PARTI 8

Nega riliẑion falsu; Pratika riliẑion di bardadi

1. Kal disison ku sta dianti di jinti aos aserka di adorason?

JESUS fala: “Kil ku ka sta ku mi i kontra mi.” (Mateus 12:30) O no sta ku Jeova o ku Satanas. Manga di jintis ta pensa kuma e sta na adora Deus di manera ki i misti, ma Biblia mostra ki Satanas sta na “ngana tudu mundu.” (Apokalipsi 12:9) Milyons di jintis ta fia ki e sta na adora Deus, ma na bardadi e sta na adora Satanas Diabu! Aos, dus disison sta dianti di jinti pa toma: O sirbi Jeova, “Deus fiel,” o Satanas, “pape di mintida.” — Salmu 31:5; Jon 8:44.

Liberta di riliẑion falsu

2. Kal ki un manera ku Satanas ta tenta tuji jintis adora Jeova?

² I jiresa di no parti toma disison pa sirbi Jeova. Es disison pudi tisiu bensons. Ma Satanas ka na sta kontenti ku kualker algin ku toma es disison; i na kansa kin ku fasi kila. Un manera ki i ta fasi kila i pa usa amigus o familias pa gozau o sta kontra bu disison di sirbi Deus. Jesus fala: “Asin inimigu di algin i ta sedu si propi familia.” — Mateus 10:36.

3. Ke ku bu na fasi si bu familia o amigu sta kontra pa bu adora Deus?

³ Si kila akontisi ku bo, ke ki bu na fasi? Manga di jintis sibi kuma se adorason ka sta sertu, ma mesmu asin e ta tene duvida si kontra e dibi di sai di la. E ta pensa kuma e ka sta na sedu fiel pa se familia. Sera ki kila i bon manera di pensa? Si bu sibi kuma un algin di bu familia tokadu ta fuma droga, sera ki bu ka na konsijal di kuma kila pudi fasil mal? Ku sertesa bu ka na junta kel na fasi kil mal.

4. Ke ki Josue falaba Israelitas aserka di adorason?

⁴ Josue kumbida Israelitas pa disa pratikas ku tradisons di riliẑions di se donas. I fala: “Asin, bo rispita SIÑOR, bo sirbil ku korson limpu, ku bardadi. Bo bota fora ki deusis ku bo papes sirbiba kontra e staba na utru ladu di riu Eufrates ku na Ejitu; bo sirbi SIÑOR.” (Josué 24:14) Josue seduba algin fiel pa Deus, i Jeova abensual. Si no sedu tambi fiel pa Jeova i na abensuanu. — 2 Samuel 22:26.

Nsinus di riliẑion — Bardadi ku mintida

Trindadi: Manga di riliẑions ta sina ki Deus i Trindadi. E ta fala ki “Pape i Deus, Fiju [Jesus] i Deus, i Spiritu Santu i Deus, mesmu asin e ka sedu tris Deus ma so un Deus.”

Biblia ka fala di palavra “Trindadi,” nin i ka fala di kuma Jeova i tris jinti na un algin. Jeova i uniku Deus. Purmeru Koríntius 8:6 fala: “Ma pa nos i ten son un Deus, Pape.” Jeova i mas Garandi. Jesus i ka Deus, ma sin “Fiju di Deus.” ( 1 Jon 4:15) Di mesmu manera, spiritu santu i ka Deus. Nin i ka sedu un algin. I forsa ki Deus ta usa. — Atus 1:8; Efésius 5:18.
Alma: Manga di riliẑions ta sina ki alma i un kusa dentru di algin ku ka ta muri. Biblia fala ki alma i algin, asin algin pudi muri. — Kumsada 2:7; Ezekiel 18:4.
Nfernu di fugu: Riliẑions falsu ta sina ki alma di jintis mau ta kastigadu pa sempri na nfernu. Biblia fala ki kilis ku muri “e ka sibi nada.” (Eklesiastis 9:5) Tambi Biblia fala ki “Deus i amor.” (1 Jon 4:8) Jeova, Deus di amor, nunka i ka na kastiga jintis ku fugu.

Kuadru: Ke ki Biblia fala aserka di Trindadi, alma ku nfernu di fugu?

Kaba ku kusas usadu na adorason falsu

5. Pabia di ke ku manda no dibi di libra di kusas di jambakusis?

⁵ Liberta di adorason falsu signifika tambi kaba ku tudu kusas ku no tene di jambakus, muru, irans, suma pur isemplu cifri, mandija, anel, makati, o kusas suma esis. Es i importanti, pabia i ta mostra kuma bu pui tudu bu konfiansa na Jeova.

6. Ke ku purmeru Kristons fasi ku se livrus di jambakusindadi?

⁶ Jubi ke ki purmeru Kristons fasiba oca e disidi sedu pratikantis di riliẑion di bardadi. Biblia fala: “Manga delis tambi ku ta fasiba tarbaju di jambakus junta se librus, e kema elis dianti di tudu jinti.” — Atus 19:19.

7. Ke ki no pudi fasi si dimonius o irans na kansanu?

⁷ Na tempu pasadu, i tenba jintis ki staba nvolvidu ku kusas di futis, jambakus o muru. Ma gos e kunsa na sirbi Jeova. Na kumsada, dimonius pudi kansa elis. Si kila akontisi ku bo, fasi orason, coma nomi di Jeova na vos altu. Jeova na judau. — Ditus 18:10; Tiagu 4:7.

