Na mundu ntidu, i ten diferenti manera di pensa aserka di bibidas alkoliku. I ten kilis ku utrora gosta di bibi ora ke sta juntu ku se amigus. Utrus ta disidi ka bibi nada. I ten inda utrus ku ta bibi ciu tok e ta cami. Ke ku Biblia fala aserka di bibidas alkoliku?

1. Sera ki i mal bibi bibidas alkoliku?

Biblia ka tuji bibi bididas alkoliku. En ves di kila, Biblia fala di manga di bon kusas ku Deus danu, entri elis i sta “biñu ku ta kontenta korson di omi”. (Salmu 104:​14, 15) Alguns omis ku minjeris fiel ku Biblia fala del ta bibi bibidas alkoliku. — 1 Timótiu 5:​23.

2. Kal avisu ku Biblia da pa kilis ku disidi bibi?

Jeova kondena bibi ciu ku cami. (Gálatas 5:​21) Si Palabra fala: “Ka bu sta na metadi di bibiduris”. (Ditus 23:20) Si no disidi bibi, nin si anos so, no ka dibi di bibi ciu tok ku no ka pudi pensa diritu, kontrola no palabras, no asons, o prejudika no saudi. Si no ka pudi kontrola kuantidadi ku no na bibi, no dibi di sta dispostu pa para bibi di un bias.

3. Kuma ku no pudi rispita disisons di utrus aserka di bibidas alkoliku?

Kada kin dibi di disidi si na bibi o nau. No ka dibi di kritika un algin ku disidi bibi un bokadu, i no ka dibi di pui un algin bibi si ka misti. (Romanus 14:10) No pudi kuji ka bibi si na tisi purblemas pa utrus. (Lei Romanus 14:21.) ‘No ka dibi di buska no interes propi, ma no dibi di buska interes di utru.’ — Lei 1 Koríntius 10:​23, 24.

APRINDI MAS

4. Disidi si bu dibi di bibi

Ke ku Jesus pensa aserka di bibidas alkoliku? Pa oja resposta, jubi purmeru milagri ki fasi. Lei Jon 2:​1-​11, dipus bo kombersa aserka des purguntas:

• Kuma ku es milagri mostra ke ku Jesus ta pensa aserka di bibidas alkoliku i kilis ku ta bibi?

• Suma Jesus ka kondena bibi, kuma ku kriston dibi di oja un algin ku disibi bibi?

Suma kristons sta livri di bibi bibidas alkoliku, kila ka signifika di kuma sempri i bon pa e ba ta bibi. Lei Ditus 22:​3, i jubi kuma ku kusas ku faladu del li pudi judau sibi si bu na bibi:

• Bu na kurinti karu o tarbaja ku un makina.

• Bu preña.

• Mediku fala pa ka bu bibi bibidas alkoliku.

• Bu tene purblema di kontrola kuantidadi di bibidas alkoliku.

• Lei ka pirmitiu bibi.

• Bu sta ku un algin ku disidi ka bibi pabia i teneba purblema di kontrola kuantidadi di bibidas alkoliku.

Sera ki bu dibi di sirbi bibidas alkoliku na un festa di kasamenti o na utru jumbai? Pa oja ke ku pudi judau disidi, mostra VIDEO.

VIDEO: Sera ki N Dibi di Da Jintis Bibidas Alkoliku? (2:​41)

Lei Romanus 13:13 ku 1 Koríntius 10:​31, 32. Dipus di lei kada testu, bo kombersa aserka des purgunta:

• Kuma ku aplika es prinsipiu pudi judau toma disison ku na kontenta Jeova?

5. Disidi kal kuantidadi ku bu na bibi

Si bu disidi bibi bibidas alkoliku, lembra des: Jeova ka kondena bibi bibidas alkoliku, ma i kondena bibi ciu. Pabia? Lei Oseias 4:11, 18, dipus bo kombersa aserka des purgunta:

• Ke ku pudi akontisi ora ku un algin bibi ciu?

