Jeova na judau ora ku bu tene purblemas ku bu ka spera

1. Ke ku no dibi di sta konvensidu del?

SUMA povu di Jeova, no sibi di kuma i amanu, tambi i misti pa no tene minjor vida pusivel. (Rom 8:35-39) No sta tambi konvensidu di kuma, prinsipius di Biblia sempri ta benefisianu ora ku no aplika elis. (Isa 48:17, 18) Ma, kuma ku no dibi di reaẑi si no tene purblemas ku no ka spera?

2. Kal purblemas ku no pudi tene, i kal purguntas ku no pudi fasi ora ku no tene es purblemas?

² Tudu servus di Jeova tene purblemas. Pur isemplu, un algin na familia pudi punu fika mal. No pudi tene purblemas gravi di saudi ku pudi rapati ke ku no pudi fasi na sirvisu di Jeova. No pudi sufri ciu pabia di disastri natural. O no pudi pirsigidu pabia di ke ku no ta fia nel. Ora ku no tene es tipu di purblemas no pudi punta no kabesa: ‘Pabia ku es kontisi ku mi? Sera ki N fasi algun kusa di mal? Sera ki es misti mostra di kuma Jeova ka sta na bensuan?’ Sera ki bu ciga ja di sinti des manera? Si sedu sin, ka bu fika disanimadu. Manga di servus fiel di Jeova ciga di sinti asin. — Sal 22:1, 2; Aba 1:2, 3.

3. Ke ku no pudi aprindi di Salmu 34:19?

³ Lei Salmu 34:19. Nota dus kusas importanti ku sta nes Salmu: (1) Jintis justu ta tene purblemas. (2) Jeova ta libranu di no purblemas. Kuma ku Jeova ta libranu? Un manera i di judanu oja vida suma ki na bardadi i sedu nes mundu. Jeova purmitinu di kuma no na tene kontentamentu ora ku no na sirbil, ma i ka garantinu di kuma no na tene un vida sin purblemas gosi. (Isa 66:14) I falanu pa no konsentra na futuru, tempu ku no na tene vida ki misti pa no tene pa sempri. (2 Kor 4:16-18) Nkuantu ki dia ka ciga, i ta judanu pa no kontinua sirbil kada dia. — Mis 3:22-24.

4. Ke ku no na bin fala del nes studu?

⁴ No na fala di ke ku no pudi aprindi di isemplus di servus fiel di Jeova na tempus bibliku ku di no tempu. Suma ku no na bin oja, no pudi tene purblemas ku no ka spera. Ma, ora ku no konfia na Jeova, sempri i na judanu. (Sal 55:22) Ora ku no na jubi es isemplus, fasi bu kabesa es purguntas: ‘Kuma ku N na reaẑi si N staba na mesmu situason? Kuma kes isemplus ta aumenta ña konfiansa na Jeova? Kal lisons ku N pudi aplika na ña vida?’

NA TEMPUS BIBLIKU

5. Kal purblemas ku Jakó tene pabia di Labon? (Jubi diseñu ku sta na kapa.)

⁵ Servus di Jeova na tempus bibliku pasa tambi purblemas ke ka speraba. Jubi isemplu di Jakó. Si pape falal pa i bai buska minjer entri fijus femia di Labon, ku sedu, un parenti ku ta adora Jeova. Si pape dal garantia di kuma Jeova na bensual ciu. (Kum 28:1-4) Jakó fasi ke ki sertu. I disa tera di Kanaan i bai pa kasa di Labon ku tene dus fijus femia, Leia ku Rakel. Jakó ama fiju mas pikininu, ku sedu Rakel, i seta tarbaja seti anu pa pudi kasa ku el. (Kum 29:18) Ma, i ka kila ku bin sedu. Labon nganal, asin i kasa ku Leia, fiju mas garandi. Un semana dipus, Labon disa pa Jakó kasa ku Rakel, ma so si tarbaja mas seti anu. (Kum 29:25-27) Labon ka seduba tambi onestu oca ki fasi nogos ku Jakó. Labon splora Jakó pa 20 anu! — Kum 31:41, 42.

