Sera ki bu tene fe?

Pa kontenta Jeova, no dibi di tene fe. Ma Biblia fala di kuma “i ka tudu ku ten fe.” (2 Tes 3:2) Apostolu Paulu staba na fala di “omis mau di fiu kabesa” ku staba na pirsigil. Ma ke ki fala aserka di fe, ta aplika tambi pa utrus jintis. Alguns ta nega provas klaru di kuma i ten un Deus ku kumpu tudu kusas. (Rom 1:20) Utrus pudi fala di kuma e fia na un kusa o na un algin ku mas tene puder. Ma ke ke fia nel i ka sufisienti pa tene fe ku na kontenta Jeova.

No pirsisa di sta konvensidu di kuma Jeova ten, tambi i ta da “pagamentu” pa kilis ku tene fe forti nel. (Eb 11:6) Fe fasi parti di frutu di spiritu santu di Deus. Pa tene spiritu santu, no pirsisa di ora Jeova pa i danu el. (Luk 11:​9, 10, 13) Un utru manera importanti di risibi spiritu santu, i lei Biblia ku skirbidu bas di orientason di spiritu di Jeova. Dipus no pudi pensa na ke ku no lei i tenta aplika ke ku no aprindi. Si no fasi es, no na disa pa spiritu di Jeova judanu vivi di un manera ku na mostra di kuma no tene fe ku na kontental.