Manga delis ta pensa kuma i difisil studa Biblia. Ma i bali pena fasi es sforsu. Ku tempu, bu pudi pensa kuma bu ka na pudi kontinua studa Biblia. Ke ku manda i bali pena sforsa i kontinua studa? Ke ku pudi judau kontinua fasil mesmu dianti di difikuldadis?

1. Kuma ku studu di Biblia pudi judau?

“Palabra di Deus i bibu, i forti.” (Ebreus 4:12) Biblia pudi judau, pabia i ta konta kal ki pensamentu ku sintimentus di Deus pa bo. Bu na aprindi manga di kusas, tambi bu na tene minjor vida i speransa pa futuru. Ma, mas importanti i di kuma, Biblia na judau sedu amigu di Jeova. Ora ku bu na studa Biblia, bu ta pirmiti pa forsa ki tene muda bu vida pa minjor.

2. Ke ku manda no dibi di rikuñisi di kuma, bardadis ku sta na Biblia i importanti?

Bardadis ku sta na Biblia i suma rikesa ku tene balur garandi. E ku manda Biblia nsentivanu, “kumpra bardadi, ka bu bindil”. (Ditus 23:23) Ora ku no pensa diritu na balur di bardadis ku sta na Biblia, no na fasi sforsu garandi pa kontinua studal, nin si kontra i ten difikuldadis. — Lei Ditus 2:4, 5.

3. Kuma ku Jeova pudi judau kontinua studa Biblia?

Suma i el ku kumpou, i ten tudu puder, i bu amigu, Jeova misti judau pa bu aprindi ciu aserka del. I pudi dau “diseẑu ku puder pa kumpri si bon vontadi.” (Lei Filipensis 2:13.) Asin, ora ku bu pirsisa di mas animu pa studa o aplika ke ku bu na aprindi, i pudi judau. Si bu pirsisa di mas forsa pa vensi difikuldadis o opusison i pudi dau el. Pidi sempri Jeova na orason pa i judau kontinua studa Biblia. — 1 Tesalonisensis 5:17.

APRINDI MAS

4. Fasi pa studu di Biblia sedu un kusa importanti pa bo

Manga di bias no ta tene manga di kusas di fasi na vida, ku no ta pensa kuma no ka tene tempu pa studa Biblia. Ke ku pudi judau? Lei Filipensis 1:10, dipus bo kombersa aserka des purguntas:

• Ke ku bu pensa, kal ki alguns kusas “mas bon” o importanti na vida?

• Ke ku bu pudi fasi pa mostra kuma, studu di Biblia i un kusa mas importanti pa bo?

1. Si kontra bu pui reia na un baldu i bu tenta pui pedra, pedra ka na cibi la.

2. Si kontra bu pui pedra purmeru, la bu na tene spasu di pudi pui kuas tudu reia. Di mesmu manera, si kontra bu pui kusas “mas bon” o importanti na purmeru lugar na bu vida, bu na konsigi fasi elis, i tene inda tempu pa utru kusas.

Pekaduris kumpudu ku nesesidadi di kunsi Deus i adoral, i pa fasi kila, no pirsisa di studa Biblia. Lei Mateus 4:4, dipus bo kombersa aserka des purgunta:

• Kal benefisiu ku no na tene si studu di Biblia sedu un kusa mas importanti?

5. Kontinua studa mesmu si bu na pasa pirsigison

VIDEO: Bon Rusultadu di ka Disisti (5:22)

• Na video, kuma ku amigus ku familia di Francesco reaẑi oca ki konta elis ke ki sta na aprindi?

• Kal bon rusultadu ki tene manera ki ka disisti?

Lei 2 Timótiu 2:24, 25, dipus bo kombersa aserka des purguntas:

• Ke ku bu familia ku bu amigus ta pensa aserka di ke ku bu sta na aprindi?

• Di akordu ku es versikulus, kuma ku bu na reaẑi si algin ka kontenti manera ku bu sta na studa Biblia? Pabia ku bu na reaẑi sin?

6. Konfia di kuma Jeova na judau

VIDEO: Jeova Judanu Fasi Mudansas (3:56)

• Na video, kal mudansas ku Jim fasi pa pudi kontenta Jeova?