Kuma ku no pudi ivita bibi ciu? No pirsisa di rikuñisi no limiti. Lei Ditus 11:​2, dipus bo kombersa aserka des purgunta:

• Pabia ki bon pui limiti na kuantidadi ku bu dibi di bibi?

6. Ke ku pudi juda un algin para bibi ciu

VIDEO: ‘N staba ja kansadu di ña stilu di vida’ (6:​32)

• Na video, kuma ku Dmitry ta komporta ora ki bibi?

• Sera ki i konsigi para bibi logu-logu?

• Kuma ki bin konsigi para bibi ciu?

Lei 1 Koríntius 6:​9-11, dipus bo kombersa aserka des purguntas:

• Ke ku manda cami i un kusa seriu?

• Ke ku ta mostra di kuma un algin ku ta bibi ciu pudi muda?

Lei Mateus 5:​30, dipus bo kombersa aserka des purgunta:

• Oca Jesus usa komparason di korta mon, i misti fala di kuma no pirsisa di disa un kusa pa pudi kontenta Jeova. Ke ku bu dibi di fasi si bu sta na fasi sforsu garandi pa para bibi ciu?a

Lei 1 Koríntius 15:​33, dipus bo kombersa aserka des purgunta:

• Kal ku na sedu rusultadu si kilis ku bu ta ndianta ku el ta bibi ciu?

RUSUMU

Jeova da bibidas alkoliku pa no pudi kontenti, ma i kondena bibi ciu ku cami.

Rekapitulason

• Ke ku Biblia fala aserka di bibidas alkoliku?

• Kal ki pirigu di bibi ciu dimas?

• Kuma ku no pudi rispita disison ku utrus toma aserka di bibidas alkoliku?

TENE MAS INFORMASON

Kuma ku jovens pudi toma bon disison aserka di bibidas alkoliku?

Pensa Antis di Bu Bibi (2:​31)

Diskubri ke ku bu pudi fasi pa vensi purblema ku bibidas alkoliku.

“Pui bibidas alkoliku na si lugar” (Sintinela di 1 di janeru di 2010)

Sera ki kristons dibi di maja kopu na n̈utru?

“Purguntas di kilis ku ta lei no publikasons” (Sintinela di 15 di fevereru di 2007)

Anos tudu no gosta di kuji ke ku no na bisti i kuma ku no gosta di sta. Si no sigi alguns prinsipius di Biblia, no ka na kuji so ke ku no gosta di bisti ma tambi no na kontenta Jeova. No na bai jubi alguns des prinsipius.

1. Kal prinsipius ku dibi di gia no manera di bisti ku no aparensia?

No dibi di disidi “bisti simplis, ku rispitu, na manera diritu,” i tene sempri un aparensia limpu ku na mostra utrus di kuma no na “sirbi Deus.” (1 Timótiu 2:9, 10) Jubi es kuatru prinsipius: (1) No ropa dibi di sedu “simplis.” Suma ku bu nota na runions di kongregason, povu di Jeova tene diferenti gustu, ma no ropa ku no manera di kumpu kabelu ta mostra rispitu pa Deus ku no ta sirbi. (2) Bisti ku “rispitu” signifika no aparensia ka dibi di provoka utrus, nin i ka dibi di coma atenson ciu dimas pa nos. (3) “Na manera diritu” signifika no ka ta sigi tudu stilu o ropas ku sta na moda. (4) No aparensia dibi di mostra di manera klaru kuma no ta “sirbi Deus” di bardadi. — 1 Koríntius 10:31.

2. Kuma ku no aparensia na afeta no ermons na fe?

Nin si no tene liberdadi di kuji ke ku no na bisti, no dibi di pensa na kuma ku no aparensia na afeta utrus. No ta tenta fasi no minjor pa ka ofendi ningin, ma pa ‘agrada no ermon pa ben del, pa i pudi kirsi na fe.’ — Lei Romanus 15:1, 2.

