No pudi vivi pa sempri

1. Kuma ku pensa na purmesa di Jeova aserka di vida ku ka ta kaba ta afetanu?

JEOVA purmiti di kuma, kilis ku obdisil na tene “vida ku ka ta kaba”. (Rom 6:23) Ora ku no pensa na ke ku Jeova danu, sin duvida, no amor pa rel ta torna mas forti. Pensa so nes: No Pape ku sta na seu amanu ciu dimas, nada ka pudi separanu del.

2. Kuma ku purmesa di vida ku ka ta kaba ta judanu?

² Purmesa ku Deus fasi di vida ku ka ta kaba, ta judanu nguenta purblemas ku no sta na pasa. Mesmu ora ku no inimigus fala e na matanu, no ka na para sirbi Jeova. Pabia di ke? Un di motivus i pabia no sibi di kuma, si no muri fiel na sirbi Jeova, i na lantandanu di mortu ku speransa di nunka muri mas. (Jon 5:28, 29; 1 Kor 15:55-58; Eb 2:15) Pabia ku no pudi tene sertesa di kuma, i pusivel pa no vivi pa sempri? Jubi es motivus ku no na bin fala del.

JEOVA TA VIVI PA SEMPRI

3. Pabia ku no pudi tene sertesa di kuma Jeova pudi fasinu pa no vivi pa sempri? (Salmu 102:12, 24, 27)

³ No pudi tene sertesa di kuma Jeova pudi fasinu pa no vivi pa sempri, pabia el i Fonti di vida, tambi i ta vivi pa sempri. (Sal 36:9) Nota alguns testus di Biblia ku na mostra kuma Jeova sempri izisti, i na kontinua izisti pa sempri. Salmu 90:2 fala di kuma Jeova izisti “antis di kumsada te dipus di kabantada.” Salmu 102 fala di mesmu kusa. (Lei Salmu 102:12, 24, 27.) Profeta Abakuk fala sin aserka di no Pape ku sta na seu: “Nta bu ka sedu Deus disna di kumsada? O SIÑOR, abo i ña Deus, santu, ku ka ta muri.” — Anos ku pui letra karegadu ku italiku; Aba 1:12.

4. Sera ki no dibi di preokupa si no ka ntindi ideia di kuma Jeova sempri izisti? Bu pudi splika.

⁴ Bu pensa kuma i difisil ntindi ideia di kuma, Jeova “ka ten kumsada nin kabantada”? (Isa 40:28) Manga di jintis ta oja tambi kuma i difisil ntindi es. Eliu fala sin aserka di Deus: “Numeru di si anus ka pudi kalkuladu.” (Jo 36:26) So pabia di kuma no ka ntindi un kusa, kila ka signifika kuma i ka bardadi. Pur isemplu, no pudi ka ntindi diritu kuma ku lus ta funsiona, ma sera ki kila signifika kuma lus ka ten? Nau! Di mesmu manera, anos pekaduris no ka pudi ntindi diritu kuma ki pusivel pa Jeova sempri izisti, i kontinua izisti pa sempri. Ma es ka signifika di kuma Deus ka izisti pa sempri. Izistensia di Kriadur ka dipindi di ke ku no pudi ntindi o di ke ku no ka pudi ntindi. (Rom 11:33-36) El i izisti antis di kualker kusa na seu ku na tera izisti, suma sol ku strelas. No tene sertesa di kuma Jeova “kumpu mundu ku si puder”. I izisti antis di i “kumpu mundu ku tudu ku sta nel”. (Jer 51:15; At 17:24) Kal ki utru motivu ku pui no pudi tene sertesa di kuma no pudi vivi pa sempri?

NO KUMPUDU PA VIVI PA SEMPRI

5. Kal speransa ku purmeru kasal umanu tene?

⁵ Jeova kumpu tudu kusas bibu na Tera pa e vivi pa un tempu, ma menus pekaduris. I so elis ki da speransa di kuma, nunka e ka na muri. Ma Jeova da Adon es avisu: “Arvuri ku ta da kunsimentu di ben ku mal, ka bu kumel, pabia dia ku bu kumel, bu na muri.” (Kum 2:17) Si kontra Adon ku Eva obdisi Jeova, e ka na ciga di muri. I normal pensa di kuma, ku tempu Jeova na disa elis kume “fruta di ki arvuri ku ta da vida”. Es signifika di kuma Jeova sta na garanti elis kuma e na pudi “vivi pa sempri.”b — Kum 3:22.

6-7. (a) Kal utru kusa ku ta mostra kuma pekaduris ka kumpudu pa muri? (b) Kal kusa ku bu na gostaba di bin fasi na paraísu? (Jubi foto ku diseñus.)

