Sera ki speransa pudi afeta bu vida?

DANIEL tene so des anu, i fasi ja un anu ki na luta ku kankru. Si medikus ku si amigus pirdi speransa. Ma Daniel kontinua tene speransa. I fia di kuma i na kirsi i na sedu piskisadur i un dia i na juda oja kura pa kankru. I tene speransa garandi di kuma i na bin risibi visita di un mediku ku pudi trata si kankru. Ma oca ku ki dia ciga, mediku ka konsigi bai visital pabia di mau tempu. Daniel fika tristi. Pa purmeru bias i pirdi speransa. I muri alguns dias dipus.

Es storia di Daniel kontadu pa un algin ku ta tarbaja na aria di saudi, ku studa kuma ku speransa ku falta di speransa ta afeta saudi di algin. Talves bu ciga ja di obi un storia suma es. Pur isemplu, un algin di idadi ku pertu muri, ma ku sta ku ansia di oja un iventu importanti, suma visita di un algin ki gosta ciu del, o un aniversariu. Ora ku ki iventu ciga i pasa ki algin ta bin kaba pa muri. Ke ku motiva elis? Sera ki na bardadi speransa tene forsa garandi suma ku alguns ta pensa?

Manga di piskisaduris na aria di saudi fala kuma sedu pusitivu, tene speransa, ku utrus pensamentus pusitivu ta tene efeitu garandi na vida di algin ku si saudi. Ma i ka tudu jinti ku ta konkorda ku es. Alguns piskisaduris fala di kuma es kusas ka ta konkorda ku siensia, i so un simplis ideia. E ta pensa kuma ke ku no ta sinti ku ke ku no ta pensa ka pudi afeta no saudi, ma i so si bu paña un bakteria o bu molostra.

Na bardadi, es duvida aserka di importansia di speransa i ka un kusa nobu. Manga di anus atras, un filosofu gregu Aristotilis puntadu ke ki speransa i fala: “I ora ku un algin sta na suña kordadu.” I ka tarda, un pulitiku amerikanu Benjamin Franklin fala sin ku gozu: “Kin ku ta vivi di speransa na muri di fomi.”

Ma, kal ki bardadi aserka di speransa? Sera ki i un simplis diseẑu ku ka na sedu realidadi, un manera di jintis buska konsolu na un kusa ku ka na bin sedu? O sera ki i ten rason di oja speransa suma un kusa mas di ki es — un kusa ku anos tudu no pirsisa del pa tene un bon saudi ku filisidadi, un kusa firmi i ku pudi benefisianu?

Pabia ku no pirsisa di speransa?

NA Kumsada di purmeru artigu, no falaba di un joven Daniel ku na lutaba ku kankru, ke ku na akontisiba ku el si manti si speransa forti? Sera ki na konsigiba san? Sera ki i na sta inda di vida te aos? Mesmu kilis ku ta difindi ideia di kuma speransa pudi juda algin tene un bon saudi, talves ka pudi da resposta pa es purgunta. I tene un kusa importanti ku no pudi aprindi des. Speransa ka dibi di njutidu. Tambi i ka ta risolvi tudu purblemas.

Na un ntrivista di kanal di notisia CBS News, Dr. Nathan Cherney fala di pirigu di pensa kuma speransa i suluson pa tudu, ora ku no na lida ku un algin ku sta duenti risu: “No oja situasons nunde ku omis ta kritika se minjeris risu di kuma e ka ta toma tempu di pensa, i di kuma e ka tene pensamentu pusitivu.” Dr. Cherney fala mas: “Es i un ideia eradu di kuma algin pudi kontrola si kankru, i si bu tenel i sta na omenta i pabia abo ku ka pudi kontrolal, es i ka bon.”

Na bardadi, kilis ku pertu muri pabia di un duensa, ta sta na un luta ku ta fasi elis pirdi tudu se forsa. Buri kulpa riba di dur ku algin teneba ja, na bardadi i un kusa ku kilis ku ama elis ka na misti fasi. Sera ki no pudi fala gosi di kuma speransa ka tene nin un balur?

