansa na Jeova, manera ki usa os di keŝada di buru?
5 Pabia ku Sanson usa os di keŝada di buru? I ka seduba un arma di gera ku ta usaduba! Sanson sibiba di kuma, pa sai ben i dipindi di Jeova i ka di ki arma ki usa. Es omi di fe usa ke ki teneba pa fasi vontadi di Jeova. Sanson mata tudu ki omis, pabia i konfiaba na Jeova!
6. Ke ku no pudi aprindi di isemplu di Sanson ora ku no dadu un disignason na organizason di Jeova?
6 Jeova tambi pudi danu forsa ku no pirsisa del pa kumpri kualker disignason ku no risibi, mesmu si no pensa di kuma i difisil. Deus pudi judanu di un manera ku no ka speraba. Tene sertesa di kuma Jeova, ku daba Sanson puder, i pudi judau fasi si vontadi si bu konfia na si ajuda. — Dit 16:3.
7. Kal isemplu ku ta mostra di kuma i importanti pa no buska orientason di Jeova?
7 Manga di ermons ku irmas ku tarbaja pa kumpu no kaus di adorason, mostra se konfiansa na Jeova. Na pasadu, ermons kustumaba fasi planta i kumpu maioria di nobu Salons di Renu ku utrus kaus di adorason. Ma, suma manga di jintis sta na batisa, organizason di Jeova pirsisa di fasi mudansas. Ermons ku ta toma diantera buska orientason di Jeova na orason. Tambi e spurmenta nobu maneras di fasi kusas, suma kumpra kaus ku kumpuduba ja i dipus renova elis. Robert, ku tarbaja nes ultimu anus na manga di no projetus di konstruson na mundu ntidu, fala sin: “Na kumsada, i ka seduba fasil pa alguns ermons fasi kusas di nobu manera. I seduba diferenti ciu di kuma ku no kustumaba fasi pa manga di anus. Ma, ermons staba dispostu pa adapta. Tambi i seduba klaru di kuma, Jeova sta na bensua es mudansas.” Es i so un isemplu di kuma ku Jeova sta na orienta si povu pa fasi si vontadi. Di un tempu pa utru, anos tudu no dibi di punta no kabesa: ‘Sera ki N ta buska orientason di Jeova i sta dispostu pa fasi mudansas pa sirbil di minjor manera?’
SANSON APRUVEITA DI KUSAS KU JEOVA FASI
8. Oca Sanson tene sedi di yagu dimas, ke ki fasi?
8 Talves bu na lembra di kusas garandi ku Sanson fasi. I mata un lion, i mas tardi i mata 30 filisteus na sidadi di Askelon. (Ŝef 14:5, 6, 19) Sanson sibiba di kuma nunka i ka na ciga di fasi es kusas sin ajuda di Jeova. Es notadu oca ki teneba sedi di yagu dimas, dipus di mata mil filisteus. Ke ki fasi? En ves di buska yagu pa bibi, i pidi Jeova pa i dal yagu. — Ŝef 15:18.
9. Ke ku Jeova fasi oca Sanson pidil ajuda? (Ŝefis 15:19)
9 Jeova ruspundi pididu di Sanson, i fasi milagri, i dal yagu pa i bibi. Oca ku Sanson bibi, “si forsa riba; i sinti mas vida.” (Lei Ŝefis 15:19.) Parsi kuma, es nobu fonti kontinua pa manga di anus, te kontra profeta Samuel nspiradu skirbi livru di Ŝefis. Israelitas ku oja es yagu, talves pudi lembra di kuma, si servus fiel di Jeova konfia nel, i na juda elis ora ke pirsisa.
Sanson tene mas forsa oca ki bibi yagu ku Jeova dal. Anos tambi, no pirsisa di seta ajuda di Jeova pa kontinua fiel. (Jubi paragrafu 10)
10. Ke ku no dibi di fasi pa risibi ajuda di Jeova? (Jubi tambi fotos ku diseñu.)
10 Anos tambi no pirsisa di buska ajuda di Jeova, i ka mporta kapasidadi ku no tene o ke ku no fasiba ja na si sirvisu. No dibi di seta ku umildadi di kuma no pudi sai ben so si no konfia na Jeova. Suma ku Sanson tene forsa oca ki bibi yagu ku Jeova dal, anos tambi no pudi tene forsa spiritual si no seta ajuda di Jeova pa kontinua fiel. — Mat 11:28.
