Dus nobu membrus di Korpu Guvernanti

NA DIA 5 di Otubru di 2024, i fasidu un anunsiu spesial na runion anual: Ermon Jody Jedele ku Jacob Rumph disignadu suma membru di Korpu Guvernanti di Tustumuñas di Jeova. Es dus ermons sirbi Jeova di manera fiel pa manga di anus.

Ermon Jedele padidu na Missouri, na Stadus Unidu di Amerika, si papes i Tustumuñas di Jeova. Si familia mora na un zona nunde ku Tustumuñas di Jeova ka ciu. Pabia des i kunsi manga di ermons ku irmas ku ta bin di diferentis parti di Stadus Unidu pa bin juda na prega bon noba la. Amor ku union ki oja nes ermons tokal ciu dimas. I batisa ojal joven, na 15 di Otubru di 1983. I gosta ciu di pregason, dipus ki kaba liseu, i kumsa sirvisu di pioneru regular na Setembru di 1989.

Oca ermon Jedele seduba inda joven, si papes kustuma ta lebal ku si irma pa visita Betel. Es visita motival el ku si irma pa e fiksa objetivus di sirbi na Betel, elis tudu dus e yangasa se objetivu. Ermon Jedele ciga na Betel di Wallkill na Setembru di 1990. Purmeru kau ki tarbaja nel i na Dipartamentu di Limpeza, i mas tardi na aria di asuntus mediku.

Duranti ki tempu, i tenba kongregason visiñu na lingua spañol ku staba na kirsi i e pirsisaba di ermons. Pa kila, ermon Jedele bai pa un di ki kongregasons i kumsa ku aprindi spañol. Puku tempu dipus, i kunsi Damaris, un irma ku staba na sirbi suma pioneru na ki mesmu sirkuitu. Mas tardi, e bin kasa, i Damaris bin sirbi ku el na Betel.

Na 2005 e sai di Betel pa bai kuida di se papes. Duranti ki tempu, e sirbi suma pionerus regular. Ermon Jedele juda na nsina na Skola di Sirvisu di Pioneru, tambi i sirbi na Kumison di Ligason ku Ospital ku Kumison Regional di Konstruson.

Na 2013, ermon ku irma Jedele kumbidadu mas pa Betel pa projetu di konstruson di Warwick. Apartir di la, e sirbi tambi na Patterson ku Wallkill. Ermon Jedele tarbaja na Dipartamentu Lokal di Projetu/Konstruson tambi na Sirvisus di Informason pa Ospital. Na Marsu di 2023, i disignadu suma ajudanti di Kumison di Sirvisu. Oca ki pensa na tudu disignasons ki risibi ja, i fala: “Ora ku bu risibi un nobu disignason utrora bu pudi fika preokupadu dimas. I nes mumentu ku bu pirsisa di lembra pui bu konfiansa na Jeova pabia i el ku ta fasi pa i sedu.”

Ermon Rumph padidu na Kalifornia, na Stadus Unidu di Amerika. Ocalba pikininu, si mame seduba inativu, ma i fasi tudu sforsu pa nsinal bardadi di Biblia. Tambi, kada anu i ta bai visita si dona femia, ki un servu fiel di Jeova. Si dona motival na misti aprindi mas aserka di Biblia, oca ki tene 13 anu, i pidi un studu di Biblia. I batisa ocal joven na dia 27 di Setembru di 1992. I kontenti di oja si mame kumsa mas prega, mati runions i si pape ku si ermons kumsa ku fasi progresu i e batisa.

Ocalba joven, ermon Rumph oja kontentamentu ku pionerus ta tene. Pa kila, dipus di kaba liseu, i kumsa sirvisu di pioneru na Setembru di 1995. Na 2000, i bai pa Ekuador pa bai juda nunde ki ten mas nesesidadi. La ki kunsi Inga, un irma pioneru ku bin di Kanada, dipus e kasa. E kumsa se vida di kasadu na un sidadi di Ekuador ku tene un grupu pikininu di publikaduris. Aos i sedu un kongregason garandi.

Ku tempu, ermon ku irma Rumph disignadu suma pioneru spesial i mas tardi pa tarbaju di sirkuitu. Na 2011, e kumbidadu pa turma 132 di Skola di Jileadi. Dipus di skola, e sirbi na diferentis parti di mundu i na diferenti disignason suma sirvisu di Betel, tarbaju misionariu ku sirkuitu. Ermon Rumph tene tambi privileẑiu di sirbi suma instrutor pa Skola pa Ivanjilizaduris di Renu.

Pabia di duensa di COVID-19, ermon ku irma Rumph riba pa Stadus Unidu. E kumbidadu na Betel di Wallkill. La, ermon Rumph risibi trenamentu na Dipartamentu di Sirvisu. Dipus e disignadu mas pa filial di Ekuador, nunde ku ermon Rumph sirbi na Kumison di Filial. Na 2023 e mandadu pa Warwick. Na Janeru di 2024, ermon Rumph disignadu suma ajudanti di Kumison di Sirvisu. Oca ki pensa na tudu kaus ki sirbi nel i fala: “I ka kaus ku bu sirbi nel ku ta pui pa un tarbaju sedu spesial, ma i jintis ku bu ta tarbaja ku el.”

No da balur pa tarbaju des ermons i no ta ‘rispita jintis suma elis.’ — Fil 2:29.