Purguntas di kilis ku ta lei no publikasons

Na Salmu 145:2 Davi fala di kuma i na ngaba nomi di Deus “pa tudu sempri.” Sera ki es signifika di kuma nunka i ka na muri?

Nau i na muri. Ma, ke ku Davi skirbi i bardadi.

Nes versikulu Davi fala sin: “N na fala ben di bu nomi pa tudu sempri.” (Sal 145:1, 2) Davi fala tambi sin na utru versikulu: “SIÑOR ña Deus, N na ngabau ku tudu ña korson; N na glorifika bu nomi pa sempri.” — Sal 86:12.

Oca Davi skirbi es palabras i ka pensaba kuma nunka i ka na ciga di muri. I sibiba di kuma Jeova fala kuma pekaduris na muri pabia di pekadu. Tambi Davi sibiba kuma el i ta fasi pekadu. (Kum 3:3, 17-19; Sal 51:4, 5) I sibiba di kuma, mesmu omis ku tene fabur di Deus, suma Abraon, Isaki ku Jakó muri. Tambi Davi sibiba kuma i na muri. (Sal 37:25; 39:4) Ma es palabras ku sta na Salmu 145:2 ta mostra diseẑu ku disison di Davi di ngaba Deus pa sempri, ku sedu, nkuantu i sta vivu. — 2 Sam 7:12.

Alguns kusas ku Davi skirbiba i ke ku pasa na si vida, suma ku no pudi oja na titulus ku sta riba di Salmu 18, 51 ku 52. Na Salmu 23, Davi coma Jeova di bakiadur ku ta gia, ku ta anima i proteẑi. Davi seduba es tipu di bakiadur. I mistiba sirbi Deus ‘tudu dias di si vida’. — Sal 23:6.

Lembra kuma i Jeova ku orienta Davi pa skirbi tudu es kusas. Palabras ki skirbi nklui profesias aserka di ke ku na bin kontisi dipus. Pur isemplu, na Salmu 110, Davi fala di tempu ku si Siñor na ‘sinta na direita di Deus’ na seu i risibi puder garandi. Pa fasi ke? Pa domina riba di inimigus di Deus i “julga nasons” na Tera. Mesias bin di jorson di Davi, i na bin manda na seu, i na sedu “saserdoti pa sempri”. (Sal 110:1-6) Jesus fala di kuma profesia ku sta na Salmu 110 i aserka del, tambi i na bin kumpri na futuru. — Mat 22:41-45.

Jeova orienta Davi pa i skirbi aserka di ke ku na kontisi na si tempu, tambi ke ku na kontisi na futuru, ora ki bin lantandadu pa pudi ngaba Jeova pa sempri. Asin, Salmu 37:10, 11, 29 pudi aplikadu na tempu ki skirbidu i tambi na futuru. Es versikulus kumpri na tempu antigu na tera di Israel, tambi e na bin kumpri na futuru ora ku Deus kumpri si purmesas. — Jubi paragrafu 8 di artigu “Bu na bin sta ku mi na Paraísu”, nes Sintinela.

Palabras di Davi ku sta na Salmu 145:2 ku utru versikulus ku parsi ku el ta mostra di kuma, Davi misti ngaba Jeova te ora ki muri. Nes versikulus no sibi tambi di kuma, Davi na bin pudi ngaba Deus pa sempri ora ku Jeova lantandal