I klaru ki nau. Pur isemplu, Dr. Cherney spesializa na tratamentu ku ta kalma dur. Objetivu des tratamentu i ka pa kaba ku duensa o fasi algin vivi mas, ma i pa juda duenti pa i pudi vivi minjor nkuantu i na luta ku si duensa. Duturis ku forma nes aria ta fia di kuma es tratamentu pudi juda algin tene susegu mesmu si duensi risu. I tene provas ku ta mostra kuma speransa pudi fasi es, i mas di ki kila.

Balur di speransa

Dr. W. Gifford-Jones mediku i jornalista fala kuma “speransa i un tratamentu ku tene forsa.” I analisa rusultadu di manga di studus ku fasidu pa jubi kal ki balur di anima duentis ku sta kuas pa muri. I pensadu di kuma es tipu di ajuda ta juda jintis tene mas speransa i pensa na kusas pusitivu. Piskisa ku fasidu na 1989 mostra kuma duentis ku risibi es tipu di ajuda vivi mas ciu, nkuantu ku piskisas ku fasidu nin i ka tarda ka muitu konkorda ku kila. Ma piskisas mostra di kuma duentis ku ta risibi animu, ta sufri menus depreson i menus dur di ki kilis ku ka ta animadu.

Jubi utru studu ku fasidu aserka di importansia di pensamentu pusitivu ku negativu pudi tene na algin ku tene duensa di korson. I fasidu un studu ku mas di 1.300 omi pa jubi si e tene un pensamentu pusitivu o negativu na manera di nkara vida. Des anu dipus i ojadu kuma mas di 12 pursentu des omis ta sufri di un di duensa di korson. Entri elis, kilis ku tene pensamentu negativu, sedu dus bias mas ciu di ki kilis ku tene pensamentu pusitivu. Laura Kubzansky, pursora ku ta juda na aria di saudi ku komportamentu di sosiedadi di Skola di Saudi Publiku di Harvard, fala sin: “Manga di provas ku ta difindi ideia di kuma ‘pensamentu pusitivu’ i bon pa saudi i ka basia na studu sientifiku, ma es studu da provas di medikus ku ta konfirma di kuma pensamentus pusitivu ta juda na duensa di korson.”

Alguns studus mostra di kuma kilis ku ta pensa e ka tene un bon saudi e ta tarda pa rekupera dipus di operason, nkuantu kilis ku pensa kuma e tene un bon saudi e mas ta rekupera sedu. Te mesmu e ta liga vida kumpridu ku pensamentu pusitivu. Un studu fasidu ku jintis di idadi pa jubi kuma ku pensamentu pusitivu ku negativu ta afeta manera di nkara bejisa. Ora ku jintis di idadi mostradu mensaẑen di kuma algin di idadi tene mas spiriensia, mas jiresa, kila ta juda elis yanda mas rapidu i ta da elis forsa. Na bardadi minjoria ku ojadu i komparadu ku rusultadu di ezersisiu di 12 semana!

Pabia ku sintimentu suma speransa ku pensamentu pusitivu, pudi juda na saudi? Talves sientistas ku duturis ka ntindi inda diritu pensamentu ku kurpu di pekadur pa pudi da un resposta klaru pa es purgunta. Mesmu asin, sientistas ku duturis ku studa es asuntu basia na se spiriensia ku kuñisimentu. Pur isemplu, un pursor ku ta studa serebru fala: “I bon sedu filis i tene speransa. Kila ta juda pa ka bu tene manga di preokupason i ta pirmiti kurpu pa i tarbaja diritu. I un di kusas ku algin pudi fasi pa kontinua tene un bon saudi.”