• Ke ku mas adimirau na si izemplu?

Lei Ebreus 11:6, dipus bo kombersa aserka des purguntas:

• Ke ku Jeova na fasi “pa kilis ku buskal”, ku sedu, kilis ku sta na fasi sforsu garandi pa pudi kunsil i kontental?

• Di akordu ku es versikulu, kuma ku Jeova ta sinti ora ki oja sforsu ku bu na fasi pa studa Biblia?

RUSUMU

Mesmu si ka sedu sempri fasil, studa Biblia pudi judau tene un vida filis pa sempri. Kontinua konfia sempri na Jeova, i na dau pagamentu.

Rekapitulason

• Ke ku manda bardadis ku sta na Biblia tene balur garandi pa bo?

• Kuma ku bu pudi “sibi kuji kusa mas bon” o importanti pa bo?

• Pabia ku bu dibi di pidi Jeova pa i judau kontinua studa Biblia?

TENE MAS INFORMASON

Jubi kuatru kusas ku juda manga di jinti usa se tempu diritu.

“Kuma ku Bu Pudi Usa Bu Tempu di Minjor Manera” (No Korda!, fevreru di 2014)

Jubi kuma ku Jeova juda un minjer ku si omi ka ntindi pabia ki sta na fasi sforsu pa kontenta Deus.

Jeova ta Danu Forsa di Lambu No Kargu (5:05)

Manga di bias, Tustumuñas di Jeova ta akusadu di kuma e ta separa familia. Ma sera ki kila i bardadi?

“Sera ki Tustumuñas di Jeova ta Separa Familia o e ta Fortalisi Elis?” (Artigu na internet)

Anos tudu no tene disisons pa toma. Manga des disisons pudi afetanu ciu i afeta no amizadi ku Jeova. Pur izemplu, no pudi disidi nunde ku no na mora, kuma ku no na sustenta no kabesa, o si kontra no na kasa. Si no toma bon disisons, no pudi tene un vida filis i no ta kontenta Jeova.

1. Kuma ku bu pudi usa Biblia pa judau toma bon disisons?

Antis di toma un disison, ora Jeova pa pidi ajuda i studa Biblia pa sibi kuma ki ta oja ki asuntu. (Lei Ditus 2:3-6.) Na alguns kasu, Jeova ta da lei klaru aserka di un asuntu. Asin, minjor disison ku bu pudi toma i obdisi si lei.

Ma, ke gora, si ka ten un lei klaru na Biblia ku na kontau ke ku bu dibi di fasi? Jeova na kontinua “giau na kamiñu ku bu dibi di yanda.” (Isaias 48:17) Kuma ki na fasi kila? I pudi ten prinsipius ku pudi gia. Prinsipius di Biblia i nsinus di bardadi ku sta na Biblia, ku ta mostra kal ki pensamentus i sintimentus di Deus. Manga di bias, no ta aprindi kuma ku Deus ta sinti aserka di un asuntu ora ku no lei un storia ku sta na Biblia. Ora ku no ntindi kuma ku Jeova ta sinti, no pudi toma bon disisons ku na kontental.

2. Kal kusas ku bu dibi di pensa nel antis di toma un disison?

Biblia fala: “Algin ntindidu i na pensa antis di bai dianti.” (Ditus 14:15) Es misti fala, antis di toma un disison no dibi di tira tempu pa pensa diritu na disisons ku no na toma. Ora ku bu sta dianti di un situason, punta bu kabesa: ‘Kal prinsipiu di Biblia ku N pudi aplika li? Kal disison ku na judan pa N tene sintidu susegadu? Kuma ku ña disison na afeta utrus? Mas importanti, sera ki i na pui pa Jeova kontenti?’ — Ripitison di Lei 32:29.

Jeova tene diritu di kontanu ke ki bon i ke ki mau. Ora ku no kunsi diritu si leis ku si prinsipius i no sta disididu pa sigi elis, no ta tene un bon konsiensia. Konsiensia i un sintimentu dentru di nos ku ta lebanu sibi ke ki i bon i ke ki i mau. (Romanus 2:14, 15) Un konsiensia ku trenadu diritu na judanu toma bon disisons.

