Ke ku manda Deus tene un organizason?

1. Ke ku manda Deus organiza antigu Israel?

Deus organizaba fijus di Abraon na un nason i da elis leis. I coma nason pa nomi di “Israel” i fasi elis suma difindiduris di adorason di bardadi ku si palabra. (Salmu 147:19, 20) Asin, jintis di tudu nasons pudi risibi bensons atraves di Israel. — Lei Kumsada 22:18.

Deus kujiba Israelitas suma si tustumuñas. Se antigu storia i amostra di kuma ki jintis ta benefisia ora ke obdisi leis di Deus. (Ripitison di Lei 4:6) Asin, atraves di Israelitas, utrus pudiba kunsi Deus di bardadi. — Lei Isaias 43:10, 12.

2. Ke ku manda kristons di bardadi sta organizadu?

Ku tempu, Israel pirdi fabur di Deus, i Jeova troka ki nason pa kongregason di Kristons. (Mateus 21:43; 23:37, 38) Gosi, na lugar di Israelitas, kristons di bardadi ta sirbi suma tustumuñas di Jeova. — Lei Atus 15:14, 17.

Jesus organizaba si sigiduris pa prega i fasi disipulus na tudu tera. (Mateus 10:7, 11; 24:14; 28:19, 20) E tarbaju yangasa si pontu mas altu gosi, na kabantada de sistema di kusas. Pa purmeru bias na storia, Jeova uni milyons di jintis di tudu tera na adorason di bardadi. (Apokalipsi 7:9, 10) Kristons di bardadi sta organizadu pa nkoraja i juda n̈utru. Na mundu ntidu, e tene mesmu programa di instruson di Biblia na se runions. — Lei Ebreus 10:24, 25.

3. Kuma ku organizason mudernu di Tustumuñas di Jeova kumsa?

Na anus di 1870 un grupu siñu di studantis di Biblia kumsa diskubri di nobu bardadis di Biblia, ki pirdiba pa manga di tempu. E sibiba kuma Jesus organizaba kongregason kriston pa prega, asin e kumsa un kampaña internasional di pregason aserka di Renu. Na 1931 e pasa usa nomi Tustumuñas di Jeova. — Lei Atus 1:8; 2:1, 4; 5:42.

4. Kuma ku Tustumuñas di Jeova sta organizadu?

Na purmeru sekulu, i tenba un grupu di omis maduru i spirienti ku ta supervisionaba tudu kongregasons kriston na diferenti teras. E omis rukuñisiba Jesus suma Kabesa di kongregason. (Atus 16:4, 5) Di mesmu manera aos, Tustumuñas di Jeova na mundu ntidu ta benefisia di supervison di omis maduru i spirienti ku ta comadu di Korpu Guvernanti. E ta supervisiona filial di Tustumuñas di Jeova ku ta traduzi, mprimi i distribui publikasons di studu bibliku na mas di 600 linguas. De manera, Korpu Guvernanti pudi da nkorajamentu ku orientason basiadu na Biblia, pa mas di 100.000 kongregasons na mundu ntidu. Na kada kongregason, omis kualifikadu ta sirbi suma ansions o pastoris spiritual. E omis ta kuida di rebañu di Deus. — Lei 1 Pedru 5:2, 3.

Tustumuñas di Jeova sta organizadu pa prega bon noba i fasi disipulus. Suma apostulus, e ta prega di kasa pa kasa. (Atus 20:20) Tambi e ta studa Biblia ku kilis ku ama bardadi. Ma Tustumuñas di Jeova ka sedu so un organizason. E sedu un familia ku tene un bon Pape. E sedu ermons ku ta preokupa ku n̈utru. (2 Tesalonisensis 1:3) Suma povu di Jeova sta organizadu pa kontenta Deus i juda utrus, e forma familia mas filis na mundu. — Lei Salmu 33:12; Atus 20:35.