7. Renu di Deus tene minjor leis

Guvernus ta fasi leis ke pensa di kuma i na benefisia i proteẑi se sidadons. Renu di Deus tene tambi leis ku si sidadons dibi di sigi. Lei 1 Koríntius 6:9-11, dipus bo kombersa aserka des purguntas:

• Kuma ku pensa mundu na sta si tudu jintis rispita leis di Deus?a

• Bu pensa kuma Jeova tene diritu di spera pa sidadons di Renu rispita si leis? Pabia?

• Ke ku mostra di kuma jintis ku ka ta obdisi es leis pudi muda? — Jubi versikulu 11.

Manga di jintis ka ta sta avontadi pa papia di seksu. Ma, ora ku Biblia na papia di seksu, i ta fasil di un manera klaru i ku rispitu. Ke ki fala ta benefisianu. Tambi i ta fasi sintidu. Alen di kila, i Jeova ku kumpunu. I sibi ke ki i minjor pa nos. I kontanu ke ku no dibi di fasi pa kontental i ke ku pudi judanu tene un vida filis pa sempri.

1. Kuma ku Jeova ta nkara seksu?

Seksu i un prenda di Jeova. I misti pa seksu da kontentamentu pa un omi ku un minjer ku kasa. Es prenda ka ta pirmiti kasal so pa e tene fiju, ma tambi i un manera di mostra amor ku kariñu pa n̈utru. E ku manda Palabra di Deus fala asin: ‘Minjer ku bu kasa ocau nobu, kontenti ku el’. (Ditus 5:18, 19) Jeova na pera pa kristons ku kasa sedu fiel pa n̈utru, asin nunka e ka na fasi adulteriu. — Lei Ebreus 13:4.

2. Ke ki pekadu seksual?

Biblia falanu di kuma: “Kilis ku ta fasi pekadu seksual, . . . ka na ten parti na renu di Deus.” (1 Koríntius 6:​9, 10) Kilis ku skirbi Biblia na gregu e usa palabra por·neiʹa pa fala di pekadu seksual. Es palabra nklui (1) seksua entri dus jintis ku ka kasa, (2) seksu entri omi ku omi o minjer ku minjer, i (3) seksu ku limaria. No ta kontenta Jeova i no ta benefisia no kabesa ora ku no “sta libri di pekadu seksual.” — 1 Tesalonisensis 4:3.

APRINDI MAS

3. Kuri di pekadu seksual

Un omi fiel comadu José nega tene relason seksual ku un minjer. Lei Kumsada 39:​1-​12, dipus bo kombersa aserka des purguntas:

• Ke ku leba José na kuri? — Jubi versikulu 9.

• Bu pensa kuma José toma un bon disison? Pabia ku bu pensa asin?

VIDEO: Kuri di pekadu seksual (5:​06)

Jeova misti pa anos tudu no nega pekadu seksual. Lei 1 Koríntius 6:18, dipus bo kombersa aserka des purguntas:

• Kal situason ku pudi leba un algin na fasi pekadu seksual?

• Kuma ku bu pudi kuri di pekadu seksual?

4. Bu pudi risisti tentason

VIDEO: Lei Biblia pa Luta Kontra Tentason (3:​02)

• Oca ku ermon na video da di konta di kuma si pensamentus ku si komportamentu pudi lebal na sedu infiel pa si minjer, ke ki i fasi?

Mesmu kristons ki fiel ta luta un ora pa pudi tene pensamentus limpu. Kuma ku no pudi para pensa na kusas ligadu ku seksu? Lei Filipensis 4:​8, dipus bo kombersa aserka des purguntas:

• Kal tipu di kusas ku no dibi di pensa nel?

• Kuma ku lei Biblia ku manti okupadu na sirvisu di Jeova, pudi judanu risisti tentason di ka fasi pekadu?

5. Normas di Jeova ta benefisianu

VIDEO: Falta di Bon Juisu (9:​31)

• Kuma ku es joven pui si kabesa na tentason? — Jubi Ditus 7:​8, 9.

• Di akordu ku Ditus 7:​23, 26, pekadu seksual pudi tene rusultadus gravi. Si no manti limpu na sintidu moral, kal purblemas ku no pudi ivita?

• Kuma ku manti limpu na sintidu moral pudi judanu tene un vida filis pa sempri?