Alguns duturis ku kilis ku ta studa i trata menti i komportamentu di jintis ku sientistas pudi fika adimiradu ku es ideia, ma es ka ta adimira studantis di Biblia. Kuas 3.000 anu atras, un rei jiru comadu Salomon nspiradu pa skirbi es palabras: “Korson kontenti ta da saudi, ma spiritu kebrantadu i ta bin seka os.” (Ditus 17:22) Nota un manera di pensa ekilibradu ku faladu del nes testu. Es versikulu ka sta na fala di kuma korson kontenti ta kura tudu duensa, ma i fala i “ta da saudi.”

Na bardadi i normal punta, si speransa i mesiñu, kal dutur ku ka na reseta jintis el? Alen di kila, speransa ka ta benefisianu so na aria di saudi.

Pensamentu pusitivu, pensamentu negativu, ku bu vida

Piskisaduris mostra kuma, jintis ku tene pensamentu pusitivu ta oja kusas di bon manera i kila ta juda elis ciu. E ta sai ben na skola, na tarbaju, te mesmu na disportu. Pur isemplu, i fasidu studu ku minjeris ku sta na ekipa ku ta kuri. Trenaduris analisa diritu kapasidadi ku es minjeris ku ta kuri tene. Na mesmu tempu, kada un des minjeris ntrivistadu pa jubi diritu konfiansa ku e tene. Rusultadu des ntrivista i mas izatu, i mostra konfiansa ke minjeris tene i mas forti di ki analisi ku fasidu pa se trenaduris. Ke ku manda konfiansa tene es forsa garandi asin?

I aprindidu ciu di studu ku fasidu di ke ki i kontrariu di pensamentu pusitivu, ku sedu pensamentu negativu. Na anus 1960, i fasidu piskisa aserka di komportamentu di limarias, kila leba piskisaduris na fasi un frasi ku ta da ideia, di sintimentu di ka pudi muda nada. E diskubri tambi kuma pekaduris pudi sufri des mesmu duensa. Pur isemplu, i fasidu un testi ku jintis nunde ki pudu baruju forti, e faladu kuma e pudi aprindi para kil baruju ora ke toka na botons. E konsigi para kil baruju.

Sugundu grupu faladu pa fasi mesmu kusa, ma e ka konsigi para baruju oca ke toka na botons. Suma ku bu pudi imaẑina, manga delis na ki sugundu grupu, tene sintimentu di ka pudi muda nada. Mas tardi i fasidu un utru testi, ma e staba na duvida se dibi di toka ki botons. E staba konvensidu di kuma nin ke fasi algun kusa kila ka na muda nada. Mesmu na ki sugundu grupu i ten kilis ku tene pensamentu pusitivu, e ka disisti e ka fika disanimadu.

Dr. Martin Seligman, ku juda na fasi algun des purmeru spiriensia, disidi studa pensamentu pusitivu ku negativu. I studa ku kuidadu pensamentu di jintis ku ta pensa di kuma e ka pudi judadu. I kaba pa nota di kuma, pensamentu negativu, ta leba jintis tene difikuldadi pa fasi atividadis normal di vida, e ta fika paradu. Seligman fasi un rusumu di pensamentu negativu ku si rusultadu des manera: “Nes vinti i sinku anu di studu, N kaba pa konvensi ña kabesa di kuma si no kustuma pensa suma kilis ku tene pensamentu negativu, di kuma tudu mal ku akontisi i no kulpa, es na kontinua i ka na juda na tudu ke ku no na fasi, i na sedu mas pior di ki ora ku bu tene pensamentu pusitivu.”

Es ku faladu pudi parsi nobu pa alguns aos, ma i ka nobu pa studantis di Biblia. Nota ke ke ditu fala: “Si bu mostra fraku na dia di foronta, na bardadi bu forsa i pikininu.” (Ditus 24:10) Biblia mostra di manera klaru di kuma si bu fika disanimadu ku pensamentu negativu, kila na rapati bu forsa di aẑi. Gosi ke ku bu pudi fasi pa luta kontra pensamentu negativu i tene mas pensamentu pusitivu ku speransa na bu vida?

