BIBLIOTEKA NA INTERNET di Watchtower
BIBLIOTEKA NA INTERNET
di Watchtower
Kriol di Gine-Bisau
N̈, n̈, Ŝ, ŝ, Ẑ, ẑ
  • N̈
  • n̈
  • BIBLIA
  • PUBLIKASONS
  • RUNIONS
  • w23 Dizembru pp. 14-17
  • Sedu giadu pa manera ku Deus ta oja bibidas alkoliku

I ka ten ni un video dispunivel nes parti ku bu kalka.

Diskulpa, i ten un eru oca ku bu na tenta yabri video.

  • Sedu giadu pa manera ku Deus ta oja bibidas alkoliku
  • Sintinela ta Fala di Renu di Jeova (Sintinela di Studu) — 2023
  • Subtitulus
  • Materia di mesmu asuntu
  • KE KU BIBLIA FALA ASERKA DI BIBIDAS ALKOLIKU?
  • PENSA NA PABIA KU BU NA BIBI I NA KAL MUMENTU O KAL KUANTIDADI KU BU NA BIBI
  • Kuma ku kristons dibi di oja bibida alkoliku?
    Bu Pudi Tene un Vida Filis pa Sempri! — Benefisia di Studu di Biblia
  • N dibi di bibi o nau?
    Jovens Ta Punta
Sintinela ta Fala di Renu di Jeova (Sintinela di Studu) — 2023
w23 Dizembru pp. 14-17
Tris ermons sta na kume na un restauranti. Un ermon ka tene bibida alkoliku, nkuantu ku ki dus tene bibidas alkoliku. Minjer ku ta sirbi na mesa sta na toma nota di pididus. Ermon ku ka tene bibida alkoliku nega ku rispitu, nkuantu ku un ermon ku tene bibida alkoliku pidi mas utru.

Sedu giadu pa manera ku Deus ta oja bibidas alkoliku

SIN duvida, bu da balur pa manga di prendas ku Jeova dau, i bu sta kontenti pa manera ki dau liberdadi di disidi kuma ku bu pudi usa es prendas. Interesanti i di kuma, Biblia fala di kuma biñu i un prenda ku bin di Jeova. I fala sin: “Festa i pa ri; biñu ta pui jintis kontenti”. (Ekl 10:19; Sal 104:15) Ma, talves bu nota di kuma i ten jintis ku tene purblema ku bibidas alkoliku. Tambi jintis na mundu ntidu tene diferenti manera di pensa aserka di bibidas alkoliku. Ke ku pudi juda kristons toma bon disisons aserka di bibidas alkoliku?

I ka mporta nunde ku no mora o kuma ku no kriadu, no dibi di disa pa manera di pensa di Deus gia no pensamentu ku no disisons. Si no fasi kila, es na judanu sedu mas filis.

Suma ku bu pudi nota, manga di jintis na mundu ta bibi sempri, tambi e ta bibi ciu. Talves alguns ta bibi pabia i ta fasi elis sinti ben. Utrus ta bibi pa pudi para pensa na se purblemas. Na sertus kaus, jintis ta pensa di kuma si un algin ta bibi ciu i sinal di kuma i maduru o i forti.

Ma, kristons tene bon orientason di se Deus ku ama elis. Pur isemplu, i avisanu aserka di mau rusultadu di bibi ciu. Talves bu lei Ditus 23:​29-35 ku fala di un camidur i di alguns purblemas ki tene pabia di cami.a Daniel, un ansion na Europa lembra di kuma ku si vida seduba antis di torna un kriston di bardadi. I fala sin: “N kustumaba bibi ciu, i kila leban na toma mau disisons. Pabia di kila, N sufri ciu i N ta sinti tristi ora ku N pensa na ke ku pasa.”

Kuma ku no pudi toma bon disison aserka di bibidas alkoliku i ivita purblemas ku bibi ciu ta tisi? No dibi di disa pa pensamentu di Deus gia no disisons ku asons.

No jubi ke ku Biblia fala aserka di bibidas alkoliku i motivus ku pui jintis ta bibi.

KE KU BIBLIA FALA ASERKA DI BIBIDAS ALKOLIKU?

Palabra di Deus ka tuji bibi di un manera justadu. Na bardadi, Biblia rikuñisi di kuma bibi biñu pudi da kontentamentu. I fala sin: “Kume ku alegria; bu bibi bu biñu ku gustu”. (Ekl 9:7) Jesus ta bibi utrora, tambi utrus servus fiel di Jeova ta bibi. — Mat 26:​27-29; Luk 7:34; 1 Tim 5:23.

Palabra di Deus ka kondena bibi alkol, ma i kondena cami. I fala sin: “Ka bo cami biñu”. (Ef 5:18) Te mesmu i fala di kuma “camiduris . . . ka na ten parti na renu di Deus.” (1 Kor 6:10) Jeova kondena bibi ciu ku cami. En ves di so sigi ke ku utrus jintis ta fasi, no ta toma disison ku na kontenta Deus.