Alguns jintis ta pensa di kuma, ke ku Biblia fala aserka di omoseksual i falta di amor. Ma Jeova ki un Deus di amor, misti pa tudu jintis tene un vida filis pa sempri. Pa pudi tene es vida, no dibi di vivi di akordu ku si normas. Lei 1 Koríntius 6:​9-​11, dipus bo kombersa aserka des purgunta:

• Na ujus di Deus, sera ki diseẑu omoseksual i uniku kusa ku ka bali?

Pa pudi kontenta Deus, anos tudu no pirsisa di fasi mudansas. Sera ki i bali pena fasi es sforsu? Lei Salmu 19:​8, 11, dipus bo kombersa aserka des purguntas:

• Sera ki bu pensa kuma normas di moral di Jeova i un kusa normal? Pabia ku bu pensa i normal, o pabia ku bu pensa i ka normal?

RUSUMU

Seksu i un prenda ku Jeova da pa kontenta un omi ku si minjer.

Rekapitulason

• Kal kusas ku fasi parti di pekadu seksual?

• Ke ku pudi judanu ivita pekadu seksual?

• Kal benefisius ku no ta tene di sigi normas di moral di Jeova?

TENE MAS INFORMASON

Aprindi pabia di ke ku manda Deus misti pa un omi ku un minjer ku misti mora juntu pa e kasa.

“Ke ku Biblia fala aserka di mora juntu sin kasa?” (Artigu na internet)

Aprindi kuma ku leis di Deus aserka di tudu pratikas seksual ta proteẑinu.

“Sera ki na Bardadi Usa Boka pa Karisia Macundadi o Femiandadi di Utru i Fasi Seksu?” (Artigu na internet)

Na spiriensia “E tratan ku rispitu,” jubi ke ku leba un omoseksual muda si vida pa kontenta Deus.

“Biblia ta muda vida di jintis” (Sintinela di 1 di abril di 2011)

Na mundu ntidu, i ten diferenti manera di pensa aserka di bibidas alkoliku. I ten kilis ku utrora gosta di bibi ora ke sta juntu ku se amigus. Utrus ta disidi ka bibi nada. I ten inda utrus ku ta bibi ciu tok e ta cami. Ke ku Biblia fala aserka di bibidas alkoliku?

1. Sera ki i mal bibi bibidas alkoliku?

Biblia ka tuji bibi bididas alkoliku. En ves di kila, Biblia fala di manga di bon kusas ku Deus danu, entri elis i sta “biñu ku ta kontenta korson di omi”. (Salmu 104:​14, 15) Alguns omis ku minjeris fiel ku Biblia fala del ta bibi bibidas alkoliku. — 1 Timótiu 5:​23.

2. Kal avisu ku Biblia da pa kilis ku disidi bibi?

Jeova kondena bibi ciu ku cami. (Gálatas 5:​21) Si Palabra fala: “Ka bu sta na metadi di bibiduris”. (Ditus 23:20) Si no disidi bibi, nin si anos so, no ka dibi di bibi ciu tok ku no ka pudi pensa diritu, kontrola no palabras, no asons, o prejudika no saudi. Si no ka pudi kontrola kuantidadi ku no na bibi, no dibi di sta dispostu pa para bibi di un bias.

3. Kuma ku no pudi rispita disisons di utrus aserka di bibidas alkoliku?

Kada kin dibi di disidi si na bibi o nau. No ka dibi di kritika un algin ku disidi bibi un bokadu, i no ka dibi di pui un algin bibi si ka misti. (Romanus 14:10) No pudi kuji ka bibi si na tisi purblemas pa utrus. (Lei Romanus 14:21.) ‘No ka dibi di buska no interes propi, ma no dibi di buska interes di utru.’ — Lei 1 Koríntius 10:​23, 24.

APRINDI MAS

4. Disidi si bu dibi di bibi

Ke ku Jesus pensa aserka di bibidas alkoliku? Pa oja resposta, jubi purmeru milagri ki fasi. Lei Jon 2:​1-​11, dipus bo kombersa aserka des purguntas:

• Kuma ku es milagri mostra ke ku Jesus ta pensa aserka di bibidas alkoliku i kilis ku ta bibi?

• Suma Jesus ka kondena bibi, kuma ku kriston dibi di oja un algin ku disibi bibi?