[Foto na paẑina 4, 5]

Speransa pudi fasi manga di bon kusas

Bu pudi luta kontra pensamentu negativu

KUMA ku bu ta nkara purblemas ku bu ta pasa? Manga di spesialistas fia gosi di kuma, respostas pa es purguntas na mostra si abo i algin ku tene pensamentu pusitivu o negativu. Anos tudu no ta pasa difikuldadis na vida, di utrus mas ta ciu, ma ke ku manda i ta parsi kuma alguns ta rekupera di difikuldadis e ta sta prontu pa tenta mas, nkuantu ku utrus ta disisti mesmu dianti di difikuldadis pikininu?

Pur isemplu, imaẑina kuma bu sta na buska tarbaju. Ma oca ku bu fasidu ntrivista bu ka kontratadu. Kuma ku bu sinti manera ku bu ka kontratadu? Talves bu pudi pensa i abo ku e nega, i oja kila suma un purblema ku na fika pa tudu tempu, i fala bu kabesa: ‘Ningin ka na ciga di kontrata algin suma mi. Nunka N ka na ciga di tene tarbaju.’ O pior inda, bu pudi disa pa es uniku purblema influensia manera ku bu ta oja tudu arias di bu vida, i lebau na fala: ‘Ami N ka pudi fasi nada. N ka bali nada.’ Es tudu ta mostra manera di pensa negativu.

Luta kontra pensamentu negativu

Kuma ku bu pudi luta kontra pensamentu negativu? Purmeru kusa importanti pa fasi i sibi kal ki pensamentu negativu, dipus i pa bu luta kontra elis. Tenta jubi diritu pabia di ke ku manda e ka kontratau. Sera ki i bardadi kuma manera ku bu ka kontradu i pabia ningin ka na ciga di kontratau? O sera ki i pusivel di kuma patron sta so na buska un algin ku tene utrus spiriensia?

Si bu konsentra na kusas ki sertu, bu na diskubri di kuma pensamentus negativu i un reason izaẑeradu. Sera ki manera ke ka kontratau ki un bias i signifika di kuma bu ka bali nada, o sera ki bu pudi pensa na utru arias di bu vida, suma bu objetivu spiritual, bu relason na familia, o amizadi nunde ku bu konsigi sai ben? Aprindi nega bu pior pensamentu negativu nkara elis suma izaẑeru. Pensa nes, sera ki na bardadi bu tene sertesa di kuma nunka bu ka na oca tarbaju? I ten inda utrus kusas ku bu pudi fasi pa nega pensamentu negativu.

Pensamentu pusitivu ta judau yangasa bu objetivu

Na ultimus anus, piskisaduris da splikason aserka di speransa di un manera interesanti, ma ki ka kompletu. E fala di kuma speransa signifika fia di kuma, bu na konsigi yangasa bu objetivu. Artigu ku na bin, na mostra kuma na bardadi speransa i mas di ki kila, ma es splikason pudi parsi bon na manga di manera. Konsentra des manera na speransa ku bu tene na judau tene mas pensamentu pusitivu i yangasa bu objetivu.

Si no fia di kuma no pudi yangasa no objetivus pa futuru, no pirsisa di tene spriensia di objetivu ku no yangasaba ja. Si bu ka tene spiriensia di objetivu ku bu yangasaba ja, talves i na seduba bon pensa ku seredadi na objetivu ku bu na fiksa pa bu kabesa. Purmeru, sera ki bu tene objetivus? Sin objetivu, i fasil kai na kurida di vida di kada dia, sin para pa pensa ke na bardadi ku no misti ku no vida, i ke ki mas importanti pa nos. Jubi es prinsipiu klaru aserka di fiksa prioridadi, ku faladu del manga di anus atras na Biblia: “Pa bo pudi sibi kuji kusa mas bon”. — Filipensis 1:10.

