Kopia anjus fiel

1-2. (a) Di kal maneras ku no sedu diferenti ku anjus? (b) Di kal maneras ku no parsi ku anjus?

OCA Jeova tisiu pa bardadi, i kumbidau pa un familia garandi ku ta adoral i ku ta mostra amor. Milyons di anjus fasi parti des familia. (Dan 7:​9, 10) Ora ku no pensa na anjus, no pudi nota kuma ke diferenti ku nos. Pur isemplu, anjus kumpudu manga di tempu antis di pekaduris kumpudu. (Jo 38:​4, 7) E mas nos tene puder. Tambi e sedu santus i justus mas di ki nos, pabia no sedu jintis imperfeitu. — Luk 9:26.

² Ma, mesmu kes diferensas, no tene manga di kusas ku no parsi ku anjus. Pur isemplu, suma anjus, no pudi kopia bon maneras di sedu di Jeova. No tene liberdadi di kuji suma ku anjus tene. Suma anjus, kada un di nos tene si nomi, diferentis manera di sedu ku diferenti responsabilidadis na sirvisu di Jeova. Tambi no tene nesesidadi di adora kin ku kumpunu, suma anjus. — 1 Ped 1:12.

3. Ke ku no pudi aprindi di anjus fiel?

³ Suma no tene manga di kusas ku no parsi ku anjus, se bon isemplu pudi nkoraẑanu i nsinanu manga di kusas importanti. Nes studu, no na fala di kuma ku no pudi kopia umildadi di anjus fiel, se amor pa jintis, kuma ke ta nguenta ku tarbaju ke ta fasi pa manti kongregason limpu.

ANJUS I UMILDI

4. (a) Kuma ku anjus ta mostra umildadi? (b) Pabia ku anjus sedu umildi? (Salmu 89:7)

⁴ Anjus fiel i umildi. Mesmu manera ke tene manga di spiriensia, puder ku jiresa, e ta fasi ke ku Jeova fala elis. (Sal 103:20) Ora ke na kuida di se responsabilidadis, e ka ta ngaba se kabesa o mostra di kuma e mas pekaduris tene puder. E ta kontenti di fasi vontadi di Jeova, mesmu si utrus ka kunsi se nomi.a (Kum 32:​24, 29; 2 Re 19:35) E ta nega risibi gloria ku dibi di bai pa Jeova. Pabia ku anjus sedu umildi? Pabia e ama Jeova i e rispital ciu. — Lei Salmu 89:7b.

5. Kuma ku un anju mostra umildadi oca i na kuriẑi apostolu Jon? (Jubi tambi diseñu.)

⁵ Jubi es isemplu ku mostra di kuma anjus sedu umildi. Serka di 96 EK, un anju ku si nomi ka kunsidu mostra apostolu Jon kusas dimiradu. (Apok 1:1) Ke ku Jon fasi oca ki oja es kusas dimiradu? I mborka pa adora anju. Ma, ki anju falal logu pa i para. I fala sin: “Jubi, ka bu fasi asin. Ami N sta na tarbaju di Deus suma bo ku bu ermons . . . Adora Deus”. (Apok 19:10) Es anju seduba umildi dimas! I ka mistiba ngabadu. I fala Jon logu pa i adora Jeova Deus. Tambi, anju ka pensa di kuma i mas importanti di ki Jon. Mesmu manera ku anju mas tarda na sirbi Jeova i mas tene puder di ki Jon, ku umildadi i fala di kuma i sta na tarbaju di Deus suma Jon. Tambi, mesmu manera ku anju tenba ku kuriẑi Jon, i ka tratal di manera duru. Ma, anju papia ku el ku bondadi. Talves i ntindiba di kuma Jon fikaba so dimiradu ku kusas ki oja.

6. Kuma ku no pudi kopia umildadi di anjus?

⁶ Kuma ku no pudi kopia umildadi di anjus? Anos tambi no misti tarbaja risu na sirvisu di Jeova sin ngaba no kabesa, o aẑi suma si no tene kapasidadis spesial. (1 Kor 4:7) Tambi, no ka dibi di pensa di kuma no mas importanti di ki utrus, pabia no mas tarda na sirbi Jeova di ki elis, o no tene responsabilidadis ke ka tene. Na bardadi, konformi no responsabilidadis na aumenta, no umildadi dibi di aumenta tambi. (Luk 9:48) No misti sirbi utrus suma anjus. No ka misti mostra di kuma no mas importanti di ki utrus.