11. Kuma ku no pudi apruveita diritu di ajuda ku Jeova ta danu? Bu pudi da un isemplu.
11 No jubi isemplu di Aleksey, un di no ermons na Rusia ku sta na pasa pa pirsigison garandi. Ke ku judal nguenta situasons difisil dimas? El ku si minjer e ta studa Biblia i adora Jeova sempri. I fala sin: “N ta sforsa pa kontinua fasi ña studu pesual i lei Biblia kada dia. Kada parmaña, ami ku ña minjer no ta lei testu di dia i no ta ora Jeova juntu.” Ke ku es ta nsinanu? En ves di no konfia na no kabesa, no dibi di konfia na Jeova. Kuma ku no pudi fasil? No pudi fasil, ora ku no ta fasi sempri kusas ku ta torna no fe forti, suma studa Biblia, ora, mati runions i prega. Dipus, Jeova na danu ajuda ku no pirsisa del pa no kontinua sirbil. Jeova da Sanson forsa, tambi i pudi danu forsa.
SANSON KA DISISTI
12. Kal mau disison ku Sanson toma, i kuma ku si relasionamentu ku Dalila sedu diferenti?
12 Sanson seduba imperfeitu suma nos. E ku manda, utrora i toma mau disisons. I tenba un disison ki toma ku lebal na mau rusultadus. Dipus ku Sanson sirbi suma ŝef pa un tempu, “i bin gosta di un minjer comadu Dalila, ku mora na kobon di Soreki”. (Ŝef 16:4) Antis, Sanson tomaba kumprumisu di kasa ku un minjer filisteu, ma i Jeova ku staba “na tarbaja ne kusa pabia i na buskaba manera di geria ku filisteus.” Dipus, Sanson fika na kasa di un minjer di mau vida na un sidadi filisteu comadu Gaza. Un bias Deus da Sanson forsa di rinka portons di sidadi, i asin nfrakisi sidadi. (Ŝef 14:1-4; 16:1-3) Ma situason di Dalila seduba diferenti, pabia talves i seduba israelita.
13. Ke ku Dalila fasi ku pui Sanson sta na mau situason?
13 Dalila seta pa filisteus dal manga di diñeru pa i pudi trai Sanson. Sera ki i gostaba di Dalila pur dimas, tok i ka nota ke ki Dalila mistiba fasi? I ka mporta si sedu sin o nau, Dalila nsisti pa Sanson kontal nunde ki sai ku forsa. Sanson kaba pa kontal. Infilismenti, Sanson pui si kabesa na un situason ku lebal pirdi si forsa i pirdi fabur di Jeova pa un tempu. — Ŝef 16:16-20.
14. Ke ku kontisi ku Sanson manera ki konfia na Dalila?
14 I kontisi un kusa tristi ku Sanson, manera ki konfia na Dalila en ves di konfia na Jeova. Filisteus paña Sanson e rinkal ujus. E prindil na prison di Gaza nunde ki rinkaba portons. E pul pa i sedu skravu pa i ba ta pila trigu. Dipus e umilial oca ku filisteus junta pa fasi un festa. E fasi un sakrifisiu garandi pa se deus falsu comadu Dagon, pabia e fiaba di kuma i el ku juda elis pa paña Sanson. E tira Sanson di prison, e lebal pa festa pa i “fasi tiatru” se dianti pa e pudi gozal. — Ŝef 16:21-25.