Ora ku no fiksa prioridadis, i ta torna mas fasil tene objetivus importanti na manga di arias, suma na no vida spiritual, no vida na familia i utrus atividadis di vida. I importanti pa ka kuji manga di objetivus na kumsada, ma no kuji un objetivu ku no sibi kuma no na pudi yangasa. Si kontra objetivu sedu difisil dimas pa yangasa, i pudi punu no fika ku medu, i talves disisti del. I na sedu bon dividi objetivus garandi na objetivus pikininu, ku bu na pudi yangasa na puku tempu.

I kustuma faladu: “Si bu misti un kusa, bu ta konsigil.” Es palabras tene algun bardadi nel. Ora ku no tene objetivus importanti na menti, no pirsisa di tene vontadi i sta disididu pa yangasa elis. No pudi fortalisi no disison ora ku no na pensa na balur di no objetivus, i benefisius ku no na tene si no yangasa elis. Na bardadi purblemas na ten, ma bu dibi di oja elis suma difikuldadis, i ka suma un kusa ku bu ka pudi risolvi.

Tambi, no pirsisa di pensa na kusas pratiku ki pirsis fasi pa yangasa no objetivu. Un skirbidur di nomi C. Rick Snyder, fasi studu fundu aserka di balur di speransa. I da suẑeston di pensa na manera diferenti di yangasa un objetivu. Si kontra purmeru ka da, bu na bai pa sugundu, pa terseru i asin pa dianti.

Snyder tambi da suẑeston, di sibi kal ora ku no dibi di torkia un objetivu pa utru. Si na bardadi no ka konsigi yangasa un objetivu, kontinua pensa nel na lebanu fika disanimadu. Pa utru ladu, si no torkial ku objetivu ku no pudi yangasa, kila na danu mas speransa.

Biblia tene un bon isemplu nes sintidu. Rei Davi teneba un objetivu, i mistiba kumpu templu pa si Deus, Jeova. Ma Deus fala Davi kuma si fiju Salomon ku na tene privileẑiu pa fasi kila. En ves di paña raiba, o kontinua pensa na ki situason ku pudi disanimal, Davi muda di si objetivu. I usa tudu si forsa pa junta fundu ku materialis ku si fiju na bin pirsisa del pa kumpu templu. — 1 Reis 8:17-19; 1 Kronikas 29:3-7.

Nin si bu sai ben di tene mas speransa atraves di luta kontra pensamentu negativu, i tene pensamentu pusitivu, ku na judau tene objetivu, mesmu asin no pudi tene difikuldadi garandi ora ki na trata di speransa. Ma kuma ku kila pudi sedu? Manga di bias no ta pirdi speransa, pabia di situason ku no ta pasa nes mundu, ku sta fora di no kontrolu. No sta na oja purblemas difisil, ku na kansa tudu jintis na mundu, suma koitadesa, gera, injustisa, ameasa di duensa ku mortu. Ku tudu es purblemas, kuma ku no pudi manti no speransa?

[Foto na paẑina 7]

Si bu ka konsigi un tarbaju ku bu mistiba, sera ki bu ta pensa kuma nunka mas bu ka na oja tarbaju?

[Foto na paẑina 8]

Rei Davi konsigi adapta pa un nobu situason oca ki ka konsigi yangasa si objetivu

Nunde ku bu pudi oja speransa di bardadi?

BU Orloẑiu para, i sta suma si kontra i dana. I si bu misti kumpul i ten manga di manera pa fasil. I ten manga di publisidadi aserka di kilis ku ta kumpu orloẑiu. Kada kin ta fala el i minjor, alguns ka ta konkorda ku utru. Ma ke gora si bu diskubri kuma, i bu visiñu ku kumpu ki tipu di orloẑiu ku bu tene alguns anus atras? I fora di kila, bu sibi kuma i sta dispostu pa judau, sin paga nada. Bu sibi ja ke ku bu na fasi, i kel?