8. Kuma ki Kristons ta oja idulus, imaẑens i fotos ku sta ligadu ku adorason falsu?

⁸ Kilis ku misti sirbi Jeova e ka dibi di tene o usa idulus, imaẑens, o fotos ku tene ligason ku adorason falsu. Kristons di bardadi “na yanda na fe, i ka na kil ku no na oja.” (2 Koríntius 5:7) E ta rispita lei di Deus ku tuji usa kualker imaẑen na adorason. — Saida 20:4, 5.

Junta ku povu di Jeova

Un mame na kusiña juntu ku si fiju pikininu

9. Kal konsiju ki Biblia da aserka di sedu jiru?

⁹ Biblia fala sin: “Si bu yanda ku jiru bu na sedu jiru.” (Ditus 13:20) Si bu misti sedu un algin jiru yanda o junta ku Tustumuñas di Jeova. Elis i jintis ku na yanda na kamiñu ki na leba pa vida ku ka ta kaba. — Mateus 7:14.

10. Kuma ki Tustumuñas di Jeova pudi judau na sirbi Deus?

¹⁰ Na bardadi Tustumuñas di Jeova ta mporta ku jintis. Se tarbaju i pa juda jintis sinseru ntindi bardadi di Biblia pa e pudi ngaña vida ku ka ta kaba. E pudi judau na studu di Biblia sin bu paga nada. E na ruspundi bu purguntas i mostrau kuma ki bu pudi aplika leis di Biblia na bu vida. — Jon 17:3.

11. Kuma ki runion Kriston pudi judau?

¹¹ E ta coma kau ke ta fasi runion, Salon di Renu. Si bu bai la bu na aprindi mas aserka di mandamentus di Jeova. Asin bu na tene mas diseju di pratika riliẑion di bardadi. Ku tempu, bu na risibi trenamentu pa juda utrus aprindi bardadi ku sta na Biblia. — Ebreus 10:24, 25.

Un runion di kongregason na un Salon di Renu

12. Kuma ku orason pudi judau na sirbi Deus?

¹² Kunformi bu na aprindi mas aserka di vontadi di Jeova i di ke ki i misti, bu na sta mas admiradu di manera ki ta mostra si amor. Tambi bu na tene diseju di kontental i ivita kusas ki ka misti. Lembra kuma bu pudi pertusi di Jeova ku orason i pidil pa i judau fasi ke ki sertu i ivita ke ki eradu. — 1 Koríntius 6:9, 10; Filipensis 4:6.

Un familia na lei Biblia juntu — Kuma ku bu pudi pratika adorason di bardadi?

13. Kuma ku bu pudi pui pa korson di Jeova sta kontenti?

¹³ Ku tempu, mas ku bu na kirsi na sintidu spiritual, bu na tene diseju di nterga bu vida pa Jeova, asin bu na batiza suma si Tustumuña. Si bu junta ku povu di Jeova bu na kontenta si korson. (Ditus 27:11) Bu na sta entri kil jintis ki propi Deus fala: “N na mora juntu ku elis, N na yanda na se metadi. N ta sedu se Deus; elis e ta sedu ña pobu.” — 2 Koríntius 6:16.

N libertadu di dimonius o irans

I tenba un noti oca N durmi ku ña omi, N obi un vos ku coman pa ña nomi, tris bias. Dipus, N oja tetu kumsa ku yabri, fugu suma un bola kai riba di ña bariga. I klaru ki ña omi ka sinti nada. Ma, N kumsa ku sinti tempratura forti ki dura manga di misis.

Seis mis dipus, memu vos coman mas. Logu, kasa tudu parsi suma mar fundu. Un kobra garandi sai di yagu i rodia ña mon. N tenta sakudil ma suma nada. N staba ku medu garandi. Dipus yagu ku kobra disparsi, N fercadu risu pa con. N pirdi sintidu pa manga di tempu. Kil mesmu vos falan pa N bai pa kau di un jambakus. Oca N punta kil spiritu kal ki si nomi, i dan un nomi ki signifika “riku ma sin fiju.” I purmiti tornan riku ku puder di ba ta kura jintis.

Jintis ku duensi ta sai di pertu i di lunju pa bin kuradu. Antis de ciga ña kasa, N ta ojaba ja elis na ña spiju spesial. Asin ki un algin ciga, N ta pui ña palmu di mon riba di si palmu di mon, logu N ta oja tipu di duensa o purbulema ku si dunu tene juntadu ku mesiñu ki pirsisa del. Kil spiritu ta kontan tambi kantu ki kada kin dibi di paga.

N teneba manga di diñeru i manga di kusas pabia di bon kura ku N ta fasiba. N pasa sedu “riku,” ma N tindi tambi signifikadu di “sin fiju.” Si N padi un fiju logu si ermon garandi ta muri. I seduba dur garandi pa mi. Na tudu kil 12 anus ki N sirbi kil spiritu, N pirdi 6 fiju.

N kumsa pidi Deus pa i judan. N pidil risu. Un dia, un Tustumuña di Jeova konki ña porta. Sempri N ta serkaba elis, ma na kil dia N disidi sukuta elis. Na kombersa ku no tene, N pasa diskubri ki na bardadi N staba na sirbi un dimoniu o iran! N disidi kinti-kinti para vida di jambakus.

Oca N splika es disison pa kil spiritu, i ameasan. Ma N falal: “Di mi ku bo kaba.”

N kema tudu kusas ku N ta usaba na ña tarbaju di jambakus. N studa Biblia ku un di Tustumuñas di Jeova. N pasa sedu servu di Jeova, i N batizadu na anu 1973. Gosi N tene sinku fijus ku bon saudi. Tambi ña omi pasa sedu Tustumuña di Jeova batizadu. — Kontadu pa Josefina Ikezu.

Kuadru: Kuma ki un sertu minjer libertadu di dimonius o irans?