Jeova da Sanson forsa pa i tisi si julgamentu kontra filisteus. (Jubi paragrafu 15)
15. Kuma ku Sanson mostra di kuma i konfia mas na Jeova? (Ŝefis 16:28-30) (Jubi diseñu ku sta na kapa.)
15 Sanson fasi un eru garandi, ma i ka disisti. I buska oportunidadi pa ngaña gera kontra filisteus, kusa ku Jeova mistiba pa i fasi. (Lei Ŝefis 16:28-30.) Sanson pidi Jeova pa i “vinga filisteus.” Deus di bardadi ruspundi pididu di Sanson, i dal mas forsa garandi. Pa kila, Sanson mata mas filisteus e bias di ki antis.
16. Ke ku no pudi aprindi di eru di Sanson?
16 Mesmu manera ku Sanson sufri ciu pabia di si eru, i kontinua sforsa pa fasi vontadi di Jeova. Nin si no yara i no pirsisa di reprendidu o pirdi un privileẑiu, no ka dibi di disisti. Lembra kuma Jeova sta pruntu pa purdanu. (Sal 103:8-10) Mesmu ku no erus, Jeova pudi danu forsa pa fasi si vontadi, suma ki fasi ku Sanson.
Talves Sanson sintiba mal dimas pabia di si eru, ma i ka disisti, anos tambi no ka dibi di disisti. (Jubi paragrafu 17 ku 18)
17-18. Pabia ku isemplu di Michael sedu nkoraẑanti pa bo? (Jubi tambi fotos.)
17 Jubi isemplu di un ermon joven comadu Michael. I staba okupadu na sirvisu di Jeova. I ta sirbiba suma servu ministerial i pioneru regular. Ma, infilismenti, i bin fasi un eru, i kila pui pa i pirdi privileẑius na kongregason. I fala sin: “N staba okupadu dimas na ña sirvisu pa Jeova. Di repenti, N sinti di kuma N ka pudi fasi nada na ña sirvisu pa Jeova. Nunka N pensa di kuma Jeova na bandonan. Ma, N ta puntaba si ña amisadi ku el na sedu suma antis, o si un dia N na konsigi sirbil na kongregason suma antis.”
18 Filismenti, Michael ka disisti. I fala mas asin: “N ta ora sempri di fundu di korson, studa i pensa fundu. Kila judan torna tene mas amisadi ku Jeova.” Ku tempu, Michael tene mas un bon nomi na kongregason. Gosi i sta na sirbi suma ansion i pioneru regular. I fala sin: “Apoiu ku nkoraẑamentu ku N risibi, prinsipalmenti di ansions, judan oja di kuma Jeova kontinua aman. N pudi mas sirbil na kongregason ku konsiensia limpu. Spiriensia ku N pasa nsinan di kuma, Jeova na purda kualker algin ku ripindi di bardadi.” No pudi tene konfiansa di kuma, Jeova na usanu i na bensuanu mesmu si no yara, si kontra no fasi tudu ku no pudi pa kuriẑi no erus i no kontinua konfia nel. — Sal 86:5; Dit 28:13.
19. Kuma ku isemplu di Sanson nkoraẑau?
19 Nes studu, no fala di alguns kusas interesanti ku pasa na vida di Sanson. I ka seduba perfeitu. Ma, i ka disisti di sirbi Jeova mesmu dipus di si eru ku Dalila. Tambi Jeova kontinua usa Sanson. I usal mas, di un manera puderosu. Jeova kontinua ojal suma un omi di tene fe garandi. I pui si nomi na lista di servus fiel ku sta na Ebreus kapitulu 11. I ta nkoraẑanu ciu sibi di kuma, no sta na sirbi no Pape ku sta na seu ku amanu ciu, ku tene diseẑu garandi di danu forsa, prinsipalmenti ora ku no sta fraku! Suma Sanson, no pudi fala Jeova: “N pidiu pa bu lembra di mi, bu dan forsa”. — Ŝef 16:28.
KANTIKU 3 Jeová, Minha Força e Esperança
a Sanson i nomi di un algin ku faladu del na Biblia ku manga di jintis kunsi, te mesmu jintis ku ka kunsi Biblia diritu. Si storia ta faladu del na tiatrus, musikas ku filmis. Ma, si vida ka sedu so un storia interesanti. No pudi aprindi ciu ku es omi ku tene fe garandi.