Gosi kompara es orloẑiu ku bu kapasidadi di tene speransa. Si bu nota kuma bu sta na pirdi speransa, suma ki akontisi ku manga di jinti nes tempu difisil, nunde ku bu pudi bai buska ajuda? Manga di jintis ta fala di kuma e pudi risolvi purblemas, ma manga di suẑestons ke ta da, ta kria konfuson. E ka ta konkorda ku n̈utru. Pa kila, pabia di ke ku manda bu ka na bai purmeru pa ki algin, ku kumpu pekadur ku kapasidadi di tene speransa? Biblia fala: “I ka sta lunju di kada un di nos” tambi i sta dispostu pa judanu. — Atus 17:27; 1 Pedru 5:7.

Un splikason mas klaru di speransa

Splikason ku Biblia da aserka di speransa i mas klaru, mas kompletu di ki splikasons ku ta dadu aos pa duturis, sientistas i kilis ku ta studa i trata menti ku komportamentu di jintis. Palabra oriẑinal na ebraiku ku gregu ku usadu na Biblia pa “speransa” signifika pera un bon kusa ku ansia. I ten dus kusas ku fasi parti di speransa. Purmeru i diseẑu ku bu tene pa un kusa di bon, i sugundu bu tene rason forti di fia kuma ki kusa bon na akontisi. Speransa ku faladu del na Biblia i ka un simplis diseẑu di un kusa ki ka sedu real. I tene rasons forti ku basia na provas.

Nes sintidu speransa i suma fe, i dibi di basia na provas klaru. (Ebreus 11:1) Mesmu asin, Biblia fasi diferensa entri fe ku speransa. — 1 Koríntius 13:13.

Pur isemplu: Ora ku bu pidi un amigu di konfiansa fabur, bu pudi tene speransa di kuma i na judau. Bu speransa i ka sin basi pabia bu tene fe na bu amigu, bu kunsil diritu, i bu ojaba ja kuma ki aẑi ku bondadi i ẑenerosidadi na pasadu. Bu fe ku bu speransa pudi parsi ciu ku n̈utru, te mesmu dipindi di n̈utru, ma i dus kusas diferenti. Kuma ku bu pudi tene es tipu di speransa na Deus?

Basi di speransa

Speransa di bardadi bin di Deus. Na tempus bibliku Jeova comadu di “Speransa di Israel”. (Jeremias 14:8) Speransa di bardadi ku si povu tene binba del, i seduba se speransa. Es speransa i ka un simplis diseẑu. Deus da israelitas rasons forti pa e tene speransa. Manera ki lida ku israelitas pa manga di anus i mostra di kuma el i ta kumpri promesas ki fasi. Josué ku staba na gia povu di Israel fala elis sin: “Bo sibi diritu . . . nin un palabra son ka maina di tudu ki bon palabras ku SIÑOR bo Deus fala aserka di bos.” — Josué 23:14.

Manga di anus mas tardi, Deus kontinua na kumpri si promesas. Biblia tene manga di promesas interesanti ku Deus fasi suma tambi reẑistu izatu di kuma ke kumpri. Es profesias i di konfiansa, utru ora e ta skirbidu suma si e kumpriba ja na tempu ke faladu.

Pabia di kila no pudi fala Biblia i un livru di speransa. Ora ku bu na studa manera ku Deus lida ku pekaduris, bu rason di pui speransa nel na torna mas forti. Apostulu Paulu fala: “Tudu ku skirbiduba purmeru na palabra di Deus i skirbidu pa nsinanu, pa danu pasensa ku koraẑen, pa no pudi ten speransa.” — Romanus 15:4.

Kal speransa ku Deus danu?

Kal mumentu ku no ta sinti di kuma no mas pirsisa di speransa? I ka ora ku bu sta dianti di un situason suma mortu? Pur isemplu, pa manga di jintis, i so ora ku un algin ke ama muri, ku speransa ta parsi un kusa ki ka sedu real. Ma, sera ki i ten un kusa ku pudi sedu mas pior di ki mortu? Mortu sta na pirsigi kada un di nos ku forsa. No ka pudi kuri del, i no ka tene puder pa tajal. E ku manda, Biblia coma mortu di “ultimu inimigu”. — 1 Koríntius 15:26.