⁶ Alguns sientistas diskubri prova di kuma no serebru pudi guarda manga di informason, mas di ki kil ku no pudi guarda duranti no vida. Es i interesanti dimas. Na 2010, un jornal splika di kuma kapasidadi ku no serebru tene, i justa kuas ku 3 milyon di ora di videos gravadu. Bu pudi leba kuas 300 anu pa jubi es videos. I pudi sedu kuma, no serebru pudi guarda mas informason di ki kila. Ma es ta mostra di kuma, Jeova kumpu no serebru pa guarda mas informason di ki kil ku no ta guarda so na 70 o 80 anu. — Sal 90:10.

⁷ Jeova tambi danu diseẑu forti di kontinua vivi. Biblia fala di kuma Deus “da omi sintidu di kil ku pasa ku kil ku na bin”. (Ekl 3:11) Es i un di motivus ku pui no ta oja mortu suma inimigu. (1 Kor 15:26) Si no duensi risu, sera ki no ka na fasi nada, tok no muri? Nau. Normalmenti no ta bai na mon di mediku, i utrora no ta toma mesiñu pa trata no duensa. Na bardadi, no ta fasi tudu ku no pudi pa ka muri. Ora ku algin ku no ama muri, i pudi sedu joven o di idadi, sera ki no ka ta sinti tristi dimas i pa manga di tempu? (Jon 11:32, 33) Na bardadi, no Kriadur amorosu ka na kumpunu ku diseẑu i ku kapasidadi di kontinua vivi si i ka di si vontadi pa pekaduris kontinua vivi. Ma i ten inda mas motivus di fia di kuma, no pudi kontinua vivi pa sempri. Gosi, no na bai fala di ke ku Jeova fasi na pasadu, i ke ki sta na fasi gosi ku ta mostra di kuma i ka muda intenson ki teneba na kumsada.

INTENSON DI JEOVA KA MUDA

8. Ke ku Isaias 55:11 nsinanu aserka di intenson di Jeova pa nos?

⁸ Mesmu manera ku Adon ku Eva peka i tisi mortu pa se fijus, intenson di Jeova ka muda. (Lei Isaias 55:11.) I misti inda pa jintis fiel vivi pa sempri. No sibi es pabia di ke ku Jeova fala i ke ki fasi, pa pudi kumpri si intenson.

9. Kal purmesa ku Deus fasi? (Daniel 12:2, 13)

⁹ Jeova purmiti kuma i na lantanda kilis ku muri i da elis opurtunidadi di vivi pa sempri. (At 24:15; Titu 1:1, 2) Un omi fiel comadu Jo teneba sertesa di kuma, Jeova misti lantanda kilis ku muri. (Jo 14:14, 15) Profeta Daniel sibiba di kuma, pekaduris na lantandadu ku opurtunidadi di vivi pa sempri. (Sal 37:29; lei Daniel 12:2, 13.) Judeus na tempu di Jesus sibiba tambi di kuma, Jeova pudi da si servus fiel “vida ku ka ta kaba”. (Luk 10:25; 18:18) Jesus fala des purmesa manga di bias, el propi i lantandadu pa si Pape. — Mat 19:29; 22:31, 32; Luk 18:30; Jon 11:25.

10. Ke ku resureison na pasadu ta mostra? (Jubi diseñu.)

¹⁰ Jeova ku ta da vida, i tene puder di da mas vida pa kilis ku muri. I da profeta Elias puder di lantanda fiju di viuva di Zarefati. (1 Re 17:21-23) Mas tardi, ku ajuda di Deus, profeta Eliseu lantanda fiju di un minjer di Sunen. (2 Re 4:18-20, 34-37) Es resureisons ku utrus ta mostra di kuma, Jeova tene puder di da mas vida pa kilis ku muri. Ocalba na Tera, Jesus mostra di kuma si Pape dal es puder. (Jon 11:23-25, 43, 44) Gosi Jesus sta na seu i dadu “tudu puder na seu ku na tera.” Asin, i pudi kumpri purmesa di kuma, “tudu mortus ku nteradu” na lantandadu pa vida ku speransa di vivi pa sempri. — Mat 28:18; Jon 5:25-29.