I ten kilis ku ta pensa di kuma e pudi bibi manga di kuantidadi di bibidas alkoliku sin cami. Ma es i pirigosu dimas. Biblia mostra di manera klaru di kuma, “bibi biñu ciu” pudi leba un omi (o minjer) fasi erus gravi i dana si amisadi ku Jeova. (Titu 2:3; Dit 20:1) Te mesmu Jesus avisa di kuma “bibidera” pudi tuji algin yentra na nobu mundu di Deus. (Luk 21:​34-36) Ma, ke ku un kriston pudi fasi pa ivita purblemas ku pudi kontisi pabia di bibi bibidas alkoliku?

PENSA NA PABIA KU BU NA BIBI I NA KAL MUMENTU O KAL KUANTIDADI KU BU NA BIBI

Ora ku no na toma disisons aserka di bibidas alkoliku, i pirigosu pensa so na ke ku maioria di jintis di no kultura ta fasi. Kristons ta toma bon disison ku na kontenta Jeova na asuntu di kumida ku bibida. Biblia falanu asin: “Nin si bo na kume, o bo na bibi, o bo na fasi kalker utru kusa, bo fasi tudu pa gloria di Deus.” (1 Kor 10:31) Gosi no na jubi alguns purguntas ku prinsipius di Biblia:

Sera ki N ta bibi bibidas alkoliku pa utrus pudi gosta di mi? Saida 23:2 fala sin: “Ka bu pega tras di maioria”. Li, Jeova sta na avisa israelitas pa e ka kopia jintis ku ka ta kontental. Es tambi i un bon avisu pa kristons aos. Si no disa pa jintis influensia no pensamentu ku no disisons aserka di bibidas alkoliku, no pudi puku puku lunjusi di Jeova ku si normas. — Rom 12:2.

Sera ki N ta bibi bibidas alkoliku pa mostra di kuma N sedu forti? Na alguns kulturas, jintis kustuma bibi sempri i bibi ciu, i utrus ta ojal suma normal. (1 Ped 4:3) Ma, nota ke ku 1 Koríntius 16:13 nkoraẑanu fasi: “Bo toma sintidu, bo fika firmi na fe. Bo sedu forti suma omi balenti.” Sera ki na bardadi bibidas alkoliku pudi juda algin sedu suma omi balenti? Nau, i ta fasi kontrariu. Ku fasilidadi, bibidas alkoliku pudi rapati kapasidadi ku un algin tene di pensa diritu i di fasi bon kusa. Pa kila, bibi ciu ka ta mostra di kuma un algin i forti. Ma, i ta mostra di kuma i fraku. Isaias 28:7 fala di un algin ku sta na konfuson, pabia di biñu i na singa-singa i ntrumpi.

Forsa di bardadi bin di Jeova, i pa tenel i pirsis toma sintidu i fika firmi na fe. (Sal 18:32) Un kriston di bardadi pudi fasi es ora ki kontinua sta atentu i toma disisons ku ka na dana si amisadi ku Jeova. Jesus mostraba es tipu di forsa oca ki staba na Tera. Manga di jintis rispital pabia i seduba koraẑosu i disididu pa fasi ke ki sertu.

Sera ki N ta bibi bibidas alkoliku pa ka N kuda ciu ku ña purblemas? Un salmista inspiradu pa skirbi es palabras: “Oca ku N na kudaba ciu dimas, bu [ku sedu Jeova] konsolan, bu dan kontentamentu.” (Sal 94:19) Si un kusa sta na preokupau ciu, buska ajuda di Jeova, i ka na bibidas alkoliku. Un bon manera di fasil i ora sempri Jeova. Tambi, manga di jintis oja di kuma, buska bon konsiju na mon di un amigu maduru na kongregason, ta juda ciu. Na bardadi, bibi bibidas alkoliku pa pudi para pensa na purblemas, pudi rapati forsa di un algin di fasi ke ki sertu. (Ose 4:11) Daniel ku faladuba del na kumsada fala sin: “N ta lutaba ku manga di kudadi i ku sentimentu di kulpa. N ta bibiba ciu pa rapati ña preokupasons, ma kila aumenta ña purblemas. N pirdi amigus i N pasa ka gosta di ña kabesa.” Ke ku bin juda Daniel? I fala sin: “N nota di kuma N pirsisaba di ajuda di Jeova, i ka di bibidas alkoliku. Oca N fasil, N konsigi lida ku ña purblemas i kaba ku elis. Bardadi i di kuma, Jeova sta sempri pruntu pa judanu, mesmu si no situason parsi di kuma i ka tene speransa. — Fil 4:​6, 7; 1 Ped 5:7.

Un irma sta na si kasa i na pensa nkuantu i na jubi garafa di bibida alkoliku ku sta pertu del.

