“N ka pensa mas kuma N dibi di muda mundu”

ÑA PASADU:

Disna di ocan pikininu N gosta di natureza. Ña familia gosta di bai pasiaba sempri na florestas ku laguas bonitu ku daba volta di no sidadi, na Jyväskylä, na sentru di Filandia. N gosta tambi di limarias. Ocanba pikininu, N gosta di lambu kualker gatu o kacur ku N oja! Oca ku N bin na kirsi, N ta fikaba mal manera ku N ta oja jintis na trata limarias mal. Ku tempu, N junta ku un organizason ku ta difindi diritu di limarias, i la N oja jintis ku tene mesmu manera di pensa ku mi.

No pegaba tesu na fasi kampaña pa difindi diritu di limarias. No ta distribui informasons i fasi marŝa kontra lojas ku ta bindi kasakus di peli di limaria i kontra laboratorius ku ta usa limarias pa fasi testi. Te mesmu no forma un novu organizason pa pudi proteẑi limarias. Suma no toma mididas forti pa pudi difindi no ideias, manga di bias kila tisinu purblemas ku otridadi. N prindidu i N lebadu pa tribunal manga di bias.

Alen di preokupa ku limarias, N ta fika tambi preokupadu ku purblemas di mundu. I dipus, N bin kaba pa entra na manga di organizasons, suma Aministia Internasional ku Greenpeace. N konsentra tudu ña sforsu na apoia se atividadis. N ta difindiba koitadis, kilis ku ta pasa fomi, ku utrus jintis ku ta disprezadu na sosiedadi.

Puku-puku, N nota kuma N ka pudi muda mundu. Apesar di kuma es organizasons ta konsigi rosolvi alguns purblemas pikininu, ma kil mas garandi ma na piora. I staba suma si forsa di mal ku toma konta di mundu, i ningin ka ta preokupaba ku nada. N sintiba kuma N ka pudiba fasi nada.

KUMA KU BIBLIA MUDA ÑA VIDA:

N sinti mal manera ku N ka pudi fasi nada, N pasa na pensa na Deus i na Biblia. N studaba Biblia ku Tustumuñas di Jeova. Apesar di kuma N apresia bondadi ku interesi pesual ku Tustumuñas di Jeova mostra pa mi, N ka staba prontu pa muda ña stilu di vida. Des bias kusas sedu diferenti.

N toma ña Biblia N kumsa na leil mas. I kila konsolan ciu. N nota kuma manga di pasaẑens di Biblia sina kuma no dibi di trata limarias diritu. Pur izemplu, Ditus 12:10 fala kuma “un omi justu ta toma konta di si limarias diritu”. Tambi N diskubri kuma i ka Deus ku pui pa purblemas di mundu ten. En ves di kila, purblemas omenta pabia manga di jintis ka ta sigi si orientason. N sinti tokadu di aprindi di kuma Jeova i amor, i ta tarda pa paña raiba. — Salmu 103:8-14.

Na ki tempu, N skirbi pa pidi livru Ke ki Biblia na Bardadi ta Sina? I ka tarda un kasal Tustumuña di Jeova bin ña kau e oferesin un studu di Biblia, N seta. N kumsa tambi ku mati runions na Salon di Renu. Suma rusultadu, N kumsa na ama kusas ku N sta na aprindi na Biblia.

Atraves di Biblia, N konsigi fasi manga di mudansas. N para fuma ku cami. N muda ña aparensia ku ña manera di papia. Tambi N muda ña manera di pensa aserka di otridadis. (Romanus 13:1) N abandona ña stilu di vida imoral ku N teneba antis.

Mudansa mas garandi ku N fasi i di muda ña pontu di vista aserka di organizasons ku ta difindi sosiedadi. I ka akontisi di un dia pa utru. N pensaba kuma i na sedu un traison si N sai des organizasons. Ma N kaba di ntindi kuma Renu di Deus i uniku speransa pa tudu mundu. N disidi usa tudu ña inerẑia pa apoia es Renu i juda utrus aprindi aserka del. — Mateus 6:33.

BENSONS KU N RISIBI:

Suma algin ku ta difindi sosiedadi, N kustuma dividi jintis na dus grupu — bon o mau — N ta sta prontu pa aẑi kontra kilis ki N pensa kuma e mau. Ma ku ajuda di Biblia, N ka ta sinti mas ki odiu garandi pa utrus. Pa kontrariu, N ta sforsa pa disenvolvi amor kriston pa tudu jintis. (Mateus 5:44) Un di maneras ku N ta mostra amor pa utrus, i di konta elis bon noba aserka di Renu di Deus. N sta kontenti dimas di oja kuma ku es tarbaju sta na juda pa i ten pas ku kontentamentu i da jintis speransa di bardadi.

N tene pas mental pabia N disa kusas na mon di Jeova. N sta konvensidu di kuma, suma Kriadur, i ka na pirmiti pa limarias ku pekaduris kontinua maltratadu pa sempri, i nin i ka na pirmiti pa es Tera bonitu danadu. Pa kontrariu, atraves di si Renu, i na kuriẑi tudu danus ku kausadu. (Isaias 11:1-9) N tene kontentamentu garandi nau so di kunsi es bardadi ma di juda utrus tene fe nel. N ka pensa mas kuma N dibi di muda mundu.