LISON 44
Sera ki tudu festas ta kontenta Deus?
Jeova misti pa no tene kontentamentu na vida i te mesmu fasi festa utrora. Sera ki i tudu festas ku feriadus ku ta kontental? Kuma ku no pudi mostra no amor pa Jeova nes asuntu?
1. Ke ku manda manga di festas ka ta kontenta Jeova?
Bu na fika ku surpresa di sibi kuma manga di festas ka basia na nsinus di Biblia o e bin di pagons. Es tipu di festas pudi sta ligadu ku riliẑions falsu. E pudi sta ligadu ku spiritismu o basia na ideia di kuma alma ka ta muri. Alguns festas ta basia na ideia ku ka sedu real o na sorti. (Isaias 65:11) Jeova avisa si servus: “Bo separa delis. Ka bo toka nada susu”. — 2 Koríntius 6:17.a
2. Kuma ku Jeova ta sinti ora ki na fasidu festas ku na ngaba pekaduris di un manera ki ka normal?
Jeova avisanu pa ka kai na armadilia di “fiansa na omi”. (Lei Jeremias 17:5.) Alguns feriadus ta ngaba guvernantis o militaris. Utrus ta selebra simbulus nasional o independensia. (1 Jon 5:21) Utrus inda ta fasi feriadu ku sta ligadu ku asuntu pulitiku o organizason sosial. Kuma ku Jeova ta sinti ora ku no na ngaba un algin o organizason di un manera ki ka normal, spesialmenti ora ke tene ideia ku sta kontra si vontadi?
3. Kal komportamentu ku ta pui pa un festa ka sedu bon?
Biblia kondena ‘camidera, kume ciu, ku bibi ciu’. (1 Pedru 4:3) Na alguns festas, jintis ta fasi kusas fora di kontrolu i e ta komporta di manera susu. Pa kontinua sedu amigu di Jeova no pirsisa di lunjusi di kil komportamentu susu.
APRINDI MAS
Jubi kuma ku bu pudi toma disisons ku na kontenta Jeova aserka di feriadus ku festas.
4. Nega festas ku ka ta mostra rispitu pa Jeova
Lei Efésius 5:10, dipus bo kombersa aserka des purguntas:
Ke ku no dibi di buska sibi antis di disidi si no na fasi un feriadu?
Kal feriadus ku mas ta ojadu na zona nunde ku bu mora?
Bu pensa di kuma es feriadus ta kontenta Jeova?
Pur izemplu, sera ki bu ciga ja di punta ke ku Deus ta pensa aserka di festa di aniversariu? Biblia nunka fala di servus di Jeova ku fasi se aniversariu, ma i papia di dus jintis ku ka ta sirbil ku fasi se festa di aniversariu. Lei Kumsada 40:20-22 ku Mateus 14:6-10. Dipus bo kombersa aserka des purguntas:
Kal dus kusas ku es festas di aniversariu parsi nel?
Di akordu ku es relatu di Biblia, kuma ku bu pensa Jeova ta sinti aserka di festa di aniversariu?
Ma, talves bu pudi punta: ‘Sera ki i importanti pa Jeova si N partisipa na festa di aniversariu o na utrus festas ku ka basia na Biblia?’ Lei Saida 32:1-8. Dipus mostra VIDEO, i bo kombersa aserka des purguntas:
Pabia ku no pirsisa di tene sertesa di kusas ku Jeova ta seta?
Kuma ku no pudi fasi kila?
Kuma ku no pudi sibi si un festa ka ta kontenta Deus?
Sera ki i basia na nsinus ku ka sta na Biblia? Fasi piskisa pa sibi di nunde ke sai.
Sera ki ta ngaba pekaduris, organizasons, ku simbulus nasional di un manera ki ka normal? No ta ngaba Jeova riba di tudu i konfia di kuma el ku pudi rosolvi purblemas di mundu.
Sera ki kustumus ku pratikas des festas sta kontra normas di Biblia? No pirsisa di kontinua limpu na sintidu moral.
5. Juda utrus pa e rispita ke ku bu fia nel
I pudi sedu difisil pa ka seta ora ku utrus na pincau partisipa na festas ku ka ta kontenta Jeova. Splika bu disisons ku pasensa i ku rispitu. Pa oja un izemplu di kuma ku bu pudi fasi kila, mostra VIDEO.
Lei Mateus 7:12, dipus bo kombersa aserka des purguntas:
Di akordu ku es versikulu, kin ku dibi di disidi si bu familia ku ka ta sirbi Jeova na fasi festa ligadu ku feriadu?
Ke ku bu pudi fasi pa mostra bu familia di kuma nin si bu ka na fasi ki festa ku elis ma bu ama elis, i e tene balur na bu uju?
6. Jeova misti pa no sedu filis
Jeova misti pa no pasa bon mumentu ku no familia i ku no amigus. Lei Eklesiastis 8:15, dipus bo kombersa aserka des purgunta:
Kuma ku es versikulu mostra di kuma Jeova misti pa no sta filis?
Jeova misti pa si povu divirti i pasa un bon mumentu juntu. Mostra VIDEO pa jubi kuma ku es akontisi di un manera klaru na no kongresus internasional.
Lei Gálatas 6:10, dipus bo kombersa aserka des purguntas:
Sera ki no pirsisa di fasi festas ligadu ku feriadu ku kunsidu pa pudi “fasi ben” pa utrus?
Ke ku mas ta dau kontentamentu, sinti obrigadu pa da na un dia di feriadu o da di livri vontadi?
Utrora, manga di Tustumuñas di Jeova ta organiza un kusa spesial pa se fijus i te mesmu e ta da elis prenda na un mumentu ke ka spera. Si bu tene fijus, kal kusas spesial ku bu pudi fasi pa relis?
ALGUNS JINTIS TA FALA: “I ka importanti sibi nunde ku feriadu sai. Mas importanti i pa no pasa bon mumentu ku no familia ku amigus.”
Ke ku bu na fala?
RUSUMU
Jeova misti pa no pasa bon mumentu ku no familia i ku no amigus. Ma i misti tambi pa no nega festas ku ka ta kontental.
Rekapitulason
Kal purguntas ku no pudi fasi pa sibi si un festa ka ta kontenta Jeova?
Kuma ku no pudi juda no familia ku no amigus ntindi no disisons aserka di feriadus?
Kuma ku no sibi di kuma Jeova misti pa no sta filis i pasa bon mumentu?
TENE MAS INFORMASON
Jubi alguns feriadus ku kristons ka ta partisipa nel.
“Pabia ku Tustumuñas di Jeova ka ta Fasi Sertus Feriadus?” (Artigu na internet)
Jubi kuatru rasons ku pui no fia di kuma festas di aniversariu ka ta kontenta Deus.
“Pabia ku Tustumuñas di Jeova ka ta Fasi Festa di Aniversariu?” (Artigu na internet)
Jubi kuma ku mininus ku ama Jeova pudi kontental na tempu di festas.