Si utrora bu ta bibi bibidas alkoliku, bu pudi jubi si bu pirsisa di fasi algun mudansa na kantu bias o kuantidadi ku bu ta bibi. Bu pudi punta bu kabesa: ‘Sera ki un membru di familia o un amigu intimu mostra preokupason aserka di kal mumentu o kal kuantidadi ku N ta bibi?’ Si sedu sin, es pudi mostra di kuma bu sta na tene un purblema ku bu ka nota del. ‘Sera ki N ta bibi mas di ki kil ku N kustuma bibi?’ Es pudi sedu situason di un algin ku kumsa ku visia ku bibidas alkoliku. ‘Sera ki i difisil pa N fika sin bibi pa alguns dias o pa manga di tempu?’ Si sedu asin, bibi pudi torna un visiu. Talves i na pirsis ajuda di un mediku pa pudi kaba ku es purblema.

Suma bibi pudi tisi manga di purblemas, alguns kristons disidi ka bibi nin un bibida alkoliku. Talves utrus ta disidi ka bibi pabia e ka gosta di si gustu. Si un di bu kumpañeris disidi ka bibi, bu pudi mostra bondadi, ora ku bu rispita si disison sin kritikal.

Talves bu nota di kuma pui limiti na kuantidadi ku bu na bibi ta mostra jiresa. O talves bu pudi pui regra aserka di kantu bias ku bu na bibi, i pudi sedu un bias na semana o un bokadu na ora di kume. Utrus ta pui limiti na tipu di bibida alkoliku ke na bibi, suma bibi un bokadu di biñu o serveẑa, ma e ka ta bibi bibida ku tene kuantidadi garandi di alkol o ku misturadu ku sumu o utru tipu di fruta. Si un algin pui limiti di manera klaru na asuntu di bibi, i na sedu mas fasil pa i sigil. Un kriston maduru ka ta preokupa ku ke ku utrus pudi pensa si i toma es disison, i si sta disididu pa sigi ke ki disidi.

Ora ku no na toma disisons aserka di bibidas alkoliku, no pirsisa tambi di pensa na kuma ku utrus ta sinti. Romanus 14:21 fala sin: “I minjor ka bu kume karni, nin bibi biñu, nin fasi utru kusa ku na pui bu ermon pa i kai na pekadu, o pa i fraksi.” Kuma ku bu pudi aplika es konsiju? I ora ku bu mostra amor pa bu ermons. Si bu pensa di kuma bibi bibida alkoliku pudi pui pa un algin fika mal, sera ki bu amor na lebau pa bu ka bibi si dianti? Si bu fasil, bu na mostra di kuma bu rispita sentimentus di utrus i bu ama elis, tambi bu mas ta preokupa ku elis di ki bu kabesa. — 1 Kor 10:24.

Tambi, guvernu pudi tene leis aserka di bibidas alkoliku. Un kriston dibi di obdisi es leis. Es leis pudi fala di kuma bu dibi di tene sertu idadi antis di kumsa bibi bibidas alkoliku. O es leis pudi tuji jintis bibi bibidas alkoliku ora ke na kurinti karu o usa sertu tipus di makina. — Rom 13:​1-5.

Jeova danu manga di prendas bonitu, i un delis i liberdadi di disidi kuma ku no na usa es prendas. Es nklui liberdadi di kuji ke ku no na kume i ke ku no na bibi. Pa no disisons mostra di kuma no da balur pa es liberdadi. No pudi fasil ora ku no usa es liberdadi pa kontenta no Pape ku sta na seu.

a Un organizason di saudi di Stadus Unidu fala di kuma, bibi ciu nin si un bias, pudi tisi purblema suma mata algin, mata bu kabesa, abusu seksual, violensia kontra bu parseru, pirdi bariga i fasi seksu ku pudi leba algin na preña sin misti i paña duensas ku ta kamba.

Disisons ku utrus ta toma

Tudu kristons ka na toma mesmu disison. Alguns pudi disidi bibi un kuantidadi limitadu di bibidas alkoliku ora ki pirsis. Utrus ta disidi ka bibi. Tambi suma ki notadu, manga di jintis ta fiksa se propi limiti. Un algin ka pirsisa di splika utrus pabia ki toma si disison. Pa utru ladu, no ka dibi di obriga utrus toma mesmu disison ku no toma. Nin no ka dibi di kritika utrus ku toma disisons diferenti di nos, si kontra prinsipius di Biblia ka violadu. (Rom 14:​1-6) No lembra di kuma kristons di bardadi ta sforsa pa buska pas ku union. — Rom 14:19.

    Publikasons na Kriol di Gine-Bisau (2000-2025)
    Sai
    Entra
    • Kriol di Gine-Bisau
    • Manda pa utru algin
    • Preferensias
    • Copyright © 2025 Watch Tower Bible and Tract Society of Pennsylvania
    • Termus di Usu
    • Pulitika di Privasidadi
    • Normas di Privasidadi
    • JW.ORG
    • Entra
    Manda pa utru algin