7. Kuma ku no pudi mostra umildadi ora ku no na kuriẑi o konsija un algin?

⁷ No pudi mostra umildadi si no dibi di kuriẑi o konsija un algin. I pudi sedu un di no ermons na fe o no fiju. Utrora no pirsisa di da un konsiju di manera diretu. Ma, suma ki anju ku kuriẑi Jon ku bondadi, anos tambi no pudi sedu firmi sin pui pa ki algin sinti disanimadu. Si no ka ta pensa di kuma no sedu mas importanti di ki utrus, no na da konsiju basiadu na Biblia ku rispitu i ku amor. — Kol 4:6.

ANJUS AMA JINTIS

8. (a) Kuma ku Lukas 15:​10, mostra di kuma anjus ama jintis? (b) Kuma ku anjus ta judanu na pregason? (Jubi tambi foto.)

⁸ Anjus ka ta njuti pekaduris o pensa di kuma e ka tene importansia. Ma e ama pekaduris. E ta kontenti ora ku un algin ku fasi pekadu ripindi, o ora ku un algin ku para sirbi Jeova riba pa rel. Tambi e ta kontenti ora ku un algin disidi fasi mudansas na vida pa pudi sirbi Jeova. (Lei Lukas 15:10.) Anjus tambi ta judanu ora ku no sta na prega. (Apok 14:6) Mesmu manera ke ka ta prega jintis di manera diretu, e pudi gia un publikadur pa un algin ku misti kunsi Jeova. Na bardadi, no ka pudi fala ku tudu sertesa di kuma, i anjus ku ta gianu pa papia ku tudu jintis ku no kontra ku el. Jeova pudi tambi usa utru maneras, suma si spiritu santu, pa juda jintis ku misti kunsil o pa gia si servus pa ki jintis. (At 16:​6, 7) Ma mesmu asin, i ta usa si anjus pa judanu ora ku no na prega. Pa kila, ora ku no na prega bon noba, no pudi tene sertesa di kuma anjus na judanu. — Jubi kuadru “Se orasons obidu.”c

9. Kuma ku no pudi kopia amor ku anjus tene pa jintis?

⁹ Kuma ku no pudi kopia amor ku anjus tene pa jintis? Ora ku no obi di kuma un algin riba pa kongregason, no pudi sta kontenti suma ku anjus ta kontenti. No pudi fasi pa no ermon sibi di kuma, no amal i no kontenti pa manera ki torna sirbi Jeova mas. (Luk 15:​4-7; 2 Kor 2:​6-8) No pudi tambi kopia isemplu di anjus, ora ku no fasi tudu ku no pudi pa prega. (Ekl 11:6) Suma ku anjus ta judanu ora ku no na prega bon noba, no pudi tambi buska maneras di juda no ermons ku irmas na pregason. Pur isemplu, sera ki no pudi kombina pa prega ku un publikadur ku kumsa prega, nin i ka tarda? Sera ki no pudi juda ermons ku irmas di idadi, o ku tene purblemas di saudi pa e pudi prega ku nos?

10. Ke ku no pudi aprindi di spiriensia di Sara?

¹⁰ Ke ku no pudi fasi si no situason ka pirmitinu fasi tudu ku no misti fasi, na sirvisu di Jeova? No pudi buska utru maneras di tarbaja ku anjus na pregason. Jubi spiriensia di un irma di India comadu Sara.d I sedu pioneru pa serka di 20 anu, dipus i duensi risu tok i ka pudi mas yanda i sai di kama. I staba tristi dimas. Ma, ajuda di ermons ku irmas i lei Biblia sempri, juda Sara pa i tene mas alegria. Na bardadi, i dibi di buska utru manera di prega, pabia di si nobu situason. Suma i ka pudiba te mesmu sinta pa skirbi kartas, i ta pregaba so pa telefoni. Pa kila, i liga si rivisitas, i e falal di kuma utru jintis misti tambi studa Biblia. Kal ku sedu rusultadu? Na puku misis, Sara tene 70 studus di Biblia! I ka pudiba studa ku elis tudu. Pa kila, i pasa alguns pa utrus ermons na kongregason. Gosi, manga di kil studantis di Biblia ta mati no runions. Anjus ta kontenti dimas di tarbaja juntu ku ermons ku irmas, suma Sara, ku ta fasi tudu ke pudi na pregason!

