Mostra kuma, bu da balur pa ke ku Jeova ku Jesus fasi pa bo

Ora ku un amigu dau un prenda bonitu kuma ku bu ta sinti? I pudi sedu di kuma, bu na kontenti dimas i bu na misti mostra bu amigu di kuma bu da balur pa prenda. Jeova ku Jesus danu prenda mas garandi ku nunka no ka na ciga di risibi. Es i kal prenda, i kuma ku no pudi mostra di kuma no da balur garandi pa rel?

1. Di kal manera ku no pudi mostra di kuma no da balur pa ke ku Deus ku Kristu fasi pa nos?

Biblia purmiti di kuma “tudu kil ku seta [Jesus]” na tene vida ku ka ta kaba. (Jon 3:16) Kuma ku no pudi fasi kila? No pirsisa di mostra no fe atraves di disisons ku no ta toma ku kusas ku no ta fasi. (Tiagu 2:17) Ora ku no mostra no fe atraves di ke ku no ta fasi ku ke ku no ta papia, no ta fortalisi no amizadi ku Jesus i ku si Pape, Jeova. — Lei Jon 14:21.

2. Kal iventu spesial ku pudi judanu gardisi Jeova ku Jesus pa ke ke fasi?

Na noiti antis di i muri, Jesus konta si sigiduris un utru manera ke pudi mostra di kuma e da balur pa si sakrifisiu. I kumsa un iventu spesial ku Biblia coma di “Sia di Siñor”, tambi i kunsidu pa Komemorason di mortu di Kristu. (1 Koríntius 11:20) Jesus misti pa si apostulus ku tudu kristons di bardadi dipus delis, lembra di kuma i da si vida nos. Aserka des iventu, Jesus da ordi: “Bo fasi es pa ña lembransa.” (Lukas 22:19) Ora ku bu mati Komemorason bu ta mostra di kuma bu da balur pa amor garandi ku Jeova i ku Jesus tene pa nos.

APRINDI MAS

3. Ke ku no pudi fasi pa mostra di kuma no da balur pa sakrifisiu di Jesus?

Imaẑina bu sta na foga i algin salbau. Sera ki bu na diskisi ke ku ki algin fasi pa bo? O sera ki bu na jubi manera di gardisil pa ke ku i fasi pa bo?

No tene opurtunidadi di tene vida ku ka ta kaba pabia di bondadi di Jeova. Lei 1 Jon 4:8-10, dipus bo kombersa aserka des purguntas:

• Ke ku manda sakrifisiu di Jesus i un prenda spesial?

• Kuma ku bu ta sinti pa ke ku Jeova ku Jesus fasi pa bo?

Kuma ku no pudi mostra di kuma no da balur pa ke ku Jeova ku Jesus fasi pa nos? Lei 2 Koríntius 5:15 ku 1 Jon 4:11; 5:3. Dipus di lei kada testu, bo kombersa aserka des purgunta:

• Di akordu ku e testu, kuma ku no pudi mostra di kuma no da balur pa ke ke fasi?

4. Kopia Jesus

Utru manera di mostra di kuma no da balur pa ke ku Jesus fasi i ora ku no na kopial. Lei 1 Pedru 2:21, dipus bo kombersa aserka des purgunta:

• Di kal manera ku no pudi sigi izemplu di Jesus?

5. Mati Komemorason di mortu di Kristu

Pa jubi ke ku akontisi na purmeru Sia di Siñor ku fasidu, lei Lukas 22:14, 19, 20. Dipus bo kombersa aserka des purguntas:

• Ke ku akontisi na Sia di Siñor?

• Kal ki signifikadu di pon ku biñu? — Jubi versikulu 19 ku 20.

Jesus misti pa si disipulus fasi Memorial un bias kada anu na data ki muri. Pa kila, Tustumuñas di Jeova ta junta kada anu pa lembra di mortu di Kristu suma ki mandanu. Pa aprindi importansia des runion, mostra VIDEO. Dipus bo kombersa aserka des purgunta:

VIDEO: Lembra di mortu di Jesus (1:41)

• Ke ku ta akontisi na Komemorason di mortu di Kristu?

Pon ku biñu i simbulus. Pon signifika kurpu perfeitu di Jesus ki sakrifika pa nos. Biñu signifika si sangi.

RUSUMU

No pudi mostra di kuma no da balur pa ke ku Jesus fasi ora ku no mostra fe nel i mati Komemorason di si Mortu.

Rekapitulason

• Ke ku signifika mostra fe na Jesus?

• Kuma ku bu misti mostra di kuma bu da balur pa ke ku Jeova ku Jesus fasi pa bo?

• Ke ku manda i importanti dimas mati Komemorason di mortu di Kristu?

TENE MAS INFORMASON

Ke ku mortu di Kristu ta lebanu fasi?

I Usa Si Kurpu pa Ngaba Jeova (9:28)

Aprindi mas aserka di ke ki fe i kuma ku no pudi mostral.

“Mostra bu fe na promesas di Jeova” (Sintinela di otubru di 2016)

Na storia “N sinti limpu, bibu i kompletu,” jubi kuma ku vida di un minjer minjoria oca i ntindi ke ku sakrifisiu di Kristu signifika pa rel.

“Biblia ta muda vida di jintis” (Sintinela di 1 di agustu di 2011)