Sera ki bu sta na sukuta avisus?

1. Kal julgamentu ku na bin fasidu nin i ka na tarda?

NO STA na vivi na un tempu nunde ki na ten mudansas garandi! I ka na tarda, Jesus na bin julga tudu jintis na Tera. Jesus kontanu ke ku na kontisi ora ku es julgamentu pertu. I da si disipulus “sinal” ku na mostra si prisensa ku ka ta ojadu ku tempu di fin des “mundu”. (Mat 24:3) Es profesia sta na Mateus kapitulu 24 ku 25, tambi i sta na Markus kapitulu 13 ku Lukas kapitulu 21.

2. Ke ku no na fala del nes studu i pabia ki na judanu?

² Jesus fala di tris komparasons pa judanu sta purparadu. Es komparasons i suma avisus pa nos. I komparasons aserka di karnelis ku kabras, virẑens jiru ku tulu ku sakus di uru. Kada komparason ta judanu ntindi di kuma Jesus na julga jintis di akordu ku ke ki fasi. Ora ku no na studa es komparasons, no na oja lisons ku no pudi aprindi i kuma ku no pudi aplika elis. Purmeru komparason ku no na fala del, i di karnelis ku kabras.

KARNELIS KU KABRAS

3. Na kal mumentu ku Jesus na bin julga jintis?

³ Na komparason di karnelis ku kabras, Jesus fala di kuma i na julga jintis di akordu ku se reason pa bon noba i di kuma ke trata si ermons unjidu. (Mat 25:​31-46) Es julgamentu na fasidu na fin di “garandi foronta”, puku antis di Armajedon. (Mat 24:21) Suma ku un bakiadur ta separa karnelis di kabras, Jesus na bin separa kilis ku ta apoia si sigiduris unjidu di kilis ku ka ta apoia elis.

4. Di akordu ku Isaias 11:​3, 4, pabia ku no pudi tene sertesa di kuma Jesus na bin julga jintis ku justisa? (Jubi tambi diseñu ku fotos .)

⁴ Profesia di Biblia mostra di kuma, suma i Jeova ku kuji Jesus pa sedu Juis, i na bin julga jintis ku justisa. (Lei Isaias 11:​3, 4.) I sta na jubi ke ku jintis ta fasi, pensa i papia, tambi kuma ke ta trata si ermons unjidu. (Mat 12:​36, 37; 25:40) Jesus na sibi ba kin ku apoia si ermons unjidu ku se tarbaju.a Un di maneras mas importanti ku kilis ku parsi ku karnelis ta apoia ermons di Kristu i ora ke juda elis na tarbaju di pregason. Kilis ku da es tipu di ajuda na julgadu suma “jintis justu” i e na tene speransa di “vida ku ka ta kaba” na Tera. (Mat 25:46; Apok 7:​16, 17) Es i un pagamentu garandi! Si e kontinua sedu fiel na garandi tribulason i dipus, se nomi na kontinua sta na “libru ku tene nomi di bibus”. — Apok 20:15.

5. Ke ku komparason di kabras ku karnelis ta nkoraẑanu fasi, i ba kin ku pudi benefisia des komparason?

⁵ Mostra di kuma bu sedu fiel. Komparason di Jesus aserka di karnelis ku kabras, konsentra mas na kilis ku tene speransa di vivi na Tera. E ta mostra se fe i ka so na juda ermons di Kristu na tarbaju di pregason, ma tambi e ta seta ku fidelidadi lideransa di grupusiñu di unjidus ku Jesus kuji. (Mat 24:45) Ma, kilis ku tene speransa di vivi na seu pirsisa tambi di sukuta avisu ku faladu del nes komparason. Pabia? Pabia Jesus ta jubi diritu ke ke ta fasi, ke ke ta pensa i ke ke ta papia. Elis tambi e dibi di mostra di kuma e sedu fiel. Na bardadi, Jesus fala di dus utrus komparasons ku tene avisu diretu pa unjidus. Es komparasons sta tambi na Mateus kapitulu 25. Gosi no na fala di komparason di virẑens jiru ku tulu.

VIRẐENS JIRU KU TULU

6. Kuma ku sinku virẑens mostra di kuma e sedu jiru? (Mateus 25:​6-10)

⁶ Na komparason di virẑens, Jesus fala di 10 virẑens ku bai kontra ku un noivu. (Mat 25:​1-4) Elis tudu e na peraba pa kumpaña noivu na si festa di kasamenti. Jesus fala di kuma sinku delis “jiru” i utrus sinku “tulu”. Virẑens jiru staba purparadu, tambi e staba atentu. E staba pruntu pa pera noivu te ora ki pirsis, mesmu si ciga altas ora. Pa kila, e tisi kanderus ku ta leba azeiti pa e pudi lumia elis na sukuru. Te mesmu e tisi utru azeiti si kontra noivu bin na tarda. Asin, e staba purparadu pa pui pa se kanderus kontinua sindi. (Lei Mateus 25:​6-10.) Kontra noivu ciga, virẑens jiru yentra ku el pa festa di kasamenti. Di mesmu manera, unjidus ku sta pruntu i fiel na tempu ku Kristu na bin, na mersi sta ku noivu, ku sedu Jesus, na si Renu ku sta na seu.b (Apok 7:​1-3) Ke gora di ki sinku virẑens tulu?