APRINDI MAS

3. Disa pa Biblia giau

VIDEO: Disa pa Prinsipius di Biblia Giau (5:54)

• Ke ki liberdadi di kuji?

• Ke ku manda Jeova danu liberdadi di kuji?

• Ke ki i da pa judanu usa no liberdadi di kuji di minjor manera?

Pa oja un izemplu di prinsipiu ku sta na Biblia, lei Efésius 5:15, 16. Dipus bo kombersa pa oja kuma ku bu pudi ‘purbita pa fasi tudu ku bu pudi’, o usa minjor bu tempu na . . .

• lei Biblia kada dia.

• sedu minjor omi o minjer, pape o mame, o fiju.

• mati runions di kongregason.

4. Trena bu konsiensia pa toma bon disisons

VIDEO: “Kontinua Tene un Bon Konsiensia” (5:13)

• Na video, kal kusas ku es irma fasi pa trena si konsiensia pa pudi toma un bon disison ku na kontenta Jeova?

Ke ku manda no ka dibi di pidi utrus pa toma disisons ku anos no dibi di toma? Lei Ebreus 5:14, dipus bo kombersa aserka des purguntas:

• I pudi sedu fasil pidi utrus pa toma disisons pa nos, ma ke ku anos propi no dibi di buska ntindi?

• Kal kusa ku sta dispunivel ku pudi judau tene un bon konsiensia i toma bon disisons?

5. Rispita konsiensia di utrus

Jintis diferentis ta toma disisons diferenti. Kuma ku no pudi mostra rispitu pa konsiensia di utrus? Jubi es dus situason:

Purmeru situason: Un irma ku gosta di usa makiaẑen muda pa un kongregason nunde ku manga di irmas ta sinti mal ora ku algin usa makiaẑen.

Lei Romanus 15:1 ku 1 Koríntius 10:23, 24, dipus bo kombersa aserka des purguntas:

• Di akordu ku es versikulus, ke ku es irma na disidi fasi? Ke ku bu na fasi, si bu sta ku un algin ku si konsiensia ka ta pirmitil fasi un kusa, ma bu konsiensia ta pirmitiu?

Sugundu situason: Un ermon sibi di kuma Biblia ka tuji pa bibi un bokadu, ma i disidi ka bibi. I kumbidadu pa un jumbai i oja ermons na bibi bibidas alkoliku.

Lei Eklesiastis 7:16 ku Romanus 14:1, 10, dipus bo kombersa aserka des purguntas:

• Di akordu ku es versikulus, ke ku es ermon na disidi fasi? Ke ku bu na fasi si bu oja un algin na fasi un kusa ku bu konsiensia ka setau fasi?

Kal kusas ku pudi juda algin toma bon disisons?

1. Pidi Jeova pa i judau disidi ke ku bu na fasi. — Tiagu 1:5.

2. Fasi piskisa na Biblia i na publikasons ku basia na Biblia pa oja prinsipius ku na aplika pa ki situason. Bu pudi tambi papia ku ermons ku irmas ku tene spiriensia.

3. Jubi rusultadu ku bu disisons na tene na bu konsiensia i na konsiensia di utrus.

RUSUMU

No ta toma bon disison ora ku no pensa kuma ku Jeova na sinti aserka di kil asuntu i jubi kuma ku no asons na juda utrus o fasi elis mal.

Rekapitulason

• Kuma ku bu pudi toma disisons ku na kontenta Jeova?

• Kuma ku bu pudi trena bu konsiensia?

• Kuma ku bu pudi mostra rispitu pa konsiensia di utrus?

TENE MAS INFORMASON

Aprindi mas aserka di kuma ku Jeova ta danu konsiju.

Jeova ta Gia Si Povu (9:50)

Jubi kal kusas ku juda un omi toma un disison difisil.

Jeova Purmiti Danu Tudu ke ki Bon (5:46)

Aprindi kuma ku bu pudi kontenta Jeova ora ki ka da un orientason klaru aserka di un asuntu.

“Sera ki bu pirsisa sempri di un lei di Biblia?” (Sintinela di 1 di dizembru di 2003)