11. Kuma ku resgati pui pa no pudi vivi pa sempri?

¹¹ Pabia ku Jeova pirmiti pa si Fiju ki ama muri di manera tristi? Jesus konta pabia di ke, oca ki fala sin: “Deus ama jinti di mundu dimas, tok i da si uniku Fiju, pa tudu kil ku setal ka ta pirdi, ma i ta tene vida ku ka ta kaba.” (Jon 3:16) Manera ki da si fiju suma resgati pa kubri no pekadu, Deus pui pa no pudi tene vida ku ka ta kaba. (Mat 20:28) Apostolu Paulu splika es parti importanti di intenson di Deus oca ki fala sin: “Di mesmu manera ku un omi tisi mortu pa mundu, asin tambi un omi tisi resureison di mortu. Suma ku tudu jinti muri pabia e liga ku Adon, asin tambi ku tudu na tene vida pabia e liga ku Kristu.” — 1 Kor 15:21, 22.

12. Kuma ku Renu na juda pa kumpri intenson di Jeova pa nos?

¹² Jesus nsina si sigiduris pa ora pa Renu di Deus bin i pa vontadi di Deus fasidu na Tera. (Mat 6:9, 10) Un di kusas ku fasi parti di intenson di Deus, i pa pekaduris vivi pa sempri na Tera. Pa kumpri es, Jeova kuji si Fiju suma Rei di Renu Mesianiku. Deus sta na junta 144.000 jintis ku na tiradu di Tera, pa tarbaja ku Jesus pa pudi kumpri vontadi di Deus. — Apok 5:9, 10.

13. Ke ku Jeova sta na fasi gosi i ke ku no dibi di fasi?

¹³ Gosi Jeova sta na junta “garandi multidon” di jinti. I sta na trena elis pa e bin vivi bas di si Renu. (Apok 7:9, 10; Tiagu 2:8) Mesmu pa manera ku manga di jintis na mundu sta divididu pabia di odiu ku gera, kilis di “garandi multidon” ta sforsa ciu pa tira tudu tipu di odiu na se korson. Di manera simboliku e bidanta ja se spadas na radis. (Mik 4:3) En ves di partisipa na gera ku ta pui manga di jintis pirdi vida, e ta juda jintis sibi kuma ke pudi bin tene “vida di bardadi”, ora ke na nsina elis aserka di Deus di bardadi ku si intenson. (1 Tim 6:19) Membrus di se familia pudi sta kontra elis, o e pudi pirdi se diñeru, pabia e apoia Renu di Deus, ma Jeova fasi pa e tene kusas ke pirsisa del. (Mat 6:25, 30-33; Luk 18:29, 30) Es kusas ta provanu di kuma, Renu di Deus i real tambi i na kontinua kumpri intenson di Jeova.

UN FUTURU BONITU KU STA NO DIANTI

14-15. Kuma ku purmesa di Jeova di kaba ku mortu pa sempri na bin kumpri?

¹⁴ Gosi, Jesus i Rei di Renu di Deus na seu, i na bin kumpri tudu purmesas ku Jeova fasi. (2 Kor 1:20) Disna di 1914, i kumsa ku manda riba di si inimigus. (Sal 110:1, 2) I ka na tarda, Jesus ku kilis ku na manda ku el na kaba ku tudu jintis mau. — Apok 6:2.

¹⁵ Duranti si Renansa di Mil Anu, Jesus na lantanda mortus i juda tudu kilis ku obdisi Jeova pa e sedu perfeitu. Dipus di testi final, kilis ku Jeova julga suma justus “na yarda ki tera, e na mora nel pa sempri”. (Anos ku pui letra karegadu ku italiku, Sal 37:10, 11, 29) Filismenti, “ultimu inimigu ku na kabadu ku el i mortu.” — 1 Kor 15:26.

16. Kal ku dibi di sedu no motivu mas importanti di sirbi Jeova?

¹⁶ Suma ku no oja, no speransa di vivi pa sempri tene un basi forti na Palabra di Deus. Es speransa pudi judanu kontinua fiel na fin des tempu difisil. Ma pa kontenta Jeova, no motivason ka dibi di sedu so diseẑu di kontinua vivi. No motivu mas importanti di kontinua sedu fiel pa Jeova ku Jesus, i di kuma no ama elis ciu dimas. (2 Kor 5:14, 15) Es amor ta motivanu kopia elis i papia ku utrus aserka di speransa ku no tene. (Rom 10:13-15) Ora ku no aprindi ka pensa so na no kabesa i gosta di pati, no ta sedu tipu di jintis ku Jeova misti tene suma si amigus pa sempri. — Eb 13:16.

17. Kal responsabilidadi ku no tene? (Mateus 7:13, 14)

¹⁷ Sera ki no na sta entri kilis ku na tene vida ku ka ta kaba? Jeova danu es opurtunidadi. Gosi, no pirsisa di disidi kontinua na kamiñu ku ta leba pa vida. (Lei Mateus 7:13, 14.) Kuma ku vida na sedu ora ku no na bin vivi pa sempri? No na oja resposta des purgunta na studu ku na bin.