6. Kal utrus purblemas ku Jakó nguenta?

⁶ Jakó nguenta utrus purblemas. I teneba un familia garandi, ma si fijus ka filaba ku n̈utru. Te mesmu e bindi se propi ermon suma skravu. Dus fiju di Jakó, ku sedu Simon ku Levi, dana nomi di familia ku di Jeova. Tambi, Rakel, minjer ku Jakó ama ciu muri, oca i na padi si sugundu fiju. Pabia di fomi garandi, Jakó bin ten ku munda pa Ejitu oca i bejuba ja. — Kum 34:30; 35:16-19; 37:28; 45:9-11, 28.

7. Kuma ku Jeova mostra di kuma Jakó tene si fabur?

⁷ Na tudu es purblemas, Jakó ka pirdi fe na Jeova i na si purmesas. I Jeova mostra Jakó di kuma i tene si fabur. Pur isemplu, mesmu pa manera ku Labon ngana Jakó, Jeova dal manga di kusas material. Pensa kuma ku Jakó gardisi ciu Jeova oca i sta mas juntu ku José, fiju ki pensaba di kuma i muri manga di tempu atras! Amisadi forti ku Jakó tene ku Jeova judal nguenta si purblemas. (Kum 30:43; 32:9, 10; 46:28-30) Ora ku no manti un amisadi forti ku Jeova, no pudi tambi nguenta purblemas ku no ka speraba.

8. Ke ku rei Davi mistiba fasi?

⁸ Rei Davi ka pudiba fasi tudu kusa ki mistiba fasi na sirvisu di Jeova. Pur isemplu, Davi teneba diseẑu forti di kumpu un templu pa si Deus. I konta profeta Natan kal ki si diseẑu. Natan falal sin: “Bu pudi fasi tudu ku bu na sinti dentru di bu korson, pabia Deus sta ku bo.” (1 Kron 17:1, 2) No pudi imaẑina kuma kes palabras nkoraẑaba Davi. Talves i kumsaba logu fasi planu pa es projetu garandi.

9. Kuma ku Davi reaẑi ku un notisia ku ka kontental?

⁹ Ma, i ka tarda, profeta di Jeova riba ku un notisia ku ka kontenta Davi. “Ki di noti,” Jeova fala Natan di kuma i ka Davi ku na kumpu templu; ma, i un di si fijus ku na fasil. (1 Kron 17:3, 4, 11, 12) Kuma ku Davi reaẑi oca ki risibi es notisia? I adapta ku si objetivu. I konsentra na junta diñeru ku materialis ku si fiju Salomon na bin pirsisa del pa projetu. — 1 Kron 29:1-5.

10. Kuma ku Jeova bensua Davi?

¹⁰ Logu dipus ku Jeova konta Davi di kuma i ka el ku na kumpu templu, i fasi un kontratu ku el. Jeova purmiti Davi di kuma un algin ku na sai di si jorson na rena pa sempri. (2 Sam 7:16) Na nobu mundu, imaẑina kontentamentu ku Davi na tene di sibi di kuma, i sta na vivi bas di Renansa di Mil Anu di Jesus, ku sedu Rei ku bin di si propi familia! Es storia ta judanu oja di kuma nin si no ka pudi fasi tudu ke ku no misti fasi pa Jeova, no Deus pudi danu utru bensons ku no ka spera tene.

11. Kuma ku kristons di purmeru sekulu bensuadu mesmu pa manera ku Renu ka kumsa guverna na mumentu ke speraba? (At 6:7)

¹¹ Kristons di purmeru sekulu teneba purblemas ke ka speraba tene. Pur isemplu, e tenba dipresa pa Renu di Deus bin, ma e ka sibiba kal tempu ki na sedu. (At 1:6, 7) Ke gora ke fasi? E kontinua sta okupadu na tarbaju di pregason. Nkuantu bon noba staba na spalia, e oja prova klaru di kuma Jeova staba na bensua se sforsu. — Lei Atus 6:7.

12. Ke ku kristons di purmeru sekulu fasi oca i tenba fomi?

¹² Un bias i tenba fomi garandi “na tudu mundu.” (At 11:28) Kristons di purmeru sekulu afetaduba tambi pa fomi. Bu pudi imaẑina kuma ke sufri pabia des fomi garandi? Ku sertesa papes preokupaba na kuma ke na oca di kume pa se familia. Ke gora di jovens ku fasiba planus pa prega mas? Sera ki e pensa di kuma e dibi di adia es planus? I ka mporta kal ki seduba se situason, kristons adapta. E kontinua fasi se minjor na pregason, tambi e staba kontenti di pati ke ke tene pa ermons ku irmas di Judeia. — At 11:29, 30.

13. Kal bensons ku kristons tene na tempu di fomi?

¹³ Kal bensons ku kristons tene na tempu di fomi? Kilis ku risibiba ajuda nota di kuma Jeova staba na juda elis. (Mat 6:31-33) E dibi di sintiba mas pertu di se ermons ku irmas ku juda elis. Kilis ku da ofertas o ku da ajuda di utrus maneras tene filisidadi ku ta bin di da. (At 20:35) Jeova bensua elis tudu pabia e adapta ku nobu situason.

14. Ke ku kontisi ku Barnabé i ku apostolu Paulu, i kal ku sedu rusultadu? (At 14:21, 22)

¹⁴ Kristons di purmeru sekulu pirsigidu manga di bias, i utrora i ta kontisi na mumentu ke ka spera. Jubi ke ku kontisi ku Barnabé i ku apostolu Paulu oca e na pregaba na Listra. Na kumsada, jintis risibi elis diritu i e sukuta elis. Mas tardi, kilis ku staba kontra “konvensi ki jinti”, i alguns di ki mesmu grupu da Paulu ku pedra i e pensaba kuma i muri. (At 14:19) Ma, Barnabé ku Paulu kontinua prega na utru kau. Kal ku sedu rusultadu? E fasi “manga di nobu krenti,” se palabras ku se isemplu fortalisi se ermons na fe. (Lei Atus 14:21, 22.) Manga di jintis benefisia pabia Barnabé ku Paulu ka para prega, mesmu manera ke pirsigidu di repenti. Anos tambi, si no ka para fasi tarbaju ku Jeova falanu pa no fasi, i na bensuanu.

NA NO TEMPU

15. Ke ku bu aprindi ku isemplu di ermon A. H. Macmillan?

¹⁵ Antis di 1914, povu di Jeova na speraba pa alguns kusas kontisi. Pur isemplu, jubi ke ku kontisi ku ermon A. H. Macmillan. Suma manga di jintis na ki tempu, ermon Macmillan pensaba di kuma i na bai pa seu nin i ka na tarda. Na un diskursu ki fasi na Setembru di 1914, i fala sin: “Talves es na sedu ultimu diskursu ku N na fasi.” Na bardadi, kila ka seduba si ultimu diskursu. Mas tardi, ermon Macmillan bin skirbi es: “Talves alguns di nos tira konkluson rapidu di kuma no na bai pa seu logu.” I kontinua fala: “Ke ku no pirsisa di fasi i kontinua sta okupadu na sirvisu di Siñor.” Ermon Macmillan kontinua sta okupadu. I ta pegaba tesu na pregason. I tene privileẑiu di nkoraẑa manga di ermons ku staba na prison pabia e nega partisipa na sirvisu militar. I ta matiba runions sempri mesmu ocalba beju. Kuma ku ermon Macmillan benefisia di usa diritu si tempu nkuantu i staba na pera si pagamentu? Puku tempu antis di muri na 1966, i skirbi sin: “Ña fe nunka torna fraku.” Es i un bon manera di aẑi ku anos tudu no dibi di kopia, prinsipalmenti si no sta na nguenta purblemas pa manga di tempu ku no ka speraba! — Eb 13:7.

16. Kal situason difisil ku Herbert Jennings ku si minjer ka speraba? (Tiagu 4:14)

¹⁶ Manga di servus di Jeova ta luta ku purblemas di saudi ke ka speraba. Pur isemplu, na si storia di vida, ermon Herbert Jenningsb fala di kuma ku el ku si minjer staba kontenti di sirbi suma misionarius na Gana. Ma, ku tempu, i diskubridu kuma i tene un duensa gravi ku ta pul i kontenti i utrora i ta fika tristi dimas. Ermon Jennings usa palabras di Tiagu 4:14 pa si nobu situason ki coma di “no ka pudi sibi kuma ku ‘amaña’ na sedu.” (Lei.) I fala sin: “No seta no nobu situason, asin no disa Gana ku manga di amigus intimu i no riba pa Kanada [pa tratamentu mediku].” Jeova juda ermon Jennings ku si minjer pa e kontinua sirbil di manera fiel mesmu ku situason difisil ke staba na pasa.

17. Kuma ku isemplu di ermon Jennings benefisia ermons na fe?

¹⁷ Palabras di ermon Jennings ki fala di manera klaru na si storia di vida juda utrus ciu. Un irma fala sin: “Nunka N sinti tokadu dimas suma oca ku N lei es artigu. . . . Lei aserka di kuma ku ermon Jennings disa si disignason pa kuida di si saudi, judan oja ña situason di manera ekilibradu.” Un ermon fala tambi sin: “N seduba ansion na kongregason pa 10 anu, ma dipus N disa di sedu ansion pabia di un duensa mental. Ña sentimentu di ka bali nada ta lebanba manga di bias na tene depreson garandi o sinti tristi dimas, tok N ka ta tene vontadi di lei artigus aserka di storia di vida. . . . Ma, manera ku ermon Jennings nguenta nkoraẑan ciu.” Es ta lembrantanu di kuma ora ku no nguenta purblemas ku no ka spera, no pudi nkoraẑa utrus. Nin si no vida ka sedu suma ku no speraba, no pudi sedu un isemplu di fe i isemplu di jintis ku nguenta. — 1 Ped 5:9.

18. Ke ku bu aprindi di isemplu di viuva di Nijeria ku mostradu na fotos?

¹⁸ Duensas suma COVID-19 afeta manga di servus di Jeova. Pur isemplu, un viuva na Nijeria teneba un bokadu di kumida ku diñeru. Un dia parmaña, si fiju femia puntal ke ke na kume dipus de kusña se ultimu kaneka di arus. No irma fala si fiju di kuma e ka tene nin diñeru ku kumida, pa kila, e na kopia isemplu di viuva di Zarefati, e na purpara se ultimu kumida i pui tudu se konfiansa na Jeova. (1 Re 17:8-16) Antis de kumsa pensa aserka di ke ke na kume na janta di ki dia, e risibi un pakoti di ajuda umanitariu ku bin di se ermons na fe. Pakoti tene manga di kumida ku na mas dus semana. Irma fala di kuma i ka nota te kal pontu ku Jeova staba na sukuta ke ki fala si fiju. Na bardadi, ora ku no konfia na Jeova, purblemas ku no ka spera na vida pudi pertusinu mas di Jeova. — 1 Ped 5:6, 7.  

19. Kal pirsigison ku ermon Aleksey Yershov nguenta?

¹⁹ Nes ultimus anus, manga di no ermons ku irmas nguenta pirsigison ke ka spera. Jubi isemplu di ermon Aleksey Yershov, ku mora na Rusia. Povu di Jeova na ki zona teneba sertu liberdadi oca ermon Yershov batisadu na 1994. Ma, anus dipus, situason na Rusia muda. Na 2020, kasa di ermon Yershov nvadidu, e fasi buska i e toma manga di kusas ki tene. Manga di misis dipus, guvernu akusal di krimi. Pa piora situason, akusason basia na video ku fasidu pa un algin ku finji studa Biblia pa mas di un anu. Es seduba un traison garandi!

20. Kuma ku ermon Yershov torna si amisadi ku Jeova mas forti?

²⁰ Sera ki pirsigison di ermon Yershov rusulta na algun kusa di bon? Sin. Si amisadi ku Jeova torna inda mas forti. I fala sin: “Ami ku ña minjer no mas ta ora juntu gosi. N nota di kuma N ka na konsigiba nguenta es situason sin ajuda di Jeova.” I kontinua fala sin: “Studu pesual judan lida ku disanimu. N ta medita na isemplus di servus fiel di pasadu. I ten manga di storias ku sta na Biblia ku ta mostra di kuma, i importanti manti kalmu i mostra konfiansa na Jeova.”

21. Ke ku no aprindi nes studu?

²¹ Ke ku no aprindi nes studu? Utrora no ta tene purblemas ku no ka spera nes mundu. Mesmu asin, Jeova ta juda sempri si servus ora ke konfia nel. Testu nunde ku tema di no studu tiradu nel fala sin: ‘Omi justu pudi tene manga di fadiga, ma Jeova ta libral delis tudu.’ (Sal 34:19) Pa no kontinua konsentra na puder ku Jeova tene pa judanu, i ka na no purblemas. Suma apostolu Paulu, no pudi fala sin: ‘N ten forsa pa tudu kusa pabia di Deus ku ta dan puder.’ — Fil 4:13.