Konstrusons ku kaba antis di duensa di koronavirus

Ku milyons di jintis ku ta batiza kada anu, kada bias mas no pirsisa di kaus pa usa pa adora Jeova. Pa apoia es kirsimentu, Dipartamentus Lokal di Projetu/Konstruson na mundu ntidu, plania pa i kumpudu o renovadu mas di 2.700 lugar di adorason duranti anu di sirvisu di 2020.a

Infilismenti, es planus ntrumpidu oca ku koronavirus ciga. Pa proteẑi no irmons ku no irmas i obdisi leis di guvernu, Kumison Editora di Korpu Guvernanti para maioria di projetus di konstruson na mundu ntidu. Kontudu, duranti anu di sirvisu di 2020, mas di 1.700 lugaris di adorason kumpudu i renovadu antis di koronavirus. Alen di kila, mas di 100 projetus garandi di diferentis filial konsigi kabadu. Jubi kuma ku dus des projetu di konstrusons ku konsigi kabadu, benefisia no irmons.

Filial di Kamerun. Antigu filial ku sta na Duala, i pikininuba dimas, tambi i pirsisaba di omentadu ciu. Kumison Editora pensa na pusibilidadi di renova filial, so ki kustu di fasil, na sedu mas karu di ki predius propi ku sta na usadu. Tambi, e jubi pusibilidadi di kumpu filial na un nobu terenu o kumpra i renova kualker prediu ku iẑisti. Ma nin un des opsons ka funsiona.

Nkuantu e sta na pensa nes pusibilidadis, irmons sibi di kuma na norti di Duala, guvernu lokal plania kumpu un rua ku na pasa pertu di un di no Salon di Asembleia. Rua na pirmiti pa algin ciga filial fasilmenti, tambi pa i ten lus, yagu, sirvisu di telefoni ku utrus kusas. Es sedu izatamenti ke ku filial pirsisaba del. Asin, Korpu Guvernanti aprova pa nobu filial kumpudu na un parti di terenu di Salon di Asembleia.

Tustumuñas di Jeova ku impresas kontratadu tarbaja juntu nes projetu — es popa tempu ku diñeru. Na bardadi, projetu kusta menus di ki kil ku na speraduba; organizason konsigi ekonomiza mas di dus milyon di dolar amerikanu (mas o menus 1.120.000.000 FCFA). Puku tempu antis di COVID-19 kumsa laga, familia di Betel konsigi muda pa nobu filial.

Betelitas di Kamerun benefisia di vivi na minjor kondison di vida ku di tarbaju, i e oja nobu filial suma un prenda ku bin di Jeova. Un kasal fala asin: “Es fasinu misti tarbaja mas duru inda i mostra di kuma, no da balur garandi pa es prenda.”

Skritoriu di traduson di Tojolabal (RTO), Meŝiku. Pa manga di anus, ekipa di tarduson di Tojolabal, ta tarbaja na filial di Amerika Sentral, ku sta pertu di sidadi di Meŝiku. Ma, lingua Tojolabal ta papiadu prinsipalmenti na Altamirano ku Las Margaritas — kuas 1.000 kilometru lunju di kapital! I suma e ka sta na lugar ku lingua na papiadu, i seduba muitu difisil pa tradutoris sta atualizadu, ku kuma ku Tojolabal ta papiadu. Tambi filial ta sforsa ciu pa oja irmons ku irmas kualifikadu ku sta pertu, pa juda na traduson ku gravason na lingua Tojolabal.

Pabia des rasons, Kumison di Redason di Korpu Guvernanti, misti pa ekipa di traduson sta na kau nunde ku lingua Tojolabal ta papiadu. Pa fasi es, filial disidi kumpra um kasa i renoval. Es na seduba mas baratu di ki kumpu o luga un skritoriu.

Un tradutor konta kuma ku es juda ciu, i fala asin: “Na des anu ku N tarbaja suma tradutor na filial, nunka N ciga di oja um familia ku sta pertu di Betel ku ta papia ña lingua. Gosi, skritoriu sta na sentru nunde ku Tojolabal ta papiadu. N ta papia ku jintis ku ta papia Tojolabal tudu dia. Es omenta ña vokabulariu, tambi i minjoria kualidadi di ña tarbaju.”

Projetus pa anu di sirvisu di 2021

Pa anu di sirvisu di 2021, i planiadu pa i kumpudu 75 skritorius di traduson ku kaus pa skolas bibliku, si sirkunstansias pirmiti. Tarbaju na kontinua na oitu projetu garandi di diferenti filial, nkluindu nobu projetu di sedi mundial na Ramapo, Nova York, suma tambi mudansa di filial di Arẑentina ku di Italia. Alen des, no pirsisa di mas di 1.000 nobu Salons di Renu. Tambi mas di 6.000 lugar di adorason ku sta na usadu, ka sta na kondison, i e pirsisa di mudadu. I 4.000 Salons di Renu pirsisa di renovadu.

Kuma ku tudu es obra di konstruson ku renovason ta finansiadu? Irmon Lázaro González, un membru di kumison di filial di Amerika Sentral ruspundi es purgunta, oca i na papia di projetu di konstruson di skritoriu di traduson di ekipa di Tojolabal, i fala asin: “Na tiritoriu di no filial, irmons ka tene manga di meius finanseru. Pa kila, sin apoiu di no ermondadi internasional, i na sedu impusivel kumpu skritoriu di traduson pa no irmons lokal. Ma ku ajuda ku bin di no irmons na mundu ntidu i fasi pa i sedu pusivel tisi tradutoris pa lugaris nunde ku se lingua ta papiadu. No na fala obrigadu di fundu di no korson pa no ermondadi internasional ku danu es apoiu.” Sin, es projetu di konstruson sedu pusivel, pabia di ofertas ku fasidu pa obra mundial, i manga des ofertas fasidu atraves di donate.jw.org.