LISON 26
Pabia ki ten maldadi ku sufrimentu?
Ora ki akontisi un kusa di mal i normal punta “pabia ki akontisi?” No sta kontenti di sibi kuma Biblia da resposta klaru pa es purgunta!
1. Kuma ku Satanas tisi maldadi na mundu?
Satanas Diabu rebela kontra Deus. Satanas misti manda riba di utrus, i ngana purmeru omi ku minjer, Adon ku Eva, pa e junta kel na si rebelion. Satanas fasi es oca ki konta Eva mintida. (Kumsada 3:1-5) I fasil pensa di kuma Jeova sta na tujil algun kusa di bon. I fala di kuma pekaduris na sedu mas filis si e ka obdisi Deus. Satanas konta purmeru mintida oca ki fala Eva kuma i ka na muri. Pa kila, Biblia coma Satanas di “munturus; i pape di mintida.” — Jon 8:44.
2. Ke ku Adon ku Eva disidi fasi?
Jeova seduba bon dimas pa Adon ku Eva. I fala elis kuma e pudi kume tudu fruta di jardin di Eden menus un son. (Kumsada 2:15-17) Ma mesmu asin, e disidi kume fruta di ki arvuri. Eva “tira si fruta, i kume”. Mas tardi, Adon “kumel ku el.” (Kumsada 3:6) Elis tudu dus e disobdisi Deus. Suma Adon ku Eva sedu perfeitu, i normal pa e fasi ke ki sertu. Ma e disidi di livri vontadi disobdisi Deus, e peka i e nega pa Deus konta elis ke ke dibi di fasi, ku ke ke ka dibi di fasi. Es disison tisi elis sufrimentu garandi. — Kumsada 3:16-19.
3. Kuma ku disison di Adon ku Eva afetanu?
Suma Adon ku Eva peka, e kambanta se pekadu pa tudu se fijus. Biblia fala sin aserka di Adon: “Pekadu yentra na mundu pabia di un omi; i tisi mortu. Asin tambi mortu pasa pa tudu jintis”. — Romanus 5:12.
Pabia ku sufrimentu ten? No ta sufri pabia di manga di rasons. Utrora, no ta sufri pabia di mau disisons ku no ta toma. I no ta sufri tambi pabia di mau disison di utrus. Un ora no ta sufri tambi pabia no sta na mau lugar i na mau tempu. — Lei Eklesiastis 9:12.
APRINDI MAS
Jubi pabia di ke ku manda Deus i ka kulpadu pa maldadi ku sufrimentu ku ten na mundu aos i kuma ki ta sinti ora ku no na sufri.
4. Kin ki responsavel pa no sufrimentu
Manga di jintis fia di kuma i Deus ku sta na manda na mundu. Sera ki es i bardadi? Mostra VIDEO.
Lei Tiagu 1:13 ku 1 Jon 5:19, dipus bo kombersa aserka des purgunta:
Sera ki Deus i kulpadu pa maldadi ku sufrimentu?
5. Jubi rusultadu di guvernu di Satanas
Lei Kumsada 3:1-6, dipus bo kombersa aserka des purguntas:
Kal mintida ku Satanas konta? — Jubi versikulu 4 ku 5.
Kuma ku Satanas da ku ntindi di kuma, Jeova staba na sukundi algun kusa di bon pa pekaduris?
Di akordu ku Satanas, sera ki pekaduris pirsisa di Jeova pa i manda riba delis pa e sedu filis?
Lei Eklesiastis 8:9, dipus bo kombersa aserka des purgunta:
Suma Jeova ka sta na manda nes mundu, ke ku akontisi?
Adon ku Eva seduba perfeitu i e staba na paraísu. Ma e sukuta Satanas i e rebela kontra Jeova.
Dipus di rebelion, pekadu, sufrimentu ku mortu toma konta di mundu.
Jeova na kaba ku pekadu, sufrimentu, ku mortu. Mas un bias, pekaduris na bin sedu perfeitu i e na bin vivi na paraísu.
6. Jeova ta preokupa ku no sufrimentu
Sera ki Deus ta mporta ku no sufrimentu? Jubi ke ku rei Davi ku apostulu Pedru skirbi. Lei Salmu 31:7 ku 1 Pedru 5:7, dipus bo kombersa aserka des purgunta:
Kuma ku bu ta sinti di sibi kuma Jeova ta oja i ta preokupa ku no sufrimentu?
7. Deus na kaba ku sufrimentu di tudu jintis
Lei Isaias 65:17 ku Apokalipsi 21:3, 4, dipus bo kombersa aserka des purgunta:
Ke ku manda i ta konsolanu sibi di kuma Jeova na kaba ku lembransa di tudu mau kusas ku pekaduris pasa?
Sera ki bu sibiba kuma?
Oca ku Satanas konta purmeru mintida, i susa nomi di Jeova. I leba jintis na pensa mau kusas aserka di Jeova pa manera ki fala kuma, Jeova ka ta guverna ku justisa i ku amor. Ora ku Jeova kaba ku sufrimentu di pekaduris na futuru, i na limpa si bon nomi. Na utrus palabra, i na prova di kuma na bardadi si manera di guverna i mas minjor. Limpa nomi di Jeova i asuntu mas importanti na seu ku Tera. — Mateus 6:9, 10.
ALGUNS JINTIS TA FALA: “Disna ki mundu, jintis ta sufri i e na kontinua sufri. Deus ta fasi es pa pudi testanu.”
Kuma ku bu na ruspundi?
RUSUMU
Kilis ki mas kulpadu pa maldadi ku ten na mundu i Satanas Diabu juntu ku Adon ku Eva. Jeova ta preokupa ciu ku no sufrimentu, i ka na tarda i na kaba ku el.
Rekapitulason
Kal mintida ku Satanas Diabu konta Eva?
Kuma ku rebelion di Adon ku Eva afetanu anos tudu?
Kuma ku no sibi di kuma Jeova ta preokupa ku no sufrimentu?
TENE MAS INFORMASON
Aprindi ke ku Biblia fala aserka di pekadu.
Lei mas aserka di disafiu ku Satanas Diabu lantanda na jardin di Eden.
“Ke ku manda Deus disa sufrimentu?” (Sintinela di 1 di janeru di 2014)
Jubi ke ku un omi aprindi aserka di sufrimentu ki ta oja na mundu.