• Bu pudi sedu amigu di Jeova
    Bu Pudi Tene un Vida Filis pa Sempri! — Benefisia di Studu di Biblia

    • Bu pudi sedu amigu di Jeova

      Jeova misti pa bu kunsil mas diritu. Pabia? I ta spera di kuma mas bu kunsi si manera di sedu, si manera di fasi kusas, ku si intenson, bu na mas misti sedu si amigu. Sera ki na bardadi bu pudi sedu amigu di Deus? (Lei Tiagu 2:23.) Ke ku bu dibi di fasi pa sedu si amigu? Biblia ruspundi es purguntas, i mostra tambi kuma, amizadi ku Jeova i amizadi mas importanti ku bu pudi tene.

      1. Kal konviti ku Jeova fasiu?

      “Bo ciga pertu di Deus; i ta ciga pa bos.” (Tiagu 4:8) Ke ku es signifika? Jeova kumbidau pa bu sedu si amigu. Alguns ta pensa kuma e ka pudi sedu amigu di Deus pabia e ka pudi ojal. Ma, na si Palabra, Biblia, Jeova kontanu tudu ke ku no pirsisa di sibi aserka di si manera di sedu, pa no pudi pertusi del. Ora ku no lei Biblia, no amizadi ku Jeova ta sedu mas forti, mesmu si no ka pudi ojal.

      2. Ke ku manda Jeova i minjor amigu ku bu pudi tene?

      Ningin ka amau mas di ki Jeova. I misti pa bu sedu filis i pa bu pidil ajuda kualker mumentu ku bu pirsisa. Bu pudi ‘pui tudu bu kudadi riba del, pabia i ta toma konta di bo.’ (1 Pedru 5:7) Jeova sta sempri pruntu pa apoia, konsola i sukuta si amigus. — Lei Salmu 94:18, 19.

      3. Ke ku Jeova misti pa si amigus fasi?

      Jeova gosta di tudu jinti, “ma i ta mostra si sigridu pa kilis ku tene korson di bardadi.” (Ditus 3:32) Jeova misti pa si amigus sforsa na fasi kusas ki fala kuma i bon, i ivita fasi kusas ki fala kuma i mau. Alguns jintis ta fala kuma e ka pudi fasi tudu ke ku Jeova misti pa e fasi, o ivita di tudu ke ku Jeova fala i ka bon. Ma, Jeova ta ntindinu. I ta seta kualker algin ku na bardadi amal, i ku ta fasi sforsu di kontental. — Salmu 147:11; Atus 10:34, 35.

      APRINDI MAS

      Aprindi kuma ku bu pudi sedu amigu di Jeova, i diskubri pabia ku el i minjor amigu ku bu pudi tene.

      4. Abraon seduba amigu di Jeova

      Ke ku Biblia fala aserka di Abraon (ku ta comaduba Abron) ta danu un ideia di ke ku signifika sedu amigu di Deus. Lei es storia aserka di Abraon na Kumsada 12:1-4. Dipus bo kombersa aserka des purguntas:

      • Ke ku Jeova fala Abraon pa i fasi?

      • Ke ku Jeova purmiti Abraon?

      • Kuma ku Abraon sigi instrusons ku Jeova dal?

      5. Ke ku Jeova ta spera di si amigus

      Normalmenti no ta spera pa no amigus fasi sertus kusas.

      • Kal ki alguns kusas ku bu mistiba pa bu amigus fasi pa bo?

      Lei 1 Jon 5:3, dipus bo kombersa aserka des purgunta:

      • Ke ku Jeova ta spera di si amigus?

      Si no misti obdisi Jeova, no pirsisa di muda no komportamentu o no manera di sedu. Lei Isaias 48:17, 18, dipus bo kombersa aserka des purgunta:

      • Ke ku manda Jeova misti pa si amigus fasi mudansas?

      Un tarbajadur di konstruson na yangasa si kumpañeru un kapasiti di proteson.

      Un bon amigu na lembrantanu kusas ku na proteẑinu i ku na benefisianu. Asin tambi ku Jeova ta fasi ku si amigus.

      6. Ke ku Jeova ta fasi pa si amigus

      Jeova ta juda si amigus ora ke tene purblema. Mostra VIDEO, dipus bo kombersa aserka des purgunta:

      VIDEO: Jeova Fasi Manga di Kusas pa Mi (3:20)

      • Kuma ku Jeova juda es minjer na video, lida ku si sintimentus i pensamentus negativu?

      Lei Isaias 41:10, 13, dipus bo kombersa aserka des purguntas:

      • Ke ku Jeova purmiti fasi pa tudu si amigus?

      • Bu pensa kuma Jeova pudi sedu un bon amigu pa bo? Pabia ku bu pensa sin?

      Imaẑen: Amigus intimu na juda n̈utru. 1. Un omi na juda utru lambu un mesa garandi. 2. Un minjer na konta si kumpañer si sintimentus. 3. Un omi na juda utru yanda ku muleta.

      Amigus intimu ta judau ora ku bu pirsisa. Jeova na judau tambi.

      7. Pa sedu amigu di Jeova i pirsis papia kel i sukutal

      No amizadi ta torna mas forti ora ku no na papia ku no amigu. Lei Salmu 86:6, 11, dipus bo kombersa aserka des purguntas:

      • Kuma ku no pudi papia ku Jeova?

      • Kuma ku Jeova ta papia ku nos?

      Imaẑen: 1. Un minjer na ora. Un seta sta riba di si kabesa i na indika pa riba. 2. Un minjer na lei Biblia. Un seta sta riba di si kabesa i na indika pa bas.

      No ta papia ku Jeova atraves di orason; el i ta papia ku nos atraves di Biblia.

      ALGUNS JINTIS TA FALA: “No ka pudi sedu amigu di Deus.”

      • Kal testu di Biblia ku bu na usaba pa mostra kuma no pudi sedu amigu di Jeova?

      RUSUMU

      Jeova misti sedu bu amigu, i na judau pertusi del.

      Rekapitulason

      • Kuma ku Jeova ta juda si amigus?

      • Pabia ku Jeova fala si amigus pa e fasi mudansas?

      • Bu pensa kuma i difisil sedu amigu di Jeova? Pabia ku bu pensa i difisil, o pabia ku bu pensa i ka difisil?

      Tenta fasi es

      TENE MAS INFORMASON

      Aprindi kuma ku bu pudi sedu amigu di Deus.

      “Kuma ku N pudi sedu amigu di Deus?” (Purguntas ku Jovens ta Fasi— Respostas ku ta Juda, Vulumi 2, kapitulu 35)

      Diskubri pabia ku un minjer fala kuma amizadi ku Jeova salva si vida.

      “N ka misti muri!” (Sintinela N.° 1 2017)

      Sukuta ke ku jovens fala aserka di se relason ku Jeova.

      Ke ku Signifika Sedu Amigu di Deus? (1:46)