Gosi, kuma ku no pudi tene speransa si no sta na un situason suma mortu? Versikulu di Biblia ku coma mortu di “ultimu inimigu” fala tambi kuma i na kabadu kel. Jeova Deus tene mas puder di ki mortu. I mostra kila manga di bias. Kuma ki fasi kila? Manera ki lantanda kilis ku muri. Biblia fala di novi situason nunde ku Deus usa si puder pa lantanda kilis ku muri.

Na un des situasons ku kunsidu ciu, Jeova da si fiju Jesus puder pa lantanda si amigu comadu Lazaru. I fasi kuatru dia ki muri. Jesus ka fasi es na sigridu, ma i fasil dianti di manga di jinti. — Jon 11:38-48, 53; 12:9, 10.

Talves bu pudi punta: ‘Ke ku manda ki jintis ku muri lantandadu? Sera ki e ka beju i muri mas?’ Sin, e muri mas. Ma, relatus di konfiansa di resureison pudi judanu ka tene so diseẑu di kuma kilis ku no ama na lantandadu, ma tambi i ta danu rason di fia di kuma e na lantandadu. Na utrus palabras, no tene speransa di bardadi.

Jesus fala: “Ami i resureison, ami i vida.” (Jon 11:25) I el ku Jeova na da puder pa bin lantanda kilis ku muri na tudu parti di mundu. Jesus fala: “I na ciga ora ku tudu mortus ku nteradu na obi si vos (di Kristu); e na sai na koba.” (Jon 5:28, 29) Tudu kilis ku sta na durmi na koba tene speransa di bin lantandadu pa vivi na paraísu na Tera.

Profeta Isaias fala di es resureison di un manera ku ta toka no korson: “Bu mortus na bibu, se kurpus na lanta. Abos ku mora na reia, bo disperta, bo grita ku kontentamentu, pabia bu serenu na sedu suma serenu ku ta arnoba paja. Con na da vida pa ki difuntus ku sta nel.” — Isaias 26:19.

Sera ki es ka ta animanu? Kilis ku muri sta na un situason mas suguru ku no pudi imaẑina, i suma un mininu ku sta proteẑidu na bariga di si mame. Na bardadi, kilis ku sta na durmi na koba, sta guardadu diritu na memoria sin limiti di Deus ku ten tudu puder. (Lukas 20:37, 38) I ka na tarda e na bin volta vivi, i risibidu na un mundu filis, suma un mininu ku kumsa padidu ku un familia sta ku ansia di risibi ku tudu amor! Pa kila, i ten speransa mesmu si no sta na un situason suma mortu.

Kuma ku speransa pudi judau

Paulu sinanu ciu aserka di balur di speransa. I fala di speransa suma un parti importanti di armadura spiritual, ku sedu kapasiti. (1 Tesalonisensis 5:8) Ke ku manda i kompara speransa ku kapasiti? Na tempus bibliku, soldadu ta pui kapasiti di feru pa gera, pa dentru i ta foradu ku lan o kuru. Ku ajuda des kapasiti, soldadu ta proteẑi si kabesa di pankadas, pa i ka muri. Ke ku Paulu misti sina ku es komparason? Suma ku kapasiti ta proteẑi kabesa, di mesmu manera speransa ta proteẑi no menti ku no kapasidadi di pensa. Si bu speransa basia na promesas di Deus, bu na sta susegadu bu ka na panta o pirdi speransa ora ku bu sta dianti di purblemas. Kal un di nos ku ka na pirsisa des tipu di kapasiti, ku sedu speransa?

Paulu usa utru komparason interesanti, pa fala di speransa ku sta ligadu ku vontadi di Deus. I fala: “No ten e speransa suma feru di fundia ku ta sugura no alma firmi.” (Ebreus 6:19) Suma Paulu kapli manga di bias di fogansa, i kunsi diritu balur di un feru di fundia. Ora ku bentu sta na kansa elis, mariñerus ta larga feru di fundia. Si kontra feru di fundia ngata diritu na fundu di mar, i na juda barku pa ka i lebadu pa bentu, asin i ka na maja kontra pedra i dana.