ANJUS TA NGUENTA

11. Kuma ku anjus fiel mostra di kuma e ta nguenta?

¹¹ Anjus fiel ku ta nguenta disa un isemplu garandi. E nguenta injustisa ku maldadi pa manga di anus. E oja Satanas ku manga di anjus mau ku ta sirbiba Jeova juntu ku elis, rebela kontra el. (Kum 3:1; 6:​1, 2; Jud 6) Biblia fala di un anju fiel ku geria ku un anju mau pa manga di dias. (Dan 10:13) Tambi, disna di tempu di Adon ku Eva, anjus oja so puku jintis ku disidi sirbi Jeova. Mesmu ku tudu es kusas, es anjus fiel kontinua sirbi Jeova ku kontentamentu i ku animu. E sibi di kuma na tempu sertu, Deus na kaba ku tudu injustisa.

12. Ke ku pudi judanu nguenta?

¹² Kuma ku no pudi nguenta suma anjus? No pudi pasa injustisa suma anjus. Ma suma elis, no sibi di kuma na tempu sertu, Deus na kaba ku tudu maldadi. Suma anjus fiel, no ka ta “kansa fasi ben.” (Gal 6:9) Tambi Deus purmiti di kuma, i na judanu nguenta. (1 Kor 10:13) No pudi ora Jeova pa i danu si spiritu ku na judanu tene pasensa ku alegria. (Gal 5:22; Kol 1:11) Ke ku bu dibi di fasi, si bu sta na pasa pirsigison? Konfia di tudu korson na Jeova i ka bu panta. Jeova sempri na judau i dau forsa. — Eb 13:6.

ANJUS TA JUDA PA MANTI KONGREGASON LIMPU

13. Kal tarbaju spesial ku anjus tene nes tempu di fin? (Mateus 13:​47-49)

¹³ Nes tempu di fin, Jeova da anjus un tarbaju spesial pa fasi. (Lei Mateus 13:​47-49.) Milyons di jintis na mundu ntidu sta interesadu na bon noba. Alguns des jintis ta fasi mudansas na se vida pa pudi sirbi Jeova, ma utrus ka ta fasil. Anjus dadu tarbaju di “tira maus na metadi di justus”. Es signifika di kuma e dadu tarbaju di manti kongregason limpu. Es ka signifika di kuma tudu kilis ku para junta ku nos, ka pudi nunka riba pa Jeova. Tambi i ka signifika di kuma nin un algin na kongregason ka na ciga di fasi pekadu. Ma, no pudi tene sertesa di kuma anjus sta na tarbaja risu pa manti tudu kongregasons limpu.

14-15. Kuma ku no pudi kopia anjus i mostra di kuma no misti manti kongregason limpu? (Jubi tambi fotos.)

¹⁴ Kuma ku no pudi kopia anjus i mostra di kuma no misti manti kongregason limpu? No pirsisa di sforsa ciu pa kontinua tene amisadi forti ku Jeova. No ta fasil, ora ku no kuji amigus ku ama Jeova i lunjusi di kualker kusa ku pudi dana na amisadi ku el. Asin, no ta juda na manti kongregason limpu. (Sal 101:3) No pudi tambi juda no ermons ku irmas pa e kontinua sedu fiel pa Jeova. Pur isemplu, ke ku no dibi di fasi si no sibi di kuma, un ermon o irma fasi un pekadu gravi? Pabia di amor ku no tene pa rel, no na falal di kuma i pirsisa di papia ku ansions. Si i ka fasil, no na konta ansions ke ki fasi. No misti pa no ermon ku dana si amisadi ku Jeova, risibi ajuda rapidu! — Tiagu 5:​14, 15.

¹⁵ Infilismenti, alguns ku fasi pekadu gravi ten di tiradu di kongregason. Ora kes kontisi, no ta para “junta” ku elis.e (1 Kor 5:​9-13) Es ta juda pa manti kongregason limpu. Mas importanti, si no disidi ka junta ku kilis ku tiradu di kongregason, no ta sta na mostra bondadi pa relis. Pabia, ora ku no obdisi Jeova no para junta ku elis, kila pudi juda elis sinti di kuma, e pirsisa di riba pa Jeova. Se fasil, no na kontenti juntu ku Jeova i ku anjus. — Luk 15:7.

16. Di kal maneras ku bu na sforsa pa kopia anjus?

¹⁶ I un kontentamentu garandi ku no tene, manera ku Jeova disanu kunsi anjus i tarbaja ku elis! No kopia se maneras di sedu bonitu, ku sedu, se umildadi, se amor pa jintis, manera ke ta nguenta i manera ke misti manti kongregason limpu. Si no kopia anjus fiel, no pudi tambi fasi parti di familia garandi ku na adora Jeova pa tudu tempu.