LISON 46
Pabia ku bu dibi di dedika bu vida pa Deus i batisa?
Bu ta dedika bu vida pa Jeova ora ku bu purmitil na orason di kuma bu na sirbil el son i pui si vontadi na purmeru lugar na bu vida. (Salmu 40:8) Dipus, bu ta batisa. Ora ku bu fasi kila, bu ta mostra utrus di kuma bu dedikaba ja. Dedika no vida pa Jeova i disison mas importanti ku no pudi toma. Ke ku na lebau toma es disison seriu ku na muda bu vida?
1. Ke ku ta leba algin fasi dedikason?
Amor pa Jeova ku ta lebanu dedika no vida pa rel. (1 Jon 4:10, 19) Biblia falanu: “Ama Siñor bu Deus ku tudu bu korson, ku tudu bu alma, ku tudu bu ntindimentu, ku tudu bu forsa.” (Markus 12:30) No ta mostra kuma no ama Deus i ka so atraves di no palabra ma tambi atraves di ke ku no ta fasi. Suma ku dus jintis ku ama n̈utru na bardadi ta kasa, si no ama Jeova kila na lebanu dedika no vida pa rel i batisa.
2. Kal bensons ku Jeova na da pa kilis ku batisa suma si Tustumuña?
Ora ku bu batisa, bu ta fasi parti di familia filis di Jeova. Bu na oja kuma ku Jeova na mostra amor pa bo di manga di manera, bu na mas pertusi del suma nunka antis. (Lei Malakias 3:16-18.) Alen di tene Jeova suma bu Pape bu na tene famila spiritual di ermons ku irmas na mundu ntidu ku ama Jeova i ku amau. (Lei Markus 10:29, 30.) Na bardadi, i ten alguns kusas ku bu pirsisa di fasi antis di bu batisa. Bu pirsisa di kunsi Jeova, amal i tene fe na si Fiju. Pa fin, bu dibi di dedika bu vida pa Jeova. Si bu fasi es kusas i bu batisa, bu na pudi fasi parti di kilis ku na tene vida filis pa sempri. Palabra di Deus fala: ‘Batismu ku bo ta pasa nel gosi i pa salbason’. — 1 Pedru 3:21.
APRINDI MAS
Jubi pabia di ke ku manda i importanti pa bu dedika bu vida pa Jeova i batisa.
3. Anos tudu no dibi di kuji kin ku no na sirbi
Na antigu Israel, alguns jintis ta pensa kuma e pudi sirbi Jeova i na mesmu tempu sirbi un deus falsu comadu Baal. Ma Jeova manda si profeta Elias pa i kuriẑi se mau pensamentu. Lei 1 Reis 18:21, dipus bo kombersa aserka des purgunta:
Kal disison ku israelitas dibi di tomaba?
Suma israelitas, anos tambi no dibi di kuji kin ku no na sirbi. Lei Lukas 16:13, dipus bo kombersa aserka des purguntas:
Ke ku manda no ka pudi adora Jeova i na mesmu tempu adora un algin o utru kusa?
Kuma ku no pudi mostra Jeova di kuma i el ku no disidi adora?
4. Medita na amor ku Jeova tene pa bo
Jeova danu manga di prendas bonitu. Ke ku no pudi dal? Mostra VIDEO.
Kal ki alguns maneras ku Jeova mostra amor pa bo? Lei Salmu 104:14, 15 ku 1 Jon 4:9, 10, dipus bo kombersa aserka des purguntas:
Kal prendas ku Jeova dau ku bu mas misti gardisil pa rel?
Kuma ku es prendas ta fasiu sinti aserka di Jeova?
Ora ku no risibi un prenda ku na bardadi no gosta del, no ta misti gardisi ki algin ku danu el. Lei Ripitison di Lei 16:17, dipus bo kombersa aserka des purgunta:
Ora ku bu pensa na tudu ke ku Jeova fasi pa bo, ke ku kila na lebau pa bu fasi pa rel?
5. Dedikason ta tisi manga di bensons
Manga di jintis ta pensa kuma fama, un bon tarbaju, o diñeru na pui pa e sedu filis. Sera ki kila i bardadi? Mostra VIDEO, dipus bo kombersa aserka des purgunta:
Apesar di kuma es jugadur ku mostradu na video gostaba ciu di juga, ke ku pui i disa jugu?
I disidi dedika si vida, i ka pa jugu, ma pa Jeova. Bu pensa kuma i toma un bon disison? Pabia ku bu pensa sin?
Antis di apostulu Paulu sedu kriston, i staba na buska un pusison garandi na vida. I studaba lei di Judeus ku un pursor ku kunsidu diritu. Ma i disa ki kusas tudu pa sedu kriston. Sera ki Paulu ripindi? Lei Filipensis 3:8, dipus bo kombersa aserka des purguntas:
Ke ku manda Paulu fala kuma kusas ki fasi antis di i sedu kriston i “muntudu,” o liŝu?
Ke ki i gaña na lugar di ki kusas?
Kuma ku bu ta oja bu sirvisu pa Jeova si bu komparal ku kualker utru kusa ku bu pudi fasi na vida?
Oca ku Paulu torna kriston, i gaña mas kusas di ki ke ki i pirdi.
ALGUNS JINTIS TA FALA: “N sibi kuma es i bardadi, ma N ka misti toma komprimisu.”
Pabia ku bu pensa kuma i ta fasi sintidu dedika bu vida pa Jeova?
RUSUMU
Amor ta lebanu dedika no vida pa Jeova i batisa.
Rekapitulason
Ke ku manda Jeova meresi pa no amal di tudu korson i adoral?
Kuma ku Jeova ta bensua kilis ku batisa suma si Tustumuñas?
Sera ki bu misti dedika bu vida pa Jeova?
TENE MAS INFORMASON
Jubi kuma ku un artista ku un atleta disidi dedika se vida pa Jeova.
Jovens Ta Punta — Ke ku N na Fasi ku Ña Vida? — Lembra ke ku Pasa (6:54)
Nes video musikal, jubi kontentamentu ku kilis ku dedika se vida pa Jeova tene.
Na storia “Pa manga di anu N ta puntaba: ‘Ke ku manda no sta li?’” jubi ke ku leba un minjer na pensa na ke ki mas importanti na si vida.
“Biblia ta muda vida di jintis” (Sintinela di 1 di novembru di 2012)