Ke ku Biblia fala aserka di mora juntu sin kasa?

Resposta di Biblia

Biblia fala kuma Deus misti pa jintis sta “libri di pekadu seksual.” (1 Tesalonisensis 4:3) Suma ki usadu na Biblia palabra “pekadu seksual” nklui adulteriu, omoseksualismu, ku seksu entri omi ku minjer ku ka kasa.

Sera ki i importanti pa Deus si omi ku minjer ku mora juntu kasa o ka kasa?

Deus ku fasi pa kasamenti ten. I fasi es oca ki pui purmeru omi ku minjer juntu. (Kumsada 2:22-24) I ka mistiba pa omi ku minjer mora juntu sin komprimisu di kasamenti.
Deus sibi ke ki minjor pa pekaduris. I fasi kasamenti pa i sedu un union permanenti entri un omi ku un minjer pa benefisia i proteẑi tudu membrus di familia. Pensa nes izemplu. Suma ku instrusons di un fabrikanti ta mostra kuma di junta diritu pesas di un material, instrusons di Deus ta kontanu kuma di tene un bon familia. Normas di Deus sempri ta benefisia kilis ku ta sigil. — Isaias 48:17, 18.

Instrusons di un fabrikanti ta mostra kuma di junta pesas di un material. Instrusons di Deus ta kontanu kuma di tene un bon familia
Seksu fora di kasamenti pudi tene manga di konsekuensias gravi. Pur izemplu, i pudi pui algin preña sin misti, tene un duensa ku ta pañadu na ora di ten, o tene purblemas emosional.a
Deus da omi ku minjer kapasidadi di tene fiju atraves di seksu. Pa Deus vida i sagradu, i kapasidadi di tene fijus i un prenda presiosu. Deus misti pa no trata es prenda ku rispitu, i pa no rispita kasamenti. — Ebreus 13:4.

Ke gora di mora juntu antis di kasamenti pa jubi si bo na da?

Sigridu di un bon kasamenti i ka un “piriudu di nsaiu” nunde ku kada kin pudi disa si kumpañer ora ki misti. En ves di kila, relasionamentu ta sedu mas minjor, ora ku tantu omi suma minjer fortalisi se komprimisu, i e sforsa pa vensi purblemas.b Kasamenti ta fortalesi komprimisu. — Mateus 19:6.

Kuma ku omi ku minjer pudi fortalisi se kasamenti?

I ka ten un kasamenti perfeitu. Ma omi ku minjer pudi tene un bon kasamenti, ora ke aplika konsijus di Biblia. Ali izemplu di alguns konsijus di Biblia.

Pui nesesidadis di bu parseru riba di bu nesesidadis. — 1 Koríntius 7:3-5; Filipensis 2:3, 4.
Bo disenvolvi amor ku rispitu pa n̈utru. — Efésius 5:25, 33.
Aprindi kontrola bu palabras. — Ditus 12:18.
Sedu pasienti i rapidu na purda. — Kolosensis 3:13, 14.

a Jubi artigu “Kuma ku N pudi risisti preson pa fasi seksu?”

b Jubi artigu “Familia filis – Komprimisu.”