LISON 18
Kuma ku no pudi sibi ba kin ki kristons di bardadi?
Manga di jinti ta fala di kuma elis i kristons. Ma elis tudu e ka ta fia na mesmu kusas, i e ka tene mesmu manera di vivi. Pa kila, kuma ku no pudi sibi ba kin ki kristons di bardadi?
1. Ke ki un kriston?
Kristons i disipulus, o sigiduris di Jesus Kristu. (Atus 11:26) Kuma ke ta mostra kuma elis i disipulus di Jesus? Jesus fala: “Si bo kontinua na ña palabra, bo ta sedu ña disipulus na bardadi.” (Jon 8:31) Es signifika, kristons di bardadi dibi di obdisi nsinus di Jesus. Suma ku Jesus usa Skrituras pa sina, kristons di bardadi dibi di basia se nsinus na Biblia. — Lei Lukas 24:27.
2. Kuma ku kristons di bardadi ta mostra amor?
Jesus fala si sigiduris: “Bo ama n̈utru suma ku N ama bos.” (Jon 15:12) Kuma ku Jesus mostra kuma i ama si disipulus? I pasa tempu ku elis, i nkoraẑa elis, tambi i juda elis. Te mesmu i da si vida pa relis. (1 Jon 3:16) Di mesmu manera, kristons di bardadi ta fasi mas di ki so papia di amor. E ta mostra kuma e ama n̈utru atraves di se palabras ku se asons.
3. Kal tarbaju ku kristons di bardadi ta fasi?
Jesus da si disipulus tarbaju. “I manda elis pa e bai konta di renu di Deus”. (Lukas 9:2) Kristons di purmeru sekulu, ka ta pregaba so na kau di se adorason, ma tambi na kaus publiku i na kasas di jintis. (Atus 5:42; 17:17) Aos tambi, di mesmu manera, kristons di bardadi ta prega bardadis ku sta na Biblia na kualker kau ke oja jintis. E ama jintis, asin e ta kontenti di usa se tempu ku inerẑia pa konta jintis mensaẑen di speransa ku konsolu ku sta na Biblia. — Markus 12:31.
APRINDI MAS
Jubi kuma ku kristons di bardadi sedu diferenti ku kilis ku ka ta sigi nsinus ku izemplu di Jesus.
4. E ta buska bardadi ku sta na Biblia
Kristons di purmeru sekulu da balur pa Palabra di Deus.
I ka tudu ku ta fala e sedu kriston ku ta da balur pa bardadis ku sta na Biblia. Mostra VIDEO, dipus bo kombersa aserka des purgunta:
Ke ku alguns igreẑas ku ta fala e sedu kristons fasi pa tuji jintis aprindi ke ku Jesus sina?
Jesus sina bardadi ku sta na Palabra di Deus. Lei Jon 18:37, dipus bo kombersa aserka des purgunta:
Di akordu ku Jesus kuma ku no pudi sibi ba kin ki kristons ku “misti bardadi”?
5. E ta prega bardadis ku sta na Biblia
Kristons di purmeru sekulu ta prega utrus.
Antis di Jesus bai pa seu, i da si sigiduris tarbaju pa fasi ku kontinua te aos. Lei Mateus 28:19, 20 ku Atus 1:8, dipus bo kombersa aserka des purgunta:
Te kal tempu i te nunde ke dibi di prega?
6. E ta pratika ke ke ta sina
Ke ku konvensi un omi comadu Tom di kuma i diskubri ba kin ki kristons di bardadi? Mostra VIDEO, dipus bo kombersa aserka des purguntas:
Na video, ke ku pui Tom fika mal ku ke ku riliẑion ta fasi?
Ke ku konvensil di kuma i oja kristons di bardadi?
Si algin fala kuma i ta sigi Jesus i dibi di mostral na si asons. Lei Mateus 7:21, dipus bo kombersa aserka des purgunta:
Di akordu ku Jesus, ke ku manda i ka basta so fala no ta sigil?
7. E ta ama n̈utru
Kristons di purmeru sekulu ta mostra amor pa n̈utru.
Sera ki na bardadi kristons ta pui se vida na pirigu pabia di se ermons na fe? Mostra VIDEO, dipus bo kombersa aserka des purguntas:
Na video, ke ku pui Lloyd pui si vida na pirigu pa salva ermon Johansson?
Ke ku bu pensa, sera ki i aẑi suma un kriston di bardadi?
Lei Jon 13:34, 35, dipus bo kombersa aserka des purguntas:
Kuma ku disipulus di Jesus o kristons di bardadi, ta trata jintis di utru rasa o nason?
Na tempu di gera, ke ku kristons di bardadi ta fasi?
ALGUNS JINTIS TA FALA: “Deus ta seta tudu riliẑions.”
Kal testu ku bu na usa pa judal sibi ba kin ki kristons di bardadi?
RUSUMU
Kristons di bardadi ta sigi ke ku Biblia ta sina, e ta mostra amor di bardadi i e ta sina bardadis ku sta na Biblia.
Rekapitulason
Na ke ku kristons di bardadi ta basia se nsinus?
Kal kusas ku ta mostra ba kin ki kristons di bardadi?
Kal tarbaju ku kristons di bardadi ta fasi?
TENE MAS INFORMASON
Aprindi mas aserka di un grupu di jintis ku ta fasi sforsu pa sigi izemplu di Jesus Kristu ku si nsinus.
Jubi kuma ku un irma katoliku oja “un familia spiritual di bardadi.”
“E usa Biblia pa ruspundi tudu purgunta!” (Sintinela di 1 di abril di 2014)
Aprindi kuma ku kristons di bardadi mostra amor pa se kumpañeris ku pirsisa di ajuda.
Ajuda ku No ta Da pa No Ermons ora ki Ten Disastri — So un parti (3:57)