LISON 52
Ke ku manda no manera di bisti ku no aparensia i un kusa importanti?
Anos tudu no gosta di kuji ke ku no na bisti i kuma ku no gosta di sta. Si no sigi alguns prinsipius di Biblia, no ka na kuji so ke ku no gosta di bisti ma tambi no na kontenta Jeova. No na bai jubi alguns des prinsipius.
1. Kal prinsipius ku dibi di gia no manera di bisti ku no aparensia?
No dibi di disidi “bisti simplis, ku rispitu, na manera diritu,” i tene sempri un aparensia limpu ku na mostra utrus di kuma no na “sirbi Deus.” (1 Timótiu 2:9, 10) Jubi es kuatru prinsipius: (1) No ropa dibi di sedu “simplis.” Suma ku bu nota na runions di kongregason, povu di Jeova tene diferenti gustu, ma no ropa ku no manera di kumpu kabelu ta mostra rispitu pa Deus ku no ta sirbi. (2) Bisti ku “rispitu” signifika no aparensia ka dibi di provoka utrus, nin i ka dibi di coma atenson ciu dimas pa nos. (3) “Na manera diritu” signifika no ka ta sigi tudu stilu o ropas ku sta na moda. (4) No aparensia dibi di mostra di manera klaru kuma no ta “sirbi Deus” di bardadi. — 1 Koríntius 10:31.
2. Kuma ku no aparensia na afeta no ermons na fe?
Nin si no tene liberdadi di kuji ke ku no na bisti, no dibi di pensa na kuma ku no aparensia na afeta utrus. No ta tenta fasi no minjor pa ka ofendi ningin, ma pa ‘agrada no ermon pa ben del, pa i pudi kirsi na fe.’ — Lei Romanus 15:1, 2.
3. Kuma ku no aparensia pudi atrai utrus pa adorason di bardadi?
No ta sforsa sempri pa bisti diritu na tudu mumentu, ma no mas ta toma kuidadu ku no manera di bisti ora ku no na bai runion ku pregason. No ka misti pa no manera di bisti distrai utrus di bon noba ku no na prega. En ves di kila, no misti pa no manera di bisti atrai utrus pa Deus ku no sta na sirbi, i pa i sedu “un bon fajamentu na tudu kusa pa nsinamentu di Deus no Salbadur.” — Titu 2:10.
APRINDI MAS
Jubi kuma ku no pudi tene sertesa di kuma, no manera di bisti ku no aparensia na juda utrus sibi di kuma anos i kriston.
No aparensia pudi mostra si no rispita otridadis. Mesmu si Jeova ta oja ke ku sta na no korson, no aparensia dibi di mostra kuma no rispital.
4. Un bon aparensia ta mostra kuma no rispita Jeova
Kal ki rason mas importanti ku dibi di lebanu preokupa ku no aparensia? Lei Salmu 47:2, dipus bo kombersa aserka des purguntas:
Suma no ta representa Jeova, kuma ku kila dibi di afeta no manera di bisti?
Bu pensa kuma i pirsis pa no preokupa na manera ku no ta bisti ora ku no na bai runion ku pregason? Pabia ku bu pensa asin, o pabia ku bu ka pensa asin?
5. Kuma ku bu pudi toma bon disison aserka di ropa ku aparensia
Nin si no ropa karu o baratu, i dibi di sedu limpu i da pa atividadi ku ambienti ku no sta nel. Lei 1 Koríntius 10:24 ku 1 Timótiu 2:9, 10. Dipus, bo kombersa ke ku manda no misti ivita bisti ropa . . .
marlotadu, susu o simplis dimas.
pertadu, ku ta mostra kurpu, o provoka.
Kristons ka pirsisa di sigi Lei di Moisés, ma e pudi aprindi ciu kuma ku Jeova ta pensa. Lei Ripitison di Lei 22:5, bo kombersa aserka des purgunta:
Ke ku manda no dibi di ivita bisti ropa o tene aparensia ku na pui omi parsi ku minjer o minjer parsi ku omi?
Lei 1 Koríntius 10:32, 33 ku 1 Jon 2:15, 16, dipus bo kombersa aserka des purguntas:
Ke ku manda no dibi di preokupa si kontra no aparensia na pui pa jintis nunde ku no mora o na kongregason fika mal?
Kal stilu di ropa ku aparensia ku kustuma ojadu nunde ku bu mora?
Bu pensa kuma alguns des stilu pudi ka sedu bon pa un kriston? Pabia ku bu pensa i bon, o pabia ku bu pensa i ka bon?
No manera di bisti ku no aparensia pudi sedu diferenti ku di utrus ma i pudi kontenta Jeova.
ALGUNS JINTIS TA FALA: “N tene diritu di bisti ke ku N misti.”
Bu konkorda ku es? Pabia ku bu konkorda, o pabia ku bu ka konkorda?
RUSUMU
Ora ku no toma bon disison na no manera di bisti ku no aparensia no ta mostra rispitu pa Jeova i pa utrus.
Rekapitulason
Ke ku manda no manera di bisti ku no aparensia i importanti pa Jeova?
Kal ki alguns prinsipius ku dibi di gia no disison aserka di manera di bisti ku no aparensia?
Kuma ku no manera di bisti ku no aparensia ta afeta manera ku utrus ta oja adorason di bardadi?
TENE MAS INFORMASON
Jubi ke ku utrus ta pensa di bo ora ke oja manera ku bu bisti.
“Kuma ku Ña Ropa ta Mostra Kin ku N Sedu?” (Artigu na internet)
Jubi utrus prinsipius ku pudi judanu toma bon disisons.
“Sera ki bu stilu di ropa ta ngaba Deus?” (Sintinela di setembru di 2016)
Kuma ku un minjer ku misti kontenta Deus aprindi seta disison ku utrus toma na manera ke na bisti?
“Ropa ku aparensia seduba un purblema pa mi” (No Korda!, 22 di dizembru di 2003)