Suma kristons sta livri di bibi bibidas alkoliku, kila ka signifika di kuma sempri i bon pa e ba ta bibi. Lei Ditus 22:​3, i jubi kuma ku kusas ku faladu del li pudi judau sibi si bu na bibi:

• Bu na kurinti karu o tarbaja ku un makina.

• Bu preña.

• Mediku fala pa ka bu bibi bibidas alkoliku.

• Bu tene purblema di kontrola kuantidadi di bibidas alkoliku.

• Lei ka pirmitiu bibi.

• Bu sta ku un algin ku disidi ka bibi pabia i teneba purblema di kontrola kuantidadi di bibidas alkoliku.

Sera ki bu dibi di sirbi bibidas alkoliku na un festa di kasamenti o na utru jumbai? Pa oja ke ku pudi judau disidi, mostra VIDEO.

VIDEO: Sera ki N Dibi di Da Jintis Bibidas Alkoliku? (2:​41)

Lei Romanus 13:13 ku 1 Koríntius 10:​31, 32. Dipus di lei kada testu, bo kombersa aserka des purgunta:

• Kuma ku aplika es prinsipiu pudi judau toma disison ku na kontenta Jeova?

5. Disidi kal kuantidadi ku bu na bibi

Si bu disidi bibi bibidas alkoliku, lembra des: Jeova ka kondena bibi bibidas alkoliku, ma i kondena bibi ciu. Pabia? Lei Oseias 4:11, 18, dipus bo kombersa aserka des purgunta:

• Ke ku pudi akontisi ora ku un algin bibi ciu?

Kuma ku no pudi ivita bibi ciu? No pirsisa di rikuñisi no limiti. Lei Ditus 11:​2, dipus bo kombersa aserka des purgunta:

• Pabia ki bon pui limiti na kuantidadi ku bu dibi di bibi?

6. Ke ku pudi juda un algin para bibi ciu

VIDEO: ‘N staba ja kansadu di ña stilu di vida’ (6:​32)

• Na video, kuma ku Dmitry ta komporta ora ki bibi?

• Sera ki i konsigi para bibi logu-logu?

• Kuma ki bin konsigi para bibi ciu?

Lei 1 Koríntius 6:​9-11, dipus bo kombersa aserka des purguntas:

• Ke ku manda cami i un kusa seriu?

• Ke ku ta mostra di kuma un algin ku ta bibi ciu pudi muda?

Lei Mateus 5:​30, dipus bo kombersa aserka des purgunta:

• Oca Jesus usa komparason di korta mon, i misti fala di kuma no pirsisa di disa un kusa pa pudi kontenta Jeova. Ke ku bu dibi di fasi si bu sta na fasi sforsu garandi pa para bibi ciu?a

Lei 1 Koríntius 15:​33, dipus bo kombersa aserka des purgunta:

• Kal ku na sedu rusultadu si kilis ku bu ta ndianta ku el ta bibi ciu?

RUSUMU

Jeova da bibidas alkoliku pa no pudi kontenti, ma i kondena bibi ciu ku cami.

Rekapitulason

• Ke ku Biblia fala aserka di bibidas alkoliku?

• Kal ki pirigu di bibi ciu dimas?

• Kuma ku no pudi rispita disison ku utrus toma aserka di bibidas alkoliku?

TENE MAS INFORMASON

Kuma ku jovens pudi toma bon disison aserka di bibidas alkoliku?

Pensa Antis di Bu Bibi (2:​31)

Diskubri ke ku bu pudi fasi pa vensi purblema ku bibidas alkoliku.

“Pui bibidas alkoliku na si lugar” (Sintinela di 1 di janeru di 2010)

Sera ki kristons dibi di maja kopu na n̈utru?

“Purguntas di kilis ku ta lei no publikasons” (Sintinela di 15 di fevereru di 2007)

Mesmu manera ku bu ama Jeova ciu, i bu ta fasi manga di sforsu pa ivita kualker kusa ku na pul i sinti mal, i na ten mumentus ku bu na yara. Ma i ten pekadus mas gravi di ki utrus. (1 Koríntius 6:​9, 10) Si bu fasi un pekadu gravi, lembra di kuma Jeova ka na disa di amau, i sta pruntu pa judau i purdau.