Tene konfiansa di kuma no na salvadu ora kes mundu na kaba

I ka na tarda, pasensa ku Jeova tene pa es mundu na bin kaba. Riliẑions falsu na bin kabadu kel, un grupu di nasons na bin ataka povu di Deus i Jeova na bin kaba ku jintis mau na Armajedon. Kristons sta na pera dia kes kusas importanti na kontisi.

Na bardadi, no ka sibi tudu ke ku na bin kontisi na garandi tribulason. Pur isemplu, no ka sibi kal dia izatu ki na kumsa. No ka sibi ke ku na leba pulitikus ataka riliẑions. No ka sibi pa kantu tempu ku nasons na ataka povu di Deus o ke ki kila na nklui. Tambi no ka sibi ke ku Jeova na usa pa kaba ku jintis mau na Armajedon.

Ma, Biblia danu tudu informason ku no pirsisa del pa pudi nfrenta futuru ku konfiansa i ku koraẑen. Pur isemplu, no sibi kuma no sta na vivi na fin di “fin de tempu”. (2 Tim 3:1) No sibi di kuma ataki kontra riliẑions na ‘menusadu’ pa riliẑion di bardadi ka kabadu ku el. (Mat 24:22) No sibi di kuma Jeova na salva si povu. (2 Ped 2:9) No sibi tambi di kuma, kil ku Jeova kuji pa kaba ku jintis mau, i salva garandi multidon na Armajedon i justu i tene puder. — Apok 19:11, 15, 16.

Kusas ku na bin kontisi na futuru na pui pa jintis “dismaja ku medu”. Ma, ora ku no lei i medita na kuma ku Jeova salva si povu na tempu antigu i na ke ki fala aserka di futuru, no pudi ‘firma i yalsa kabesa,’ ku konfiansa di kuma no livramentu pertu. — Luk 21:26, 28.