Biblia kontaba ja kuma, dipus di Kristu muri, nsinaduris falsu na sai na metadi di purmerus kristons i e na korumpi bardadi di Biblia. (Atus 20:​29, 30) Ku tempu, kila propi ku akontisi. E jagasi nsinus di Jesus ku ideias di riliẑion pagon, asin i pasa ten un kristianismu falsu. (2 Timótiu 4:​3, 4) Kuma ku no pudi sta sertu di kuma, aos no tene un ntindimentu koretu aserka di ke ku Biblia na bardadi ta sina?

Tempu ciga pa Jeova revela bardadi. Jeova kontaba ja di kuma na tempu di fin “jirus na ntindi” kuñisimentu di bardadi. (Daniel 12:​9, 10) Na 1870 un grupu siñu staba na buska bardadi na Biblia. E diskubri kuma manga di nsinus di igreẑas ka basia na Biblia. Asin, e kumsa na buska ntindi nsinus di bardadi na Biblia i Jeova juda elis ntindi Skrituras.

Omis sinseru studa Biblia ku kuidadu. Es studantis dedikadu di Biblia, suma ku Tustumuñas di Jeova ta comaduba, teneba un metudu di studu ku no ta usa inda te gosi. E ta studaba Biblia asuntu pa asuntu. Ora ke kontra ku un parti di Biblia ki difisil di ntindi, e ta buska splikason na utrus versikulus. Ora ke ciga un konkluson ku sta na armonia ku restu di Skrituras, e ta toma nota. Disa Biblia nterpreta si kabesa juda elis diskubri di nobu bardadi aserka di nomi di Deus ku si Renu, ntenson di Deus pa pekaduris i pa tera, kondison di kilis ku muri ku speransa di resureison. Se piskisa liberta elis di manga di krensas ku pratikas falsu. — Jon 8:​31, 32.

Na 1879 Studantis di Biblia ntindi kuma, ora ciga pa fasi bardadi kunsidu na tudu mundu. Asin, na ki anu, e kumsa pruduzi A Sentinela Anunciando o Reino de Jeová, rivista ku no kontinua publika te aos. Gosi no ta divulga bardadis di Biblia pa jintis na mas di 240 teras i na mas di 750 linguas. Nunka i ojadu manga di ntindimentu di bardadi des manera!

•  Dipus di Kristu muri, ke ku akontisi ku bardadi di Biblia?

•  Ke ku judanu diskubri di nobu bardadi ku sta na Palabra di Deus?

Pa manga di anus, Tustumuñas di Jeova usa, mprimi i distribui manga di tradusons di Biblia. Ma dipus, no bin oja nesesidadi di pruduzi un nobu traduson ku na pudi juda jintis di minjor manera pa e “kunsi bardadi” di manera izatu, kusa ku Deus misti pa tudu jinti. (1 Timótiu 2:⁠3, 4) Asin, na 1950 no kumsa publika partis di no Biblia Tradução do Novo Mundo na inglis, un traduson ku tene linguajen mudernu. Es Biblia traduzidu di un manera izatu na mas di 130 linguas.a

I pirsizaduba di un Biblia fasil di ntindi. Linguas ta muda ku tempu, i manga di tradusons di Biblia tene palabras komplikadu o antigu ki difisil di ntindi. Tambi, i diskubridu Biblias antigu mas izatu i ku pertusi mas di orijinal, kusa ku rusulta na minjor ntindimentu di ebraiku, aramaiku ku gregu di Biblia.

I pirsizaduba di un traduson fiel pa palabra di Deus. En ves di toma liberdadi ku palabras nspiradu di Deus, tradutoris di Biblia dibi di sedu fiel pa testu orijinal. Ma, nomi di Deus, Jeova, ka usadu na manga di tradusons di Skrituras Sagradu.

I pirsizaduba di un Biblia ku na difindi si Dunu. (2 Samuel 23:⁠2) Na Tradução do Novo Mundo, nomi di Jeova tornadu na serka di 7 mil lugaris ki staba na Biblias antigu, suma ki mostradu bas. (Salmu 83:18) Dipus di manga di anus di piskisa ku fasidu ku kuidadu, rusultadu i un Biblia ku ta da praser di lei, pabia i ta transmiti pensamentus di Deus di manera klaru. Si bu tene Tradução do Novo Mundo na bu lingua o nau, i bon pa bu ba ta lei Palabra di Jeova kada dia. — Josué 1:8; Salmu 1:​2, 3.

•  Ke ku manda no disidi ki i pirsizaduba di un nobu traduson di Biblia?

•  Ke ki bon pa un algin ba ta fasi kada dia, si misti aprindi vontadi di Deus?