Di mesmu manera, si promesas di Deus sedu un speransa suguru i firmi, es speransa na judanu luta kontra difikuldadis des tempu. Jeova purmiti kuma i ka na tarda, tempu na ciga, nunde ku jintis na tudu mundu ka na sufri mas pabia di gera, krimi, dur, o te mesmu di mortu. (“Jubi kuadru ‘Rasons ku pui no dibi di tene speransa.’”) Si no manti firmi no speransa, kila na judanu fika lunju di pirigu, i na motivanu vivi sugundu normas di Deus, en ves di sigi mau komportamentu i konfuson ku ta ojadu na mundu aos.

Jeova dau tambi es speransa. I misti pa bu vivi suma ki misti. I misti pa “tudu jintis salba”. Di kal manera? Purmeru, kada un di nos dibi di “kunsi bardadi.” (1 Timótiu 2:4) Kilis ku fasi es rivista na nsentivau pa bu buska es kuñisimentu di bardadi ku ta da vida, ku sta na Palabra di Deus. Asin, speransa ku Deus na dau, i mas garandi di ki kualker speransa ku bu pudi oja nes mundu.

Si bu tene es speransa ku bin di Deus, nunka bu ka na fika sin ajuda, pabia Deus na dau forsa ku bu pirsisa pa yangasa kualker objetivu ku sta di akordu ku si vontadi. (2 Koríntius 4:7; Filipensis 4:13) I ka es tipu di speransa ku bu misti? Si kontra bu pirsisa di speransa o bu sta na buskal, ka bu disisti. Speransa sta pertu di bo. Bu pudi ojal!

[Kuadru/Foto na paẑina 10]

Rasons ku pui no dibi di tene speransa

Es testus di Biblia pudi judau na omenta bu speransa:

◼ Deus purmiti un futuru filis.

Si Palabra fala di kuma tudu Tera na bin sedu un paraísu, nunde ku jintis na bin vivi filis, unidu, suma un familia. — Salmu 37:11, 29; Isaias 25:8; Apokalipsi 21:3, 4.

◼ Deus ka pudi konta mintida.

I odia tudu tipu di mintida. Jeova i un Deus santu o limpu dimas, pa kila, i ka pudi konta mintida. — Ditus 6:16-19; Isaias 6:2, 3; Titu 1:2; Ebreus 6:18.

◼ Deus tene puder garandi dimas.

I so Jeova ku ten tudu puder. Nada na seu ku Tera ka pudi tujil kumpri si promesas. — Saida 15:11; Isaias 40:25, 26.

◼ Deus misti pa bu vivi pa sempri.

— Jon 3:16; 1 Timótiu 2:3, 4.

◼ Deus ta jubinu di manera pusitivu.

I ka ta konsentra na no falias i ku no erus, ma na no bon manera di sedu, i ku no sforsu di kontental. (Salmu 103:12-14; 130:3; Ebreus 6:10) I spera kuma no na fasi ke ki sertu, i ta kontenti ora ku no fasi kila. — Ditus 27:11.

◼ Deus purmiti judau yangasa objetivus ku sta di akordu ku si vontadi.

Si servus nunka ka na fika sin ajuda. Ku tudu bondadi, Deus ta da si spiritu santu, forsa mas garandi ku ten pa judanu. — Filipensis 4:13.

◼ Speransa na Deus sempri i suguru.

No pudi konfia i fia na Deus na tudu kusas, nunka i ka na punu fika tristi. — Salmu 25:3.

[Foto na paẑina 12]

Suma ku kapasiti ta proteẑi kabesa, di mesmu manera speransa ta proteẑi no menti

[Foto na paẑina 12]

Suma feru di fundia, un speransa firmi ta danu stabilidadi

[Leẑenda]

Courtesy René Seindal/Su concessione del Museo Archeologico Regionale A. Salinas di Palermo