Mudansas ku bebe ta tisi na kasamenti

Ora ku un kasal kumsa tene se purmeru fiju, kila pudi kontenta elis i na mesmu tempu preokupa elis. Gosi suma pape o mame, talves bo na fika surprendidu di diskubri kuma maior parti di bo tempu ku bo inerẑia na usadu pa kuida di bebe. Falta di sonu juntu ku mudansa emosional pudi afeta bo relasionamentu. Abos tudu bo pirsisa di fasi mudansas pa kuida di bo bebe i manti bo kasamenti. Kuma ku konsiju di Biblia pudi juda bos na lida ku es disafiu?

1 NTINDI KUMA BEBE TA MUDA BU VIDA

ES KI BIBLIA FALA: “Amor i sufridur, i bon.” Tambi amor “i ka intereseru, i ka lestu di raiba”. (1 Koríntius 13:​4, 5) Suma padida nobu, i normal ki bu na konsentra bu atenson na bu bebe. Ma bu omi talves pudi sinti kuma i sta na sedu diskisidu, pa kila, ka bu diskisi kuma el tambi i pirsisa di bu atenson. Ku pasensa i bondadi, bu pudi judal sinti kuma bu pirsisa del, i sinti kuma i dibi di juda na kuida di mininu.

“Abos omis, bo yanda ku bo minjeris na ntindimentu”. (1 Pedru 3:⁠7) Ntindi di kuma bu minjer na gasta mas si inerẑia na kuida di bo bebe. Es nobu responsabilidadi, talves pudi fasil sinti preokupadu, kansadu, o te mesmu tristi. Utru ora, talves i pudi te mesmu raiba ku bo, ma tenta sempri sta kalmu, pabia “algin di pasensa i minjor di ki omi forti di gera.” (Ditus 16:32) Ntindil sempri, i dal ajuda ki pirsisa. — Ditus 14:⁠29.

KE KU BU PUDI FASI:

• Pape: Juda bu minjer kuida di bebe, mesmu si sedu di noti. Rapati tempu ku bu ta usa pa fasi utrus kusa, pa bu pudi gasta mas tempu ku bu minjer i bu bebe.

• Mame: Ora ku bu omi misti judau kuida di bebe, ka bu nega. Si i ka kuida ben del, ka bu kritikal, ma ku bondadi mostral manera di fasil.

2 BO FORTALESI BO RELASON

ES KI BIBLIA FALA: “E ta sedu un kurpu son.” (Kumsada 2:24) I bardadi di kuma bo tene nobu membru na familia, ma lembra kuma abo ku bu parseru bo sedu inda “un kurpu son.” Fasi tudu sforsu pa manti bo relason forti.

Minjeris, bo gardisi bo omis pa ajuda i apoiu ke na da bos. Bo palabras di apresu pudi tene efeitu nelis suma si na da elis bon “saudi.” (Ditus 12:18) Omis, bo konta bo minjeris kuma bo ama elis dimas, i tambi bo da elis balur. Bo Ngaba elis pa manera ke na kuida di familia. — Ditus 31:​10, 28.

“Ningin ka dibi di buska si interes propi, ma i dibi di buska interes di utru.” (1 Koríntius 10:24) Sempri fasi ke ki i minjor pa bu parseru. Suma kasadus, bo ranja tempu pa papia, eloẑia i sukuta n̈utru. Ka bu sedu iguista na asuntu di relason seksual. Preokupa ku nesesidadi di bu parseru. Biblia fala: “Bo ka dibi di nega vontadi di n̈utru, son si bo konkorda pa lunjusi di n̈utru un bokadu”. (1 Koríntius 7:3-5) Bo papia aserka des, i bo sedu klaru pa n̈utru. Bo pasensa ku ntindimentu na torna bo relason mas forti.

KE KU BU PUDI FASI:

• Ka bo diskisi ranja tempu so pa abos dus.

• Fasi algun kusa ku na fasi pa bu parseru sinti kuma bu gosta del, mesmu si pikininu, suma pur isemplu mandal mensaẑen o dal prenda.

3 BO SINA BO FIJU

ES KI BIBLIA FALA: “Disna di bu mininesa bu sibi Skritura Sagradu ku pudi fasiu jiru pa salbason”. (2 Timótiu 3:15) Bo programa ke ku bo na fasi pa sina bo fiju. Mininu tene un kapasidadi di aprindi ki adimiradu dimas, mesmu antis di i padidu. Mesmu inda na bariga, i pudi rapara bu fala, i bu emosons pudi afetal. Lei pa rel nkuantu i sedu inda bebe. I bardadi kuma i ka na ntindi ke ku bu na lei, ma kila pudi bin judal na gosta di leitura ora ki garandi.

Ka bu pensa kuma bu fiju i pikininu inda pa aprindi aserka di Deus. Ora Jeova si dianti. (Ripitison di Lei 11:19) Mesmu si bo na brinka, papia di kusas ku Jeova kumpu. (Salmus 78:​3, 4) Ora ki na kirsi, i na oja amor ku bo tene pa Jeova, tambi kila na fasil pa i ama Jeova.

KE KU BU PUDI FASI:

• Ora bu pidi jiresa pa pudi sina bu fiju.

• Ripiti palabras o ideias importantis pa bu fiju, asin i na kumsa tene ansia di aprindi.