3. Kuma ku no aparensia pudi atrai utrus pa adorason di bardadi?

No ta sforsa sempri pa bisti diritu na tudu mumentu, ma no mas ta toma kuidadu ku no manera di bisti ora ku no na bai runion ku pregason. No ka misti pa no manera di bisti distrai utrus di bon noba ku no na prega. En ves di kila, no misti pa no manera di bisti atrai utrus pa Deus ku no sta na sirbi, i pa i sedu “un bon fajamentu na tudu kusa pa nsinamentu di Deus no Salbadur.” — Titu 2:10.

APRINDI MAS

4. Un bon aparensia ta mostra kuma no rispita Jeova

Kal ki rason mas importanti ku dibi di lebanu preokupa ku no aparensia? Lei Salmu 47:2, dipus bo kombersa aserka des purguntas:

• Suma no ta representa Jeova, kuma ku kila dibi di afeta no manera di bisti?

• Bu pensa kuma i pirsis pa no preokupa na manera ku no ta bisti ora ku no na bai runion ku pregason? Pabia ku bu pensa asin, o pabia ku bu ka pensa asin?

5. Kuma ku bu pudi toma bon disison aserka di ropa ku aparensia

Mostra VIDEO.

VIDEO: “Bo Fasi Tudu pa Gloria di Deus” (10:18)

Nin si no ropa karu o baratu, i dibi di sedu limpu i da pa atividadi ku ambienti ku no sta nel. Lei 1 Koríntius 10:24 ku 1 Timótiu 2:9, 10. Dipus, bo kombersa ke ku manda no misti ivita bisti ropa . . .

• marlotadu, susu o simplis dimas.

• pertadu, ku ta mostra kurpu, o provoka.

Kristons ka pirsisa di sigi Lei di Moisés, ma e pudi aprindi ciu kuma ku Jeova ta pensa. Lei Ripitison di Lei 22:5, bo kombersa aserka des purgunta:

• Ke ku manda no dibi di ivita bisti ropa o tene aparensia ku na pui omi parsi ku minjer o minjer parsi ku omi?

Lei 1 Koríntius 10:32, 33 ku 1 Jon 2:15, 16, dipus bo kombersa aserka des purguntas:

• Ke ku manda no dibi di preokupa si kontra no aparensia na pui pa jintis nunde ku no mora o na kongregason fika mal?

• Kal stilu di ropa ku aparensia ku kustuma ojadu nunde ku bu mora?

• Bu pensa kuma alguns des stilu pudi ka sedu bon pa un kriston? Pabia ku bu pensa i bon, o pabia ku bu pensa i ka bon?

RUSUMU

Ora ku no toma bon disison na no manera di bisti ku no aparensia no ta mostra rispitu pa Jeova i pa utrus.

Rekapitulason

• Ke ku manda no manera di bisti ku no aparensia i importanti pa Jeova?

• Kal ki alguns prinsipius ku dibi di gia no disison aserka di manera di bisti ku no aparensia?

• Kuma ku no manera di bisti ku no aparensia ta afeta manera ku utrus ta oja adorason di bardadi?

TENE MAS INFORMASON

Jubi ke ku utrus ta pensa di bo ora ke oja manera ku bu bisti.

“Kuma ku Ña Ropa ta Mostra Kin ku N Sedu?” (Artigu na internet)

Jubi utrus prinsipius ku pudi judanu toma bon disisons.

“Sera ki bu stilu di ropa ta ngaba Deus?” (Sintinela di setembru di 2016)

Kuma ku un minjer ku misti kontenta Deus aprindi seta disison ku utrus toma na manera ke na bisti?

“Ropa ku aparensia seduba un purblema pa mi” (No Korda!, 22 di dizembru di 2003)