7. Ke ku kontisi ku sinku virẑens tulu i pabia di ke?

⁷ Sinku virẑens tulu ka staba pruntu suma ki sinku virẑens jiru, kontra ku noivu ciga. Se kanderus staba kuas pa paga i e ka tisiba utru azeiti. Kontra e obi di kuma noivu pertu ciga, e bai kumpra azeiti. E ka staba oca ku noivu ciga. Na ki mumentu, “kilis ku staba purparadu e yentra ku el pa festa; porta ficadu.” (Mat 25:10) Dipus, kontra ku virẑens tulu ciga, e mistiba yentra, ma noivu fala elis: “N ka kunsi bos.” (Mat 25:​11, 12) Ki virẑens ka staba pruntu pa pera noivu te ora ki pirsis. Ke ku unjidus pudi aprindi?

8-9. Ke ku unjidus pudi aprindi di komparason di virẑens? (Jubi tambi diseñu ku fotos.)

⁸ Mostra di kuma bu sta purpadu i bu sta atentu. Jesus ka staba na fala di kuma i na ten dus grupu di unjidus, un ku na sta purparadu pa pera te ora ku fin des mundu ciga, i utru ku ka na sta purparadu. En ves di kila, i staba na splika ke ku pudi kontisi ku unjidus ku ka sta purparadu pa kontinua sedu fiel te na fin. Si e ka sta pruntu, e ka na risibi se pagamentu. (Jon 14:​3, 4) Es i gravi dimas! Nin si no speransa i pa vivi na seu o na Tera, no dibi di sukuta diritu avisu ku faladu del nes komparason. Kada un di nos dibi di kontinua sta atentu i sta purparadu, pruntu pa nguenta te na fin. — Mat 24:13.

⁹ Dipus di fala di fala di komparason di virẑens pa mostra importansia di sta purparadu i atentu, Jesus fala di komparason di sakus di uru. Ki komparason na mostra importansia di pega tesu na tarbaju.

SAKUS DI URU

10. Kuma ku dus tarbajaduris mostra di kuma e sedu fiel? (Mateus 25:​19-23)

¹⁰ Na komparason di sakus di uru, Jesus fala di dus tarbajaduris ku sedu fiel pa se patron i di utru ku ka sedu fiel. (Mat 25:​14-18) Dus tarbajaduris mostra di kuma e sedu fiel, manera ke tarbaja duru pa aumenta diñeru di se patron. Antis di viaẑa pa fora i ntrega elis sakus di uru, un kuantidadi garandi di diñeru. Dus tarbajaduris pegaba tesu i e usaba diñeru diritu. Kal ku sedu rusultadu? Oca ku se patron riba, e aumentaba dus bias diñeru ki da elis. Patron ngaba elis, e ‘toma parti na kontentamentu di se patron.’ (Lei Mateus 25:​19-23.) Ma, ke gora di terseru tarbajadur? Ke ki fasi ku diñeru ku si patron dal?

11. Ke ku kontisi ku tarbajadur “prigisosu” i pabia di ke?

¹¹ Terseru tarbajadur risibi un saku di uru, ma i seduba “prigisosu.” Patron mistiba pa i usa diritu saku di uru. En ves di tarbaja, i nteral na con. Oca ku patron riba, es tarbajadur dal so un saku di uru. Tarbajadur ka teneba bon manera di pensa. En ves di pidi diskulpa pa manera ki ka aumenta diñeru di si patron, tarbajur coma si patron di “omi risu” o iziẑenti. Si patron ka ngabal. Fora di kila, i tomadu saku di uru dipus i serkadu di kasa di patron. — Mat 25:​24, 26-30.

12. Aos, ba kin ku na representa dus tarbajaduris fiel?

¹² Dus tarbajaduris fiel na representa kristons unjidu ku sedu fiel. Jesus, ku sedu patron fala elis pa e ‘toma parti na kontentamentu di se patron.’ E risibi se pagamentu na seu, ku sedu, purmeru resureison. (Mat 25:​21, 23; Apok 20:5b) Pa utru ladu, mau isemplu di tarbajadur prigisosu sedu un avisu pa unjidus. Pabia di ke?

13-14. Kal lison ku unjidus pudi aprindi di komparason di sakus di uru? (Jubi tambi foto ku diseñu.)

¹³ Mostra di kuma bu ta tarbaja duru. Na komparason di sakus di uru ku di virẑens, Jesus ka staba na fala di kuma unjidus na bin sedu prigisosu. Ma, i staba na fala di ke ku pudi kontisi si e pirdi se animu di tarbaja duru. E pudi ka konsigi ‘proba kuma na bardadi e comadu, i kujidu,’ tambi e ka na disadu yentra na Renu di seu. — 2 Ped 1:10.

¹⁴ Komparason di Jesus aserka virẑens ku sakus di uru mostra di manera klaru di kuma, tudu kristons unjidu dibi di sta purparadu i sta atentu, tambi e dibi di pega tesu na tarbaju. Ma, sera ki Jesus fala di utru kusa pa avisa unjidus? Sin, i fala! No pudi oja es avisu na Mateus 24:​40, 41.

KIN KU “NA LEBADU”?

15-16. Kuma ku Mateus 24:​40, 41 pudi juda unjidus oja di kuma, e pirsisa di kontinua sta atentu?

¹⁵ Antis di fala di tris komparasons, Jesus fala di ultimu julgamentu di unjidus ku na mostra ba kin ku na setadu. I fala di dus omis ku sta na tarbaja na matu ku dus minjeris ku sta na pila. Na tudu dus situason i parsi di kuma e sta na fasi mesmu tarbaju, ma Jesus fala di kuma un “na lebadu, utru na fikadu.” (Lei Mateus 24:​40, 41.) Dipus i da si sigiduris es avisu: “Bo toma sintidu, pabia bo ka sibi kal ora ku bo Siñor na bin.” (Mat 24:42) Jesus fala mesmu kusa dipus di konta komparason di virẑens. (Mat 25:13) Sera ki es palabras tene ligason? Parsi di kuma i tene. So kilis ku na bardadi sedu unjidus i ku sedu fiel ku “na lebadu” i risibidu pa Jesus na Renu di seu. — Jon 14:3.

¹⁶ Mostra di kuma bu sta atentu. Kualker unjidu ku ka kontinua sta atentu, ka na sta juntu ku “jintis ki kuji”. (Mat 24:31) Tambi, tudu kilis ku tene speransa di vivi na Tera dibi di kontinua sta atentu i kontinua sedu fiel.

17. Ke ku manda no ka dibi di fika dimiradu si Jeova disidi unji un algin na no tempu?

¹⁷ No kunsi Jeova diritu, pa kila, no konfia di kuma tudu ke ki i ta fasi i sertu. Pa kila, no ka ta fika dimiradu si kontra Jeova unji alguns kristons fiel na no tempu.c No ta lembra di ke ku Jesus fala aserka di tarbajaduris di 5 ora na komparason ki fasi di orta di uva. (Mat 20:​1-16) Kilis ku kumbidadu tarbaja mas tardi, risibi mesmu pagamentu ku kilis ku kumsa tarbaja mas sedu. Di mesmu manera, i ka mporta kal mumentu ku unjidus kujidu, e na risibi pagamentu na seu si e kontinua sedu fiel.

SUKUTA AVISUS

18-19. Ke ku no aprindi des komparasons?

¹⁸ Ke ku no aprindi? Pa kilis ku tene speransa di vivi pa sempri na Tera, komparason di karnelis ku kabras mostra di kuma, e pirsisa di kontinua sedu fiel pa Jeova gosi i na garandi tribulason ku na bin. Puku antis di Armajedon, Jesus na julga jintis fiel suma kilis ku mersi risibi “vida ku ka ta kaba.” — Mat 25:46.

¹⁹ No oja tambi dus komparasons ku da avisu pa unjidus. Na komparason ku Jesus fasi di virẑens, sinku delis sedu jiru. E staba purparadu i atentu, pruntu pa pera noivu te ora ki pirsis. Ma, virẑens tulu ka staba purparadu. Pa kila, noivu ka seta pa e yentra na si festa di kasamenti. Anos tambi no dibi di sta purparadu pa pera te ora ku Jesus tisi fin des mundu. Tambi, na komparason ku Jesus fasi di sakus di uru, no fala di dus tarbajaduris fiel ku tarbaja duru. E tarbaja duru pa se patron i kila ngaba elis. Ma, tarbajadur prigisosu serkadu. Ke ku no pudi aprindi? No dibi di manti okupadu na sirvisu di Jeova te na fin. Pa fin, no fala di kuma ku unjidus dibi di sta atentu pa e pudi bin “lebadu” pa Jesus na seu. E sta ku diseẑu garandi di pera tempu ke na ‘sta juntu’ ku Jesus na seu. Dipus di gera di Armajedon, e na bin sedu noiva di Kristu na kasamenti di Karnel. — 2 Tes 2:1; Apok 19:9.

20. Ke ku Jeova na fasi pa kilis ku sukuta si avisus?

²⁰ Tempu di julgamentu sta na pertusi kada bias mas, ma no ka tene motivu di medi. Si no kontinua sedu fiel, no Pape ku sta na seu na danu “puder” garandi dimas, pa no ‘pudi kapli i firma dianti di Fiju di omi,’ o julgadu suma algin bon (2 Kor 4:7; Luk 21:36) I ka mporta si no speransa i di vivi na seu o na Tera, no na kontenta no Pape, si no sukuta avisus ku sta na komparasons ku Jesus fasi. Pabia di bondadi di Jeova ku no ka mersi, no nomis na “ocadu skritu na libru” di vida. — Dan 12:1; Apok 3:5.