LISON 45
Ke ku signifika sedu neutru
Jesus fala si sigiduris di kuma e ka dibi di fasi parti “di mundu”. (Jon 15:19) Es nklui sedu neutru, ka toma parti na geras ku asuntus pulitiku di mundu. Na bardadi, i ka tudu ora ki fasil sedu neutru. No pudi gozadu pabia di kila. Kuma ku no pudi manti neutru i kontinua fiel pa Jeova Deus?
1. Kuma ku kristons di bardadi ta oja guvernus di pekadur?
Kristons ta rispita guvernu. No ta fasi suma ku Jesus fala, no ta “da rei kil ki di rei”, es misti fala, no ta obdisi leis di pais, suma paga mpustu ora ke na iziẑi kila. (Markus 12:17) Biblia sina di kuma guvernus di pekadur sta na manda pabia Jeova pirmiti elis manda. (Romanus 13:1) No rikuñisi di kuma guvernus di pekadur tene puder limitadu. No fiansa i na Deus i na si Renu ku sta na seu, ku na bin rosolvi purblemas na tudu mundu.
2. Kuma ku no pudi mostra kuma anos i neutru?
Suma Jesus, no ka ta miti boka na pulitika. Oca ku jintis oja un di milagris ku Jesus fasi, e tenta pul pa i sedu rei na tera, ma i ka seta elis fasi kila. (Jon 6:15) Ke ku manda i ka seta? Pabia, mas tardi i bin fala: “Ña renu i ka de mundu”. (Jon 18:36) Suma disipulus di Jesus, di manga di manera no ta mostra kuma anos i neutru. Pur izemplu, no ka ta bai gera. (Lei Mikeias 4:3.) No rispita simbulus nasional, suma bandera, ma no ka ta adora elis. (1 Jon 5:21) No ka ta sta kontra o toma parti di nin un partidu pulitiku o kandidatu. Des manera i ku utrus no ta mostra kuma no sedu fiel so pa guvernu di Deus, ku sedu si Renu.
APRINDI MAS
Jubi situasons ku pudi testa no neutralidadi, i jubi kuma ku bu pudi toma disisons ku na kontenta Jeova.
3. Kristons di bardadi ta sedu neutru
Jesus ku si sigiduris disanu un izemplu. Lei Romanus 13:1, 5-7 ku 1 Pedru 2:13, 14. Dipus, mostra VIDEO i bo kombersa aserka des purguntas:
Ke ku manda no dibi di rispita otridadis?
Kal ki alguns maneras ku no pudi mostra kuma no sta bas di otridadis?
Na tempu di gera, alguns nasons ta fala di kuma e sedu neutru, ma e ta apoia tudu dus ladu ku sta na gera. Ke ku signifika na bardadi sedu neutru? Lei Jon 17:16. Dipus, mostra VIDEO i bo kombersa aserka des purgunta:
Ke ku signifika sedu neutru?
Ke gora si otridadis pidiu pa bu fasi un kusa ku sta kontra lei di Deus? Lei Atus 5:28, 29. Dipus, mostra VIDEO i bo kombersa aserka des purguntas:
Si lei di pekadur ka konkorda ku lei di Deus, lei di kin ku no dibi di obdisi?
Sera ki bu pudi pensa na un situason nunde ku un kriston pudi ka obdisi otridadis?
4. Sedu neutru na pensamentu ku ason
Lei 1 Jon 5:21. Dipus, mostra VIDEO i bo kombersa aserka des purgunta:
Na video, pabia ku Ayenge disidi ka fasi parti di partidu pulitiku o partisipa na atividadis nasional suma sauda bandera?
Sera ki bu pensa kuma i toma un bon disison?
Kal utrus situasons ku pudi testa no neutralidadi? Mostra VIDEO, dipus bo kombersa aserka des purguntas:
Kuma ku no pudi manti neutru ora ki ten disportu entri diferenti tera?
Kuma ku no pudi manti neutru mesmu si no na afetadu pa disison di pulitikus?
Kuma ku kusas ku no ta obi na notisias o jintis ku no ta ndianta ku el pudi afeta no neutralidadi?
Na kal arias ku un kriston dibi di manti neutru na pensamentu ku ason?
ALGIN PUDI PUNTA: “Pabia ku bu ka ta sauda bandera o kanta inu nasional?”
Kuma ku bu na ruspundi?
RUSUMU
Kristons ta sforsa ciu pa sedu neutru na asuntus pulitiku na se pensamentus, se palabras ku se asons.
Rekapitulason
Ke ku no dibi guvernus di pekadur?
Kuma ku no pudi manti neutru na asuntus pulitiku?
Kal situasons ku pudi testa no neutralidadi?
TENE MAS INFORMASON
Kal sakrifisiu ku no pirsisa di fasi pa pudi manti neutru?
Kuma ku familias pudi purpara antis pa situasons ku pudi testa se neutralidadi?
Ke ku manda ora ku algin na difindi si tera kila i ka rispitu garandi ki pudi tene?
Jubi kuma ku bu pudi kontinua ka fasi parti di mundu ora ku bu na toma disisons na asuntu di tarbaju.
“Kada kin ten ku karga si propi kargu” (Sintinela di